សៀមរាប ៖ បន្ទាប់ពីសមត្ថកិច្ចជំនាញបានធ្វើការបង្ក្រាបចំពោះបក្សពួកក្រុមអ្នកប្រព្រឹត្តបទល្មើសគ្រឿងញៀនរួចបញ្ជូនទៅកាន់សាលាដំបូងខេត្តសៀមរាបកាលពីពេលថ្មីៗកន្លងទៅរួចមកសមត្ថកិច្ចក៏បានបន្តនិតិវិធីជំនាញរបស់ខ្លួនរហូតឈានដល់ការចាប់ឃាត់ខ្លួនជនសង្ស័យភេទប្រុស១នាក់នេះបានជាបន្តទៀតកាលពីថ្ងៃទី១៥ខែសីហាឆ្នាំ២០១៤កន្លងទៅរួចយកមកកាន់ការិយាល័យនគរបាលជំនាញដើម្បីធ្វើការសួនាំជាប់ពាក់ព័ន្ធក្នុងករណីប្រើប្រាស់និងជួញដូរគ្រឿងញៀនខុសច្បាប់។
លោកវរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានឲ្យដឹងថាដោយអនុវត្តជាប្រចាំតាមការយកចិត្តទុកដាក់ខ្ពស់ពីសំណាក់លោក ឩត្តមសេនីយ៍ទោ សត ណាឌីស្នងការនគរបាលខេត្តសៀមរាបក៏ដូចជាដើម្បីធ្វើឲ្យការអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ ។ជាក់ស្តែងនៅថ្ងៃខែកើតហេតុខាងលើកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានសហការណ៍ជាមួយកម្លាំងនៃអធិការដ្ឋាននគរបាលក្រុងសៀមរាបបានធ្វើការតាមដានស្រាវជ្រាវនិងឈានដល់ការបង្ក្រាបចាប់ឃាត់ខ្លួនជនសង្ស័យភេទប្រុសម្នាក់នេះបាននៅត្រង់ចំណុចភូមិកសិកម្ម សង្កាត់ស្រងែ ក្រុងសៀមរាប។ 
ដោយជនសង្ស័យនេះមានឈ្មោះ គង់ ធឿន ភេទប្រុសអាយុ ៣២ ឆ្នាំ មុខរបររត់ម៉ូតូឌុប មានទីលំនៅក្នុងភូមិមណ្ឌលបី សង្កាត់ស្លក្រាម ក្រុងសៀមរាប ។ក្នុងកិច្ចចុះប្រតិបត្តិការណ៍ខាងលើសមត្ថកិច្ចបានបន្តឲ្យដឹងទៀតថាបន្ទាប់ពី សមត្ថកិច្ចជំនាញបានធ្វើការចាប់ឃាត់ខ្លួនជនសង្ស័យបានហើយនោះនៅមុខសមត្ថកិច្ចជនសង្ស័យបានឆ្លើយសារភាពថាគេពិតជាបានប្រព្រត្តឹនៅករណីទាំងអស់ខាងលើពិតប្រាកដមែនក្នុងនោះសមត្ថកិច្ចបានបញ្ជាក់ថាសម្រាប់ជនសង្ស័យរូបនេះក្នុងឆ្នាំ២០១៣ គេធ្លាប់បានជាប់ពន្ធធានាគារម្តងរួចមកហើយក្នុងករណីគ្រឿងញៀនដូចគ្នា។បច្ចុប្បន្នជនសង្ស័យត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបហើយកាលពីព្រឹកថ្ងៃទី១៧ខែសីហាឆ្នាំ២០១៤នេះដើម្បីចំណាត់ការទៅតាមនិតិវិធីបន្ត ៕ ដោយ ខេង ខេមរា
