ខេត្តបន្ទាយមានជ័យ៖ឯកឧត្តម ប៉ាន់ខែម ប៊ុនថន នាយករងខុទ្ទកាល័យសម្តេចតេជោ នាយករដ្ឋមន្រ្តី និងជាប្រធានក្រុមការងារដឹកនាំដោះស្រាយបញ្ចប់ទំនាស់ បានដឹកនាំកិច្ចប្រជុំ ដើម្បីបន្តរកដំណោះស្រាយបញ្ចប់ទំនាស់ដីធ្លីរ៉ាំរ៉ៃ នៅលើទីតាំងឃុំទួលពង្រ ស្រុកម៉ាឡៃ ខេត្តបន្ទាយមានជ័យ នៅសាលប្រជុំសាលាខេត្តបន្ទាយមានជ័យ នាថ្ងៃទី១០ ខែកញ្ញា ឆ្នាំ២០២១។
អញ្ជើញចូលរួមពីសំណាក់ លោក លី សារី អភិបាលរង ខេត្តបន្ទាយមានជ័យ តំណាងឯកឧត្តម អ៊ុ រាត្រី អភិបាលខេត្ត លោក អាង ណារិទ្ធ ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តបន្ទាយមានជ័យ, លោក ប៉ាង វណ្ណាសេដ្ឋ ប្រធានមន្ទីរកសិកម្មខេត្តបន្ទាយមានជ័យ, លោក ជា ផល្លី នាយខ័ណ្ឌរដ្ឋបាលព្រៃឈើបន្ទាយមានជ័យ, លោក ស្វាយ ជា អភិបាល នៃគណៈអភិបាលស្រុកម៉ាឡៃ, សមាជិកគណៈកម្មាការដោះស្រាយបញ្ចប់ទំនាស់ និងភាគីពាក់ព័ន្ធ។
លោក លី សារី អភិបាលរង ខេត្តបន្ទាយមានជ័យមានប្រសាសន៍ថា៖ ទំនាស់ដីធ្លីរ៉ាំរ៉ៃបានកើតឡើងរវាងភាគីលោក លី អ៊ុតនី (ស្លាប់) និងលោកគង់ ជា លោក តាំង សុខឃី លោកតាំង សុវណ្ណារ៉េត ស្ថិតនៅចំនុចបឹង៧៥ ឃុំទួលពង្រ ស្រុកម៉ាឡៃខេត្តបន្ទាយមានជ័យ ។
លោកលី សារី មានប្រសាសន៍បន្តថា៖គណះកម្មាធិការដោះស្រាយវិវាទដីធ្លីខេត្តបានកោះហៅភាគីជម្លោះ មកដោះស្រាយជាច្រើន លើកច្រើនសារ ហើយចុះវាស់វែងកំណត់ទិន្ន័យទំហំដីទំនាស់ តែភាគីនៅតែមិនទទួលការសមរមសម្រួលពីក្រុមការងារ។
ឯកឧត្តម ប៉ាន់ខែម ប៊ុនថន នាយករងខុទ្ទកាល័យសម្តេចតេជោ នាយករដ្ឋមន្រ្តី និងជាប្រធានក្រុមការងារដឹកនាំដោះស្រាយបញ្ចប់ទំនាស់ បានបញ្ជាក់ឱ្យដឹងថា បន្ទាប់ពីការធ្វើបទបង្ហាញជជែកឆ្លងឆ្លើយពិភាក្សារបស់ក្រុមការងារ និងភាគីពាក់ព័ន្ធទំនាស់ ក្នុងកិច្ចប្រជុំមួយព្រឹកនេះ បានធ្វើឱ្យក្រុមការងារទទួលបានធាតុចូលថ្មីៗបន្ថែមទៀត ដែលជាលទ្ធផលល្អ សម្រាប់ជាជំនួយដល់យន្តការឈានទៅដោះស្រាយបញ្ចប់រឿងវិវាទរ៉ាំរ៉ៃមួយនេះក្នុងពេលឆាប់ៗខាងមុខជាស្ថាពរ៕ដោយ៖ ឃិន គន្ធា
