កំពង់ឆ្នាំង៖ ក្រុមយកភាស៊ីអាណាធិប្បតេយ្យមួយក្រុម ត្រូវបានអាជីវកររិះគន់ថាបានលួច លក់ដីអោយពួកគាត់សង់តូបលក់ដូរនៅលើដីផ្សារសូរ៉ាប៉ា ខុសពីគោលការណ៍លោកអភិបាលខេត្តដែលបានអនុញ្ញាតិអោយអាជីវករលក់ដូរនៅកន្លែងនោះ ជាបណ្តោះអាសន្ន ដែលតំរូវអោយសមត្ថកិច្ចរៀបចំទីតាំងលក់ដូរអោយមានសណ្តាប់ធ្នាប់ និងមិនតំរូវអោយយកលុយកាក់ពីអាជីវករឡើយ។ 
លោក ហង្ស ប៊ុនហាក់ អធិការរងនគរបាលក្រុងកំពង់ឆ្នាំង និងជាប្រធានផ្នែកសណ្តាប់ធ្នាប់ក្រុងកំពង់ឆ្នាំងបាននិយាយអោយដឹងថា៖នៅអង្គប្រជុំកាលពីថ្ងៃទី១៤ ខែសីហា ឆ្នាំ២០១៤ នៅក្នុងក្រុងកំពង់ឆ្នាំងដែលមានវត្តមានចូលរួមពីលោកអភិបាលក្រុង នាយថ្នែកសណ្តាប់ធ្នាប់នគរបាលក្រុង និងគណៈកម្មាការផ្សារលើ បានសំរេចតាមគោលការណ៍របស់គណៈបញ្ជាការឯកភាពខេត្តថា ទីតាំងដីសូរ៉ាប៉ាត្រូវបានអនុញ្ញាតិអោយអាជ្ញាធរក្រុងកំពង់ឆ្នាំងរៀបចំជាផ្សារលក់ដូរជាបណ្តោះអាសន្ន។
ក្នុងនោះបានបញ្ជារអោយលោកនាយផ្នែកសណ្តាប់នគរបាលក្រុងកំពង់ឆ្នាំងជាអ្នករៀបចំសណ្តាប់ធ្នាប់តូបលក់ដូរ ដោយតំរូវអោយឃ្លាតពីចិញ្ចើមខាងលិចថ្នល់ជាតិប្រវែង២៥ម៉ែត្រ មិនអនុញ្ញាតិអោយសង់តូបបិទផ្លូវរបស់ឃ្លាំសូរ៉ាប៉ាឡើយ និងមិនអនុញ្ញាតិអោយយកលុយកាក់ពីបងប្អូនអាជីវករដែលសាងសង់តូបលក់ដូរនោះឡើយ។ប៉ុន្តែតំរូវអោយអាជីករលក់តាមតូបនីមួយៗបង់ថ្លៃអនាម័យក្នុង១តូបៗជាប្រចាំថ្ងៃតែ៥០០រៀលប៉ុណ្ណោះ។ 
ប្រភពពីអាជីវកដែលរលក់ដូរនៅទីតាំងឃ្លាំងសូរ៉ាប៉ា បានអោយអ្នកយកព័ត៌មានយើងដឹងថា៖នៅថ្ងៃទី១៤និង១៥ ខែសីហា ឆ្នាំ២០១៤ បានឆ្លៀតឳកាសលួចវាស់វែងលក់ដីនៅទីតាំងខាងលើនេះយកលុយដាក់ហោប៉ៅផ្ទាល់ខ្លួន ល្មើសនឹងគោលការណ៍គណៈបញ្ជាការឯកភាពខេត្ត ក្នុងនោះផងដែរមានអាជីករខ្លះដែលចង់បានតូបលក់ដូរតាមតំរូវចិត្តខ្លួនបានទិញពីក្រុមភាស៊ីអាណាធិប្បតេយ្យ បើមិនទិញពីក្រុមគេទេគឺគេមិនអនុញ្ញាតិអោយសាងសង់តូបលក់ដូរនោះឡើយ មិនតែប៉ុណ្ណោះពួកក្រុមភាស៊ីអាណាធិប្បតេយ្យបានលួចលក់ផ្លូវវចេញចូលទៅឃ្លាំងសូរ៉ាប៉ាខាងក្រោយទៀតផង។ករណីនេះបានធ្វើអោយសមត្ថកិច្ចនគរបាលផ្នែកសណ្តាប់ធ្នាប់ដែលមានភារកិច្ចរៀបចំសណ្តាប់លក់ដូរប្រតិកម្មយ៉ាងខ្លាំង។
លោក ហង្ស ប៊ុនហាក់ បានមានប្រតិកម្ម និយាយអោយដឹងនៅព្រឹកថ្ងៃទី១៦ ខែសីហា ឆ្នាំ២០១៤នេះថា៖លោកបានរាយការណ៍រឿងនេះជូនគណៈកម្មាការផ្សារលើរួចហើយអោយបញ្ឈប់សកម្មភាពខាងលើរបស់ខ្លួនជាបន្ទាន់។ប្រសិនបើពួកគេនៅតែលួចប្រព្រឹត្តខុសនឹងគោលការណ៍ទៀតនោះ លោកនឹងសុំយោបល់ថ្នាក់លើចាប់ខ្លួនពួកគេ កសាងសំណុំរឿងតាមនីតិវិធី។ លោកក៍បានអំពាវនាវដល់បងប្អូនអាជីវករផងដែរថា៖ឈប់ចាញ់បោកក្រុមភាស៊ីអាណាធិប្បតេយ្យនេះទៀត ព្រោះថាទីតាំងដីសូរ៉ាប៉ាខាងលើនេះគឺអាជ្ញាធរខេត្តអនុញ្ញាតិអោយលក់ដូរជាបណ្តោះអាសន្នតែប៉ុណ្ណោះ ថ្ងៃខាងមុខគេនឹងត្រូវអោយមកលក់ដូរនៅផ្សារលើវិញហើយ។ 
អាជីវករដែលមានតូបលក់ដូរក្នុងផ្សារលើបាននិយាយអោយដឹងថា៖កន្លងមកដោយសារតែក្រុមភាស៊ីអាណាធិប្បតេយ្យទាំងនោះហើយ បាននាំគ្នាលួចលក់ដីលើផ្លូវសាធារណៈនៅសងខាងផ្សារលើអោយគេធ្វើរោងលក់ដូរយ៉ាងអាណាធិប្បតេយ្យ បង្កអោយរាំងស្ទះចរាចរណ៍ចេញចូលមិនរួច បាត់បង់សណ្តាប់ធ្នាប់ និងបរិស្ថាន ដែលធ្វើអាជ្ញាធរក្រុង និងខេត្តដោះស្រាយមិនចេញ។ក្នុងរឿងនេះផងដែរត្រូវបានអាជីវករមួយចំនួនប្តឹងទារលុយថ្លៃទិញដីធ្វើតូបពីក្រុមភាស៊ីអាណាធិប្បតេយ្យទាំងនោះវិញ តែក្រោយមកឭថាភាគីទាំង២បានដោះស្រាយគ្នាស្ងាត់ៗ មិនឃើញប្តឹងតុលាការឡើយ៕
