កំពង់ឆ្នាំង៖ យុវជនម្នាក់បានរងរបួសធ្ងន់ធ្ងរ ខណៈគេឡើងរាយខ្សែកាបទូរទស្សន៍ត្រូវរចន្តភ្លើងឆក់ឡើងស្លោកខ្លួន ហើយធ្លាក់មកដីកំពស់៧ម៉ែត្រ បោកក្បាលនឹងជ្រុងគ្រែ និងត្រូវបានក្រុមការងាររបស់គេដឹកបញ្ជូនមកសង្គ្រោះជាបន្ទាន់នៅមន្ទីរពេទ្យខេត្ត។ហេតុការណ៍បានកើតឡើងនៅវេលាម៉ោង១១និង១០នាទីព្រឹកថ្ងៃទី២២ ខែសីហា ឆ្នាំ២០១៤ ស្ថិតនៅក្នុងភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។
ឳពុកមាយុវជនរងគ្រោះបាននិយាយអោយដឹងថា៖យុវជនរងគ្រោះមានឈ្មោះ ទ្រា អាយុ១៩ឆ្នាំ រស់នៅភូមិស្ទឹងសណ្តែក ឃុំកំពង់ហៅ ស្រុកកំពង់លែង ខេត្តកំពង់ឆ្នាំង។មុនពេលកើតហេតុក្រុមទូរទស្សន៍ខ្សែកាបមួយក្រុមក្នុងខេត្តកំពង់ឆ្នាំង បានទៅធ្វើការរាយខ្សែកាបទូរទស្សន៍តាមបង្គោលភ្លើង នៅតាមបណ្តោយផ្លូវជាតិលេខ៥ស្ថិតនៅចំណុចកើតហេតុខាងលើ ពេលនោះយុវជនរងគ្រោះបានឡើងតាមជណ្តើរដែកមួយដែលគងភ្ជាប់ជាមួយបង្គោលភ្លើងដើម្បីរាយខ្សែកាបទូរទស្សន៍ ខណៈរូបគេឡើងទៅដល់លើអែបនឹងខ្សែកាបអគ្គិសនី ក៍ត្រូវបានចរន្តភ្លើងស្រូប
ឆក់ផ្ទុះផ្កាភ្លើងធ្លាក់ពេញដី ធ្វើអោយជនរងគ្រោះធ្លាក់មកដីបុកក្បាលជាមួយគ្រែអ្នកលក់ដូរនៅខាងក្រោម បណ្តាលអោយស្លោកខ្លួនប្រកាច់សន្លប់របួសយ៉ាងធ្ងន់ធ្ងរ។ក្រោយពេលកើតហេតុក្រុមការងារទូរទស្សន៍ខ្សែកាប បានដឹកបញ្ជូនភ្លាមៗមកកាន់មន្ទីរពេទ្យខេត្តកំពង់ឆ្នាំងដើម្បីសង្គ្រោះជីវិត។ នៅក្នុងអាគារសង្គ្រោះបន្ទាន់នៃមន្ទីរពេទ្យខេត្តកំពង់ឆ្នាំង គេសង្កេតឃើញក្រុមគ្រួពេទ្យយកថ្នាំត្រជាក់មកបាញ់លើខ្លួនជនរងគ្រោះដើម្បីជួយសង្គ្រោះ ក្នុងពេលនោះដែរមិត្តភ័ក្រក្នុងក្រុមការងារ៥នាក់បានជួយចាប់ជនរងគ្រោះ ព្រោះរូបគេកំពុងប្រកាច់ត្រដរខ្យល់ គួរអោយរន្ធត់ នៅក្នុងសភាពខាងលើនេះការជួយសង្គ្រោះជនរងគ្រោះគឺមានសង្ឃឹមតិចតួចណាស់។
ករណីខាងលើនេះត្រូវបានគេសន្និដ្ឋានថា ជនរងគ្រោះមានការធ្វេសប្រហែស ដែលគេយល់ថា ការរាយខ្សែកានទូរទស្សបែបនេះគួរតែសហការណ៍ជាមួយ ផ្នែកអគ្គីសនីអោយគេបិតចរន្តអគ្គីសនីសិនទើបគ្មានគ្រោះថ្នាក់កើតឡើង៕
