ខេត្តសៀមរាប៖ កម្លាំងសមត្ថកិច្ចចំរុះខេត្តដែលដឹកនាំដោយលោក សំរិទ្ធ សុខុន ព្រះរាជអាជ្ញរង អមសាលាដំបូងខេត្តបានធ្វើការប្រដេញចាប់រថយន្តលុចស៊ីស៣០០ផ្ទុកឈើគ្រញូងល្មើសច្បាប់មួយគ្រឿង ខណៈពេលដែលរថយន្តនោះបើករត់ត្រឡប់ពីខេត្តកំពង់ធំ ចូលសម្ងំក្នុងខេត្តសៀមរាប ប៉ុន្តែរត់លែងរួចក៏បានទុករថយន្តចោលគេចខ្លួនចូលក្នុងបន្ទាយភូមិភាគទី៤បាត់ស្រមោលសូន្យឈឹង។ ហេតុការចុះបង្ក្រាបនេះធ្វើឡើងនៅវេលាម៉ោង១និង៣០នាទីថ្ងៃទី១៩ខែសីហានៅចំនុចមុខភូមិភាគទី៤ ក្នុងភូមិស្ពានក្អែក ឃុំកណ្តែង ស្រុកប្រាសាទបាគងខេត្តសៀមរាប។ 
លោក ស្រី យូរ៉ា មេបញ្ជាការរងអាវុធហត្ថខេត្តសៀមរាបបានឲ្យដឹងថា ដោយមានសេចក្តីរាយការណ៍មកថា មានរថយន្តលុចស៊ីសដឹកឈើគ្រញូងមួយគ្រឿង ត្រូវបានសមត្ថកិច្ចខេត្តកំពង់ធំដាក់បារ៉ាស់ចាំស្ទាក់ទើបរថយន្តនោះត្រឡប់ក្រោយមកវិញតាមផ្លូវជាតិលេខ៦រត់សំដៅមកខេត្តសៀមរាបដើម្បីចូលជ្រក ប៉ុន្តែត្រូវបានក្រុមសមត្ថកិច្ចចុះរុះនៃខេត្តសៀមរាបធ្វើការប្រដេញស្ទាក់ចាប់បាន រីឯម្ចាស់រថយន្តបានទុករថយន្តចោល ហើយបោលចូលក្នុងបន្ទាយភូមិភាគទី៤បាត់ស្រមោល។
លោកបន្តថា បច្ចុប្បន្នវត្ថុតាងទាំងអស់រួមមាន រថយន្តលុចស៊ីសមួយគ្រឿង នឹង ឈើ គ្រញូងមួយចំនួនត្រូវបានអាវុធហត្ថខេត្តប្រគល់ឲ្យជំនាញរដ្ឋបាលព្រៃឈើខេត្តចាត់ការបន្ត។ លោក ឡឹង សុខា មន្ត្រីផ្នែករដ្ឋបាលព្រៃឈើបន្ទាយស្រីបានឲ្យដឹងថា រថយន្តល្មើស ច្បាប់នោះម៉ាកលុចស៊ីស៣០០ពណ៌ទឹកមាស ពាក់ស្លាកលេខភ្នំពេញ2J 6819 ដែលផ្ទុកឈើគ្រញូងចំនួន១១៤៩គីឡូក្រាម ស្មើនឹង១៥៦ដុំ។លោកបន្តថា វត្ថុតាងទាំងអស់ត្រូវបានកម្លាំង ជំនាញរដ្ឋបាលព្រៃឈើយកទៅរក្សាទុកនៅស្នាក់ការផ្នែករដ្ឋបាលព្រៃឈើបន្ទាយស្រីនៅឃុំ ព្រះដាក់ ដើម្បីរៀបចំកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់៕ 
