បន្ទាយមានជ័យ: ច្រកព្រំដែនអន្តរជាតិប៉ោយប៉ែត-ខ្លងលឹក បើកដំណើរការធម្មតាវិញ បន្ទាប់ពីបានបិទ ១ ថ្ងៃ កាលពីថ្ងៃទី១៦សីហា២០១៤។ បន្ទាប់ពីអភិបាលខេត្តបន្ទាយមានជ័យ និង ស្រះកែវ ព្រមទាំងទាហានឈុតខ្មៅថៃ ដែលគ្រប់គ្រងពីលើនៃអាជ្ញាធររបបយោធាអមមកជាមួយនោះ បានជួបប្រជុំគ្នាបន្ទាន់នៅទីស្នាក់ការច្រកទ្វារអន្តរជាតិប៉ោយប៉ែត កាលពីល្ងាចថ្ងៃទី១៦សីហា។ 
ជំនួបលើកដំបូងរបស់លោក គោស៊ុំ សារឿត អភិបាលខេត្តបន្ទាយមានជ័យ និងលោក ថាការ៉ាក់ថន ធៀនឆ័យ អភិបាលខេត្តស្រះកែវ តាំងពីលោកទាំងឡើងកាន់តំណែងនេះរៀងខ្លួន នៅខាងទឹកដីកម្ពុជា ជាបន្ទាន់បែបនេះ ក្នុងរឿងថៃបង្កអោយសៅហ្មង ព្រោះបានធ្វើទុក្ខបុកម្នេញ គាបសង្កត់ តម្លើងថ្លៃពន្ធ រឹតត្បិតឆែកឆេរ និងបិទទំនិញកំប៉ិកកំប៉ុកកម្ពុជា នាំចូលថៃ រហូតដល់ចាប់ដាក់គុកនិងធ្វើទារុណកម្មកម្មករខ្មែរ គឺជា
សញ្ញាថាថៃបន្ទន់ឥរិយាបថបន្តិចក្នុងមួយពេលខ្លី ដើម្បីលួងចិត្តពលរដ្ឋ និងអាជ្ញាធរកម្ពុជាកុំអោយក្តៅក្រហាយនឹងរបបយោធាថៃ ដូចពលរដ្ឋថៃដែរ និងដើម្បីរក្សារភាពប្រក្រតីច្រកព្រំដែនពាណិជ្ជកម្មផ្លូវគោកធំបង្អស់ជាមួយកម្ពុជាផង ព្រោះរបបយោធានេះ បានរឹតត្បិតទំនិញពីកម្ពុជាដែលមានតិចតួចប៉ុណ្ណោះ រាប់ទាំងហាមនាំចូលកសិផលមានពោតក្រហម ដំឡូងមី សណ្តែកសៀស្រូវ ជាដើម។
គួររំលឹកថា ដោយសារថៃចាប់ឃុំឃាំងកម្មករខ្មែរ ១៨ នាក់ពីថ្ងៃទី១៤ សីហាមក តែបានដោះលែង ២ នាក់ ទើបកម្មករ អាជីវករខ្មែរជិតមួយរយនាក់ខឹងសម្បារលើកគ្នាតវ៉ាបិទច្រកព្រំដែន កាលពីថ្ងៃទី១៦សីហា ដើម្បីដាក់សម្ពាធអោយអាជ្ញាធរយោធាថៃនៅព្រំដែន និងនៅខេត្តស្រះកែវ ដោះលែងកម្មករខ្មែរដែលជាប់ឃុំនៅគុកខេត្តស្រះកែវ។
ក្នុងជំនួបនោះ ភាគីថៃថា ខ្លួននឹងធ្វើការជាមួយអគ្គកុងស៊ុលកម្ពុជា ប្រចាំខេត្តស្រះកែវ ដើម្បីដំណើរការនីតិវិធីដោះលែងកម្មករខ្មែរ ១៦ នាក់ ដែលគយ ទាហានឈុតខ្មៅថៃចាប់ខ្លួនដាក់គុក ក្នុងបទចោទបំពានបម្រាម នាំចូលថៃនូវទំនិញជជុះ ឬគីប និងលួចបង្កប់ទំនិញថ្មីរំលោភកម្មសិទ្ធិបញ្ញា៕ដោយ:ឃិន គន្ធា
