សៀមរាប ៖ នៅរសៀលថ្ងៃទី១៩ខែសីហាឆ្នាំ២០១៤នេះលោកវរសេនីយ៍ឯក អ៊ុំ អមរា ស្នងការរងនិងជាប្រធានការិយាល័យកណ្តាលប្រឆាំងបទល្មើសនិងលោកវរសេនីយ៍ឯក សឿន សេន នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាប ។ និងកម្លាំងនគរបាលក្នុងអង្គភាពមួយចំនួនទៀតនិងមន្ត្រីកាំកុងត្រូលខេត្តក្រោមការបញ្ជារដឹកនាំកម្លាំងពីសំណាក់លោក សុខ កែវបណ្ឌិត ព្រះរាជអាជ្ញារងសាលាដំបូងខេត្តសៀមរាប បានចុះធ្វើការត្រួតពិនិត្យនិងឆែកឆែទីតាំងស្តុបទុកនិងចែកចែយផលិតផលសាប៊ូម្សៅ និង សាប៊ូទឹកលាងចានចំនួន ពីរកន្លែងស្ថិតនៅក្នុងក្រុងសៀមរាប ។ 
ក្នុងកិច្ចចុះប្រតិបត្តិការណ៍ខាងលើសមត្ថកិច្ចជំនាញបានរកឃើញនិងបានធ្វើការដកហូតបាននូវវត្ថុតាងជាច្រើនប្រភេទពិសេសគឺប្រភេទផលិតផលសាប៊ូម្សៅ និង សាប៊ូទឹកលាងចានគ្មានការបិទស្លាកសញ្ញាសម្គាល់ក្រុមហ៊ុន ថ្ងៃខែផុតកំណត់នៃការប្រើប្រាស់ និងមិនបានសុំច្បាប់ពីក្រសួង ឫ មន្ទីរពាក់ព័ន្ធក្នុងការធ្វើសប្បកម្ម ឫ អាជីវកម្មនោះទេ ។
លោកវរសេនីយ៍ឯក សឿន សេន នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាប បានប្រាប់ឲ្យដឹងថាបន្ទាប់ពីសមត្ថកិច្ចបានធ្វើការត្រួតពិនិត្យនិងឆែកឆែទីតាំងស្តុបទុកនិងចែកចែយផលិតផលសាប៊ូម្សៅ និង សាប៊ូទឹកលាងចានចំនួន ពីរកន្លែងស្ថិតនៅក្នុងក្រុងសៀមរាបនិងបានធ្វើការដកហូតបាននូវវត្ថុតាងជាច្រើនបានហើយនោះម្ចាស់ទីតាំងខាងលើបានធ្វើការអះអាងចំពោះមុខសមត្ថកិច្ចថាផលិតផលរបស់ពួកគាត់សុទ្ធតែមានច្បាប់អនុញ្ញាតត្រឹមត្រូវដោយពួកគាត់និងទំនាក់ទំនងទៅកាន់ក្រុមហ៊ុនរបស់ពួកគាត់នៅរាជធានីភ្នំពេញឲ្យផ្ញើរឯកសារដើមនិងលិខិតស្នាមផ្សេងៗយកមកឲ្យសមត្ថកិច្ចធ្វើការត្រួតពិនិត្យមើលតាមក្រោយ ។ 
ដោយលោកវរសេនីយ៍ឯក អ៊ុំ អមរា ស្នងការរងនិងជាប្រធានការិយាល័យកណ្តាលប្រឆាំងបទល្មើសនិងលោកវរសេនីយ៍ឯក សឿន សេន នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាបបានបញ្ជាក់ថាបើទោះបីជាម្ចាស់ទីតាំងទាំងអស់ខាងលើនិយាយបែបណាក៏ដោយក៏សមត្ថកិច្ចមិនទាន់ជឿថាផលិតផលរបស់ពួកគាត់សុទ្ធតែមានច្បាប់អនុញ្ញាតនោះទេព្រោះថានៅពេលដែល
សមត្ថកិច្ចជំនាញបានទៅដល់ទីតាំងរបស់ពួកគាត់ជាក់ស្តែងនោះគ្រប់ផលិតផលគឺមិនមានការបិទស្លាកសញ្ញាសម្គាល់ក្រុមហ៊ុន ថ្ងៃខែផុតកំណត់នៃការប្រើប្រាស់ និងមិនបានឃើញលិខិតស្នាមនៃការសុំច្បាប់ពីក្រសួង ឫ មន្ទីរពាក់ព័ន្ធក្នុងការធ្វើសប្បកម្ម ឫ អាជីវកម្មរបស់ពួកគាត់នោះទេ ។ បច្ចុប្បន្នទាំងម្ចាស់និងផលិតផលសាប៊ូម្សៅ និង សាប៊ូទឹកលាងចានទាំងអស់នេះត្រូវបានសមត្ថកិច្ចជំនាញកំពុងតែចំណាត់ការទៅតាមនិតិវិធីជាបន្ត ៕ លោក ខេង ខេមរា
