ភ្នំពេញ ៖ យុវជនម្នាក់ជិះម៉ូតូមួយគ្រឿងមិនគោរពភ្លើងសញ្ញាចរាចរឆ្លងស្ដុបទៅបុកម៉ូតូមួយគ្រឿងជិះដោយយុវជន២នាក់ចំពេញទំហឹងបណ្ដាលអោយរងរបួសម្នាក់និងស្រាល២នាក់។ ហេតុការណ៍នេះបានកើតឡើងកាលពីវេលាម៉ោង៩និ១០នាទីយប់ថ្ងៃទី២៤ខែសីហាឆ្នាំ២០១៤
ត្រង់ចំណុចស្តុបផ្លូវបែកជាបួន តាមបណ្ដោយផ្លូវម៉ៅសេទុងកែងផ្លូវលេខ៣៣៦ ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
ប្រភពព័ត៍មានពីកន្លែងកើតហេតុបានអោយដឹងថានៅមុនពេលកើតហេតុគេឃើញ យុវជន២នាក់ ជិះម៉ូតូមួយគ្រឿងម៉ាកស៊ុយស៊ូគីស្មាស់វី ពណ៍ខ្មៅពាក់ស្លាកលេខកំពត 1E-5043 ធ្វើដំណើរ តាមបណ្ដោយផ្លូវម៉ៅសេទុង ទិសដៅពីជើងទៅត្បូងស្រាប់តែមកដល់ចំណុចស្តុបកែងផ្លូវលេខ៣៣៦ ក៏មានយុវជនម្នាក់ជិះម៉ូតូមួយគ្រឿងម៉ាកគុបពណ៍ទឹកប៊ិចពាក់ស្លាកលេខ ដ៨៤១៦ ភព១ ចេញពី ផ្សារដើមគ ធ្វើដំណើរតាមបណ្ដោយផ្លូវ៣៣៦ ទិសដៅពីកើតទៅលិចឆ្លងស្តុបដោយមិនគោរពភ្លើង សញ្ញាចរាចរក៏បានបុកគ្នាចំពេញទំហឹងបណ្ដាលអោយយុវជនជិះម៉តូគុបរងរបួសធ្ងន់ចំណែកយុវជន ដែលជិះម៉ូតូស៊ុយស៊ូគីស្មាស់វីទាំង២នាក់ រងរបួសស្រាល។ បន្ទាប់ពីកើតហេតុសមត្ថកិច្ចមូលដ្ឋានបានចុះមកអន្តរាគមន៍ភ្លាមៗ និងបានបញ្ជូនជនរងគ្រោះទៅ សង្គ្រោះនៅមន្ទីរពេទ្យភ្លាមៗផងដែរ ហើយដំណាងភាគីទាំង២បានធ្វើការសម្របសម្រួលគ្នាមួយសន្ទុះ ក៏សម្រេចថាសុំស្មើរគ្នាដោយយកម៉ូតូទៅជួសជុលនិងព្យាបាលរបួសរៀងៗខ្លួនបញ្ចប់រឿង នៅកន្លែងកើតហេតុ៕
