កំពង់ឆ្នាំង៖យុវសិស្សម្នាក់ត្រូវបានខ្សែកាបធំអគ្គីសនីឆក់ស្លាប់លើចុងដូង ខណៈដែលរូប គេឡើងកាប់ផ្លែដូងបានជាន់ធាងដូងប៉ះខ្សែកាបអគ្គីសនីឆក់ខ្លោចខ្លួនតែម្តង។ករណីនេះ បានកើតឡើងនៅវេលាម៉ោង៤និង៣០នាទី ល្ងាចថ្ងៃទី២២ ខែសីហា ឆ្នាំ២០១៤ នៅក្នុងភូមិស្នាយ ឃុំតាជេស ស្រុកកំពង់ត្រឡាច។
លោកអធិការនគរបាលស្រុកកំពង់ត្រឡាចបានអោយដឹងថា៖យុវសិស្សរងគ្រោះ មានឈ្មោះ ភុំ វាសនា អាយុ១៥ឆ្នាំ រៀនថ្នាក់ទី៥ រស់នៅក្នុងភូមិឃុំកើតហេតុខាងលើ។មុន ពេលកើតហេតុបងប្អូនរបស់គេបានប្រើអោយឡើងកាប់ផ្លែដូងហូប។ពេលនោះគេឡើងដើមដូង១ដើមនៅមុខផ្ទះជិតបង្គោលខ្សែកាបធំអគ្គីសនី នៅពេលឡើងដល់ចុងដូងបាន ជាន់ធាងដូង១ធាងធ្លាក់ចុងវាប៉ះនិងខ្សែកាបអគ្គីសនី បណ្តាលអោយអគ្គីសនីឆក់រូបគេខ្លោ ចខ្លួនស្លាប់ភ្លាមនៅលើចុងដូងតែម្តង។ ក្រោយពេលកើតហេតុ បងប្អូនជនរងគ្រោះក៏បាននាំគ្នាឡើងដើមដូងយកសពជនរងគ្រោះចុះមកដី ដើម្បីយកទៅលំនៅដ្ឋានធ្វើបុណ្យទៀនតាមប្រពៃណី។ 
គួរបញ្ជាក់ថា៖នៅក្នុងថ្ងៃទី២២ ខែសីហា ឆ្នាំ២០១៤នេះ ករណីឆក់ខ្សែកាបអគ្គីសនី ដូចនេះបានកើតឡើងចំនួន២លើក គឺករណីទី១វេលាម៉ោង១១និង១០នាទីព្រឹក ឈ្មោះ ទ្រា ជាកម្មករទូរទស្សន៍ខ្សែកាបខេត្តកំពង់ឆ្នាំង ក៏ត្រូវបានខ្សែកាបធំអគ្គីសនី ឆក់ធ្លាក់ពី លើបង្គោលភ្លើងមកដីកំពស់៧ម៉ែត្រ រលាកខ្លួនរងរបួសធ្ងន់ធ្ងរផងដែលនៅពេលរូបគេឡើងរាយខ្សែកាបទូរទស្សន៍នៅម្តុំផ្សារព្រៃខ្មែរ។ក្រោយពេលកើតហេតុគេបានបញ្ជូនជនរងគ្រោះមកសង្គ្រោះនៅក្នុងមន្ទីរពេទ្យខេត្ត បន្ទាប់មកដោយសភាពរបួសធ្ងន់ធ្ងរ មន្ទីពេទ្យ ខេត្តក៏បានបញ្ជូនរូបគេទៅកាន់ មន្ទីរពេទ្យក្រុងភ្នំពេញដើម្បីសង្គ្រោះបន្តទៀត។ចំណែក ករណីទី២ គឺជនរងគ្រោះឈ្មោះ ភុំ វាសនា ខាងលើនេះហើយ។
លោកមេការអគ្គីសនីខេត្តម្នាក់បានអោយដឹងថា៖ខ្សែកាបអគ្គីសនីធំនេះ មានកម្លាំង ភ្លើង២ប្រភេទ គឺខ្សែកំពស់១២ម៉ែត្រ មានភ្លើង១ម៉ឺនវុល និងខ្សែកំពស់៧ម៉ែត្រ មានកម្លាំងភ្លើង២ម៉ឺនវុល គឺបើនៅជិតវាតែក្រោម១ម៉ែត្រពិតជាត្រូវវាស្រូបឆក់មនុស្សតែម្តង ហេតុនេះបងប្អូនប្រជាពលរដ្ឋទាំងអស់ត្រូវតែយល់ដឹងនិងប្រុងប្រយត្ន័អោយបានខ្ពស់៕
