ភ្នំពេញ ៖ បុរសស្រវឹង៣នាក់ចេញពីហាងផឹកស៊ីមួយកន្លែងជិះម៉ូតូបត់ចេញជ្រុលទៅបុកម៉ូតូមួយគ្រឿងជិះដោយបុរស២នាក់បណ្ដាលអោយដួលរងរបួសរលាត់ដៃជើងទាំងសងខាង ហេតុការណ៍នេះបានកើតឡើងកាលពីវេលាម៉ោង១២និ១០នាទីរំលងអាធ្រាត្រឈានចូលថ្ងៃទី១៨ខែសីហាឆ្នាំ
២០១៤ ត្រង់ចំណុចមុខស្ថានទូតម៉ាឡេស៊ី តាមបណ្ដោយផ្លូវព្រះនរោត្ដម ស្ថិតក្នុងសង្កាត់បឹងកេងកង១ ខណ្ឌចំការមន។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមានបុរស៣នាក់ទើបតែផឹកស៊ីរួចស្រវឹងជោកជាំនៅហាង សូ សុវណ្ណាវី រួចក៏ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1P-9179 ចេញពីហាងបត់ស្ដាំក្នុងល្បឿនយ៉ាងលឿន ខណៈនោះក៏មានបុរស២នាក់ជិះម៉ូតូមួយគ្រឿងម៉ាកស៊ុយស៊ូគីវីវ៉ា ពណ៌ខ្មៅ ពាក់ស្លាកលេខ តាកែវ 1A-1143 ជិះធ្វើដំណើរតាមបណ្ដោយផ្លូវព្រះនរោត្ដម ទិសដៅពីជើងទៅត្បូង ទើបតែមកពីកំសាន្តនៅមជ្ឈមណ្ឌលកោះពេជ្រ បំណងត្រឡប់ទៅផ្ទះម្ដុំច្បារអំពៅ ក៏បុកគ្នាចំពេញទំហឹងបណ្ដាលអោយដួលរងរបួសរលាត់ដៃរលាត់ជើងទាំងសងខាង ហើយបុរសស្រវឹងទាំង៣នាក់បានលើកម៉ូតូបំរុងរត់ថែមទាំងរកវាយភាគីខាងម៉ូតូវីវ៉ាថែមទៀត។ បន្ទាប់ពីកើតហេតុសមត្ថកិច្ចប្រចាំការនៅមុខទូតម៉ាឡេស៊ីក៏បានមកអន្តរាគមន៍និងឃាត់បុរសស្រវឹងទាំង៣នាក់នោះ និងបានអោយភាគីទាំង២ធ្វើការសម្របសម្រួលគ្នា ដោយភាគីខាងបុរសស្រវឹងទាំង៣នាក់ធ្វើការសុំទោសដោយភាគីខាងម៉ូតូវីវ៉ាដើម្បីបញ្ចប់រឿងនិងយកម៉ូតូទៅជួសជុលហើយព្យាបាលរបួសដោយខ្លួនឯង ព្រោះភាគីខាងម៉ូតូវីវ៉ាមិនចង់មានរឿងវែងឆ្ងាយបើទោះបីជាដឹងថា ភាគីខាងម៉ូតូហុងដាឌ្រីមខុសទាំងស្រុងក៏ដោយ៕
