បន្ទាយមានជ័យៈ ជនសង្ស័យ៣នាក់ ជាតៃកុង និងព្រូឡាន ដែលរំលោភលើសេចក្តីទុកចិត្តលើថៅកែ និងប្រើប្រាសគ្រឿងញៀន ត្រូវបានអាវុធហត្ថបន្ទាយមានជ័យឃាត់ខ្លួន និងបញ្ជូនទៅតុលាការកាលពីរសៀលថ្ងៃទី១៤ សីហា ២០១៤ ។ លោក ស្រួយ ប៉ែន ប្រធាមបន្ទីរស្រាវជ្រាវ និងយុត្តិធម៍រាជអាវុហត្ថខេត្តបន្ទាយមានជ័យ បានអោយដឹងថា ជនសង្ស័យទាំងបីនាក់រួមមានឈ្មោះ លឹម សុភា ភេទប្រុស អាយុ២៣ឆ្នាំ ជាអ្នកបើកបរ ឈ្មោះ សុខ វ៉ាន់ ភេទប្រុស អាយុ២៤ឆ្នាំ ជាព្រូ និងឈ្មោះ យ៉ា ទីណា ភេទប្រុស អាយុ១៦ឆ្មាំ ត្រូវបានឃាត់ខ្លួន កាលពីព្រលប់ថ្ងៃទី១២ សីហា ២០១៤ នៅនិងការ៉ាសឡានមួយកន្លែងក្នុងសង្កាត់ផ្សារកណ្តាលក្រុងប៉ោយប៉ែត 
។
ការឃាត់ខ្លួននេះធ្វើឡើង បន្ទាប់ពីទទួលបានពាក្យបណ្តឹង ពីឈ្មោះ យ៉ែម សារឿន ជាម្ចាស់ការដ្ឋានកិនថ្មរ នៅភ្នំធំ បានដាក់ពាក្យបណ្តឹងអោយជួយស្រាជ្រាវរក តៃកុង និងព្រូរថយន្តដែលលោកបានបញ្ជាអោយយកឡានបែនកង១០ ដឹកថ្មទៅម៉ូយនៅស្រុកក្រឡាញ់ ខេត្តសៀមរាប កាលពីព្រឹកថ្ងៃទី១១ សីហា ២០១៤ ស្រាប់តែជនទាំង២នេះ ក្រោយដឹកថ្មរប្រគល់ និងយកលុយពីគេរួច ក៏បាត់ដំណឹងជាមួយ និងរថយន្តមិនអាចទំនាក់ទំនងបានបន្ទាប់ពី តៃកុងរថយន្ត បានតេទូរស័ព្ទប្រាប់ថៅកែថា រថយន្ត ខូចបែកធុងទឹកហើយថៅកែ បានអោយយកទៅធ្វើនៅការាសឡាន នៅផ្លូវលេខ៤ ក្នុងក្រុងសិរីសោភ័ណ តែបែរជាមិនឃើញ ។
ក្រោយទទួលបានពាក្យបណ្តឹង អាវុធហត្ថខេត្តបន្ទាយមានជ័យបាន ធ្វើការស្រាវជ្រាវរហូតឈានដល់ការឃាត់ខ្លួនបានជនសង្ស័យ៣នាក់ និងរកឃើញរថយន្តនៅឯការាសធ្វើឡានមួយនៅសង្កាត់ផ្សារកណ្តាលក្រុងប៉ោយប៉ែតវិញ ។ បើតាមចម្លើយសារភាពរបស់ជនសង្ស័យឈ្មោះ លឹម សុភា បានសារភាពថា ក្រោយយកថ្មទៅអោយម៉ូយរួច គេបានបបួលព្រូ និងជនម្នាក់ទៀត មិនដឹងអី ទៅដើរលេងនៅឯក្រុងប៉ោយប៉ែត ដោយយកលុយថ្លៃថ្មចំនួន៣៥០ ដុល្លា ចេញថ្លៃជួសជុលរថយន្តចំនួន ៩៥ដុល្លា ហើយអោយម្តាយគេ ១៥០ដុល្លា និង៥០ដុល្លាទៀត ប្រគុលអោយថៅកែ សល់ប៉ុន្មាន គេបានយកទៅស៊ីចាយ និងទិញថ្នាំជក់ ។ ដោយយោងតាមពាក្យបណ្តឹង និងចម្លើយសារភាពរបស់ជនសង្ស័យសមត្ថកិច្ចជំនាញ បានកសាងសំនុំរឿងបញ្ជូនខ្លួនទៅតុលាការ ចាត់ការតាមនីតិវិធីច្បាប់ ។
