កំពង់ស្ពឺ ៖ កម្មករ-ការនីប្រមាណជាង៤០០នាក់ បាននាំគ្នាផ្ទុះការតវ៉ាកាលព្រឹកថ្ងៃទី២១ ខែសីហា ឆ្នាំ២០១៤ ស្ថិតតាមផ្លូវជាតិលេខ៤១ ក្នុងភូមិដូនកែវ ឃុំសែនដី ស្រុកសំរោងទង ខេត្តកំពង់ស្ពឺ ដើម្បីទាមទាសុំឱ្យថៅកែដំឡើងប្រាក់អត្ថប្រយោជន៍ផ្សេងៗ និងសុំដកប្រធានរដ្ឋបាលចេញផងដែរ ។ 
ក្រុមកម្មករ-ការនីដែលកំពុងតវ៉ានៅមុខរោងចក្រ បាននិយាយថា ពួកគាត់នាំគ្នាធ្វើកូដកម្មពេលនេះ ដោយសារតែរដ្ឋបាលរោងចក្រ មានការគៀបសង្កត់កម្មករហួសហេតុជ្រុលពេក សូម្បីតែទូរស័ព្ឌក៍មិនអនុញ្ញាតិឱ្យប្រើក្នុងរោងចក្រដែល ។ ពួកគាត់បន្តថា ដោយសារតែថៅកែមិនគោរពសិទ្ធកម្ម និងល្មើសច្បាប់ការងារបែបនេះទើមក្រុមកម្មករ ជួបជុំគ្នាធ្វើកូដកម្ម និងទាមទារលក្ខខ័ណ្ឌការងារ ចំនួន ១៥ ចំណុចបន្ថែមទៀតតែម្តង ។ 
សកម្មភាពផ្ទុះការតវ៉ានោះ កើតមាននៅ ក្រុមហ៊ុន វីននីង ដ្រាហ្គន ឡេតដឺវែរ ( ខាមបូឌា ) ខូលអិលធីឌី ស្ថិតតាមផ្លូវជាតិលេខ៤១ ក្នុងភូមិសាស្ត្រសខាងលើ ដែលមានកម្មករសរុបជាង១០០០នាក់ប៉ុន្តែអ្នកដែលតវ៉ាមានត្រឹមតែប្រហែលជាង៤០០នាក់ប៉ុណ្ណោះ មួយចំនួនបានចូលធ្វើការធម្មតា និងខ្លះទៀតសម្រាកនៅផ្ទះ ។ ពេលធ្វើកូដកម្មនោះ ក្រុមកម្មករមានបំណងចង់បិតផ្លូវ ប៉ុន្តែដោយសារតែមានការណែនាំពីសំណាក់សមត្ថកិច្ច និងអាជ្ញាធរ ស្ថានភាពបានធូស្បើយ ភាគីទាំង២បានវិលទៅរកតុចរចាដោយសន្តិវិធី ។ 
មន្ត្រីកងរាជអាវុធហត្ថ ស្រុកសំរោងទង បាននិយាយថា ក្រុមអ្នកតវ៉ាពូកគាត់ធ្វើឡើង ដោយភាពអហិង្សាធ្វើការទាមទារលក្ខខ័ណ្ណការងារ ចំនួន ១៥ ចំណុច ក្នុងនោះរួមមាន៖ ទី១ សុំរោងចក្រកុំកាត់ប្រាក់កម្មករពេលពួកគាត់ឈឺ ដោយសំបុត្របញ្ជាក់ពីមន្ទីរពេទ្យត្រឹមត្រូវ ទី២ពេលកម្មករមកចូលធ្វើការមិនទាន់ម៉ោងដោយសារម៉ូតូ ឬឡានខូចតាមផ្លូវមិនត្រូវកាត់លុយទេ ទី៣ក្រុមហ៊ុនត្រូវធ្វើកិច្ចសន្យាការងារជូនកម្មករពេញសិទ្ធមួយឆ្នាំម្តង បន្ទាប់ពីទូទាត់ប្រាក់៥ភាគរយ និងប្រាក់បំណាច់ឆ្នាំ ទី៤សុំឱ្យកម្មករយកទូរស័ព្ឌចូល ប្រើប្រាស់ក្នុងរោងចក្រធម្មតា ទី៥ស្នើរសុំប្រាក់
ធ្វើដំណើរ១៥ដុល្លា ក្នុងមួយខែ ទី៦នៅពេលក្រុមហ៊ុនចង់បញ្ឍប់កម្មករ-ការនីណាម្នាក់ ត្រូវមានមូលហេតុច្បាស់លាស់ និងត្រូវជូនដំណឹងតាមច្បាប់ការងារ ទី៧ស្នើសុំអាវភ្លៀង ឬឆ័ត្រជូនកម្មករប្រើប្រាស់ក្នុងរដូវវស្សា ទី៨ស្នើរសុំពេលកម្មករ មានទុក្ខធុរៈសំខាន់ ដូចជាសាច់ញាតិ ក្រុមគ្រួសារស្លាប់មិនឱ្យកាត់លុយ ទី៩ស្នើរសុំប្រាក់រង្វាន់ពេលកម្មករធ្វើបានគ្រប់ចំនួនកំណត់ ទី១០សុំបន្ថែមក្រុមអ្នកអនាម័យចំនួន៣នាក់ទៀត ទី១១សុំប្រាក់ថ្ងៃបាយបន្ថែមម៉ោង២០០០រៀល ក្នុងមួយម៉ោង ទី១២សុំក្រុមហ៊ុនកាត់ប្រាក់ខែតាមសមាមាត្រពេលកម្មឈប់មានច្បាប់ ទី១៣ស្នើរសុំថ្ងៃទឹកដោះគោសម្រាប់កម្មការនីមានកូនតូច ទី១៤ស្នើរសុំក្រុមហ៊ុនផ្តល់ប្រាក់បន្ថែមចំនួន១០ដុល្លា សម្រាប់អ្នកជំនាញម៉ាស៊ិនក្បាលសេះ ព្រោះវាលំបាក និងទី១៥ ស្នើរសុំកុំឱ្យកាត់លុយចំនួន២ថ្ងៃទុកនៅពេលពួកគាត់បើកប្រាក់ខែ ។
សមត្ថកិច្ចបានបញ្ជាក់ថា សកម្មភាពធ្វើកូដកម្មនេះ ដឹកនាំដោយក្រុមសហជីពស្មារតី កម្មករខ្មែរ បន្ទាប់ពីមានការតវ៉ា ក្រុមការងារដោះស្រាយវិវេទការងារ នៃមន្ទីរការងារ ខេត្តកំពង់ស្ពឺ បានចុះមកដល់ធ្វើការដោះស្រាយគ្នាភ្លាមៗ ប៉ុន្តែលទ្ធផ្លូវការមិនទាន់ដឹងនៅឡើយទេ ៕
