កណ្តាល ៖ បុរសបងថ្លៃ និងប្អូនថ្លៃរួមតុហូបស្រាជាមួយគ្នាគ្រាន់តែទាស់ពាក្យសំដីគ្នាបន្តិចបន្តួច ក៏ផ្ទះនូវអំពើហិង្សាតាមអំណាចស្រា ស បុរសជាបងថ្លៃទាញពូថៅកាប់ក្បាលប្អូនថ្លៃបណ្តាលឲ្យរងរបួសធ្ងន់ធ្ងរបញ្ចូនទោសង្គ្រោះនៅមន្ទីរពេទ្យបង្អែកស្រុកកៀនស្វាយ ។ រីឯបុរសជនដៃដល់ក្រោយពីកើតហេតុបានដាក់មេផាយរត់ចោលផ្ទះបាត់ស្រមោល ។
អំពើហិង្សាដោយចេតនានេះកើតឡើងកាលពីយប់ថ្ងៃទី១២ ខែសីហា នៅចំណុចភូមិដីឥដ្ឋ ឃុំដីឥដ្ឋ ស្រុកកៀនស្វាយ ខេត្តកណ្តាល ។ ប្រភពកន្លែងកើតហេតុបានឲ្យដឹងថា មុនពេលកើតឡើងទំនាស់រវាងបងថ្លៃ-ប្អូនថ្លៃ ផ្តើមចេញពីបងថ្លៃរករឿងវៃប្រពន្ធ ក្នុងពេលនោះបុរសរងគ្រោះប្អូនថ្លៃបានតបតប្រើពាក្យសំដីបែបមិនសូវគោរពបងថ្លៃ ក៏ផ្ទុះរឿងក្តៅស្លឹកត្រចៀក គួបផ្សំស្រានៅក្នុងពោះស្រាប់ផងធ្វើភ្លើងកំហឹងពុះកញ្ជ្រោលឡើងទប់កំហឹងមិនបានទាញពូថៅកាប់ទៅលើប្អូនថ្លៃ ប្រាវបែកក្បាលហូរឈាមស្រោចពេញខ្លួន និងរងរបួសដៃបង្កឲ្យផ្អើលពេញភូមិតែម្តង ។
ជនរងគ្រោះដែលរងរបួសក្រោមផ្លែពូថៅឈ្មោះ ខ្មៅ ភេទប្រុស អាយុ២០ឆ្នាំ មុខរបរកសិករ រស់នៅភូមិ-ឃុំកើតហេតុខាងលើ ។ ចំណែកជនដៃដល់ត្រូវជាបងថ្លៃឈ្មោះ ម៉ៅ ភារី ភេទប្រុស អាយុ២៩ឆ្នាំ ក្រោយពីបង្ករបួសស្នាមរូចបានរត់គេចខ្លួនបាត់ស្រមោល ។ តែទោះជាព្យាយាមរត់គេចខ្លួនក៏ដោយចុះសមត្ថកិច្ចប៉ូលិសព្រហ្មទណ្ឌស្រុកកៀនស្វាយបានកសាងសំណុំរឿងបញ្ចូនទៅតុលាការផងដែរ ៕
