រដ្ឋបាលព្រៃឈើចុះបង្ក្រាបគោយន្តប្រជាពលរដ្ឋ ដឹកឈើក្រាក់ នៅដែនព្រៃសហគមន៍ ក្នុងស្រុកអន្លង់វែង ខេត្តឧត្តរមានជ័យ

ឧត្តរមានជ័យៈ រដ្ឋបាលព្រៃឈើដឹកនាំដោយលោក ឃុន សុភា នាយរងខណ្ឌរដ្ឋបាល​ព្រៃឈើ​ខេត្ត​ឧត្តរ​មាន​ជ័យ បានដឹក​នាំ​កម្លាំងផ្នែក និងសង្កាត់រដ្ឋបាលព្រៃឈើស្រុកអន្លង់វែង ចុះធ្វើទប់ស្កាត់ និងហាមឃាត់

​ប្រជា​ពលរដ្ឋដែលចូលទៅកាប់​ព្រៃសហគមន៍សាមគ្គីសង្គ្រោះព្រៃ នៅចំណុចព្រៃស្អាក់ ក្នុងអន្លង់វែង។

ការចុះបង្ក្រាបនេះ បានធ្វើឡើងកាលពីថ្ងៃទី១៦ ខែសីហា ឆ្នាំ២០១៤ កំលាំងចំរុះ បានធ្វើ​ការ​រឹប​អូស​គោយន្តកន្រ្តៃ​ដឹកឈើក្រាក់​ចំនួន៣គ្រឿង និង​រណា​យន្តអារ​ឈើ​ក្រាក់​បាន​ចំនួន៣គ្រឿង និង​បាន​នាំ​យក​រក្សាទុកនៅស្នាក់ការសង្កាត់រដ្ឋបាលព្រៃឈើស្រុកអន្លង់វែង។

បើតាមការរៀបរាប់របស់មន្រ្តីសង្កាត់រដ្ឋបាលព្រៃឈើអន្លង់វែង បានឱ្យដឹងកាលពីព្រឹកថ្ងៃទី១៧ សី​ហា ថា គោយន្តកន្រ្តៃដឹកឈើក្រាក់ ខាងរដ្ឋបាលព្រៃឈើ ​នឹង​ធ្វើ​ការដោះលែងទៅ​វិញ ក៏ប៉ុន្តែ​ឱ្យសា​មី​​ខ្លួន ​ធ្វើលិខិតបញ្ជាក់ពីអាជ្ញាធរភូមិ និងឃុំ រីឯគោយន្តដឹកឈើលេខ២ នឹង​រណា​​យន្ត លោកនឹង​បញ្ជូន​ទៅ​ថ្នាក់លើ អនុវត្តទៅតាមច្បាប់។

តាមការរៀបរាប់ពីប្រជាពលរដ្ឋម្ចាស់គោយន្តកន្រ្តៃបានលើកឡើងថា ពួកគាត់ជាប្រជា​ពលរដ្ឋ​ក្រីក្រ ដែល​មានផ្ទះនៅក្បែរតំបន់ព្រៃសហគមន៍សាមគ្គីសង្គ្រោះព្រៃឈើ ពួកគាត់គ្រាន់តែដើររើស​ឈើ​ក្រាក់​ដែលដួលនៅក្នុងព្រៃ​សហគមន៍ដើម្បីយកមកធ្វើបង្គោលរបងផ្ទះប៉ុណ្ណោះ។

ដោយពួកគាត់បញ្ជាក់ថា ជាប្រជាពលរដ្ឋរស់នៅតាមទីជន​បទឆោតល្ងង់ងាយរងគ្រោះ ហើយ​ពួក​គាត់​​គ្រាន់តែដឹកឈើក្រាក់ មិនមែនដូចជាឈ្មួញធំៗនោះទេ ដែលគេលទ្ធិភាព​ដាក់ម៉ាស៊ីន​កុង​ទីន័រ​អារ​ឈើ និងដឹកជញ្ជូន​ឈើយ៉ាងគគ្រឹកគគ្រេងរហូតដល់ព្រៃឈើនៅចំណុចព្រៃស្អាក់ ស្ទើរអស់​គ្មានសល់​ឡើយ។​

បច្ចុប្បន្ន រថយន្តច្នៃដឹកឈើ និងគោយន្តកន្រ្តៃដឹកឈើលេខ២ ចេញពីតំបន់បរិស្ថាន​អភិរក្ស​គូលែន-ព្រហ្មទេព  ជាប់ព្រំ​ប្រ​ទល់​ខេត្តសៀមរាប និងខេត្ត​ឧត្តរ​មាន​ជ័យ ដោយ​មានការបើក​ភ្លើងខៀវ​ពី​សំ​ណាក់​មន្រ្តីប្រចាំការនៅតំបន់​នោះ ហើយសកម្មភាពដឹកតាមរថយន្តច្នៃ និងគោយន្តច្នៃ យកទៅ​ដាក់ដេរ​ប៉ូនៅក្នុងខេត្តសៀមរាប ដោយឆ្លងកាត់​ស្នាក់​ការសមត្ថកិច្ចជាច្រើនស្ថាប័នដូចជា ទីស្នាក់ការបរិ​ស្ថាន ស្នាក់ការរដ្ឋបាលព្រៃឈើ និងស្នាក់ការអង្គភាព​បង្ក្រាប​បទល្មើសព្រៃឈើជាច្រើន​កន្លែងផ្សេងៗ​ទៀត ដែល​ឈរជើងនៅតាមបណ្តោយដងផ្លូវជាតិលេខ ៦៧B សៀមរាប-ឧត្តរមានជ័យ៕ ប៉ែន នួន