មណ្ឌលគិរី៖ សហគមន៍ជនជាតិដើមភាគតិចការពារព្រៃខេត្តមណ្ឌលគិរីរាយការណ៍ថា សកម្មភាពលួចកាប់ឈើប្រណិតធ្វើអជីវកម្មខុសច្បាប់កើតមានកាន់តែច្រើន នៅក្នុងព្រៃតំបន់អភិរក្សជីវៈចំរុះសីម៉ា។ចំណែកសមត្ថកិច្ចជំនាញ យកចិត្តទុកដាក់ក្នុងការជួយទប់ស្កាត់ករណីនេះដែរ ប៉ុន្តែបទល្មើសព្រៃនៅតែបន្តកើតមាន ទោះបីមានការចាប់បង្ក្រាបបានជាច្រើនករណីក៏ដោយ។
ជាក់ស្ដែងកាលពីថ្ងៃទី២១ខែកុម្ភះឆ្នាំ២០១៤ ត្រង់ចំណុច អូរយៀវ ស្ថិតក្នុងភូមិអណ្ដូងក្រឡឹង ឃុំ សែនមនោរម្យ ស្រុក អូររាំង ខេត្ត មណ្ឌលគិរី សមត្ថកិច្ចជំនាញរបស់អង្គការWCFតំបន់អភិរក្សជីវៈចំរុះសីម៉ា ចាប់បានរថយន្តបង្កុងដឹកឈើ ខុសច្បាប់មួយគ្រឿងដឹកឈើចេញពីព្រៃទាំងកណ្ដាលថ្ងៃត្រង់ គ្មានខ្លាចញញើតច្បាប់សោះ ទើបកម្លាំងអាវុធហត្ថរបស់ អង្គការអភិរក្សWCFចាប់បាន បន្ទាប់ពីមានការរាយការណ៍ពីពលរដ្ឋ។
សមត្ថកិច្ចបានអោយដឹងថា រថយន្តបង្កុងដឹកឈើខុសច្បាប់មានផ្ទុកឈើប្រណិតប្រភេទធ្នងចំនួន៣៣ដុំធំៗ ត្រូវបាន យកមករក្សាទុកនៅស្នាក់ការ អភិរក្សស្រុកអូររាំងធ្វើការស្រាវជ្រាវរកអ្នកប្រព្រឹត្ត ៕
