ខេត្តកណ្តាល៖ យានដ្ឋានដំឡើងរថយន្តអត់បង់ពន្ធនៅស្រុកកណ្តាលស្ទឹងកំពុងដំណើរការយ៉ាងរលូនធ្វើឲ្យខាងបង់ថវិការដ្ឋចំពោះអាជ្ញាធរជំនាញពាក់ព័ន្ធមិនរវល់អើពើធ្វើដឹងឮអ្វីឡើយ។ តាមប្រភពព័ត៌មានពីប្រជាពលរដ្ឋបានឲ្យដឹងថាទីតាំងយានដ្ឋានដំឡើងរថយន្តគេចពន្ធស្ថិត នៅភូមិកំពុងទួល ឃុំ អន្លង់រមៀត ស្រុកកណ្តាលស្ទឹង ខេត្តកណ្តាល។ 
ម្ចាស់យានដ្ឋានសុភ័ណ មានទីតាំងចំណុចភូមិ ឃុំ ខាងលើ ការដំឡើងរថយន្តអត់បង់ពន្ធបាន ដំណើរការយូរឆ្នាំមកហើយ គឺគេមានបណ្តាញទិញគ្រឿងរថយន្តពីរាជធានីភ្នំពេញមករៀងតំឡើងលក់ ក្នុងមួយគ្រឿងចាប់ពី២ម៉ឺនដុល្លារ អាមេរិកឡើង រហូតដល់៣ម៉ឺនដុល្លារ ពីព្រោះរថយន្តទ្រុងដឹកដី ប្រភេទធំៗ ការរៀបដំឡើងរបស់ក្រុមលោកសុភ័ណ គឺមិនមានបច្ចេកទេសត្រឹមត្រូវតាមស្តង់ដា ដូចជា រថយន្តមានពន្ធត្រឹមត្រូវនោះឡើយ។ តាមការសង្កេតឃើញអ្នកដែលទិញរថយន្តពីយានដ្ឋានឈ្មោះ សុភ័ណ ខាងលើតែងតែខូចបន្តបន្ទាប់ថ្ងៃខ្លះរលត់ខូចពេលដែលកំពុងបើកបរពាក់កណ្តាលផ្លូវបង្កគ្រោះថ្នាក់ដល់អ្នកដទៃទៀតផង។ 
ប្រភពដដែលបន្តថា ការរកស៊ីដំឡើងរៀបរថយន្តគេចពន្ធរបស់លោកភ័ណ មិនដែលឃើញមន្ត្រីជំនាញពាក់ព័ន្ធណាម្នាក់ចុះត្រួតពិនិត្យធ្វើទៅតាមច្បាប់នោះឡើយប្រហែលជាត្រូវថ្នាំសណ្តំអស់ ហើយបានជាស្ងៀមស្ងាត់បែបនេះ។ ជុំវិញរឿងរាវខាងលើលោក សុភ័ណ ម្ចាស់យានដ្ឋានបានប្រាប់សារព័ត៌មានយើតតាមទូរស័ព្ទ ឲ្យដឹងថា ការដំឡើងរៀបរថយន្តរបស់គាត់គឺមិនមានបង់ពន្ធតាមផ្លូវច្បាប់ពិតមែន គាត់ដំណើរការច្រើនឆ្នាំមកហើយ មិនដែលមានផលរមាសពិបាកអ្វីឡើយ ពីព្រោះការរកស៊ីរបស់គេបានសហការ យ៉ាងស្អិតរមួតជាមួយក្រុមមន្ត្រីជំនាញពាក់ព័ន្ធអស់ហើយ ពិសេសមន្ត្រីគយតែម្តង ទើបគាត់រកស៊ីបាន មកទល់សព្វថ្ងៃនេះ ហើយការរកស៊ីសព្វថ្ងៃនេះដែរម្នាក់ៗហ៊ានបើករកស៊ីប៉ុណ្ណោះហើយសុទ្ធតែមានខ្សែបណ្តាញខ្នងបង្អែកចាំទទួលខុសត្រូវហើយ។
ទាក់ទិននិងការរៀបតំឡើងរថយន្តអត់ពន្ធខាងលើលោកអ៊ូច សាវឿន អភិបាលរងស្រុក កណ្តាលស្ទឹងបានប្រាប់កម្ពុជាថ្មីតាមទូរស័ព្ទថាបញ្ហានេះលោកមិនបានដឹងឡើយ ដោយសារខាងយានដ្ឋានគេសុំច្បាប់ត្រឹមតែជួសជុលរថយន្តធម្មតាទេបើមានពិតប្រាកដមែនលោកនិងឲ្យមន្ត្រីជំនាញចុះទៅពិនិត្យភ្លាម៕
