ភ្នំពេញ ៖ បុរសជនជាតិចិន២នាក់ស្រវឹងធ្លាក់ភ្នែកបើករថយន្តលុចស៊ីសមួយគ្រឿងក្នុងល្បឿនលឿនបុករបាំងថ្មពុះ ចែកទ្រូងផ្លូវដែលគេរៀបចំការដ្ឋានដាក់ប្រព័ន្ធលូរបាក់អស់ចំនួន៧កង់ ហើយរថយន្តរងការខូចខាតយ៉ាងដំណំ ហេតុការណ៍នេះបានកើតឡើងកាលពីវេលាម៉ោង១០និង
៣០នាទីយប់ថ្ងៃទី២៤ខែសីហាឆ្នាំ២០១៤ ត្រង់ចំណុចមុខ សណ្ឋាគារអ៊ិនទើខនធីណីលថលភ្នំពេញតាមបណ្ដោយផ្លូវម៉ៅសេទុងស្ថិតក្នុងសង្កាត់ទំនប់ទឹកខណ្ឌចំការមន។
បើតាមសម្ដីបុរសម្នាក់ជាអ្នករត់ម៉ូតូឌុបក្បែរនោះបានឃើញហេតុការណ៍រៀបរាប់ប្រាប់ថាមុនពេលកើតហេតុ គេបានឃើញរថយន្តមួយគ្រឿងម៉ាកលុចស៊ីសពណ៌ខ្មៅពាក់ស្លាកលេខភ្នំពេញ 2W-8760 ជិះធ្វើដំណើរដោយ បុរសជនជាតិចិន២នាក់ស្រវឹងធ្លាក់ភ្នែក តាមបណ្ដោយផ្លូវម៉ៅសេទុងក្នុងល្បឿនយ៉ាងលឿនទិសដៅពីជើងទៅត្បូង ស្រាប់តែមកដល់ចំណុចកើតហេតុរថយន្តក៏បុករបាំងថ្មពុះចែកទ្រូងផ្លូវដែលគេរៀបចំការដ្ឋាន ដាក់ប្រព័ន្ធលូរ ចូលមកចំណែកផ្លូវខាងរថយន្ត ចំពេញទំហឹងបាក់អស់ចំនួន៧កង់ ប្រហែលអ្នកបើកបររថយន្តមើលមិនឃើញ នៅត្រង់នោះមានរបាំងថ្មដោយសារស្រវឹងខ្លាំងពេក ចំណែកអ្នកជិះក្នុងរថយន្តគ្រាន់តែរងរបួសស្រាលហើយត្រូវ បានគ្នីគ្នានាំឡើងជិះរថយន្តមួយគ្រឿងទៀតទៅបាត់។ បន្ទាប់ពីកើតហេតុសមត្ថកិច្ចមូលដ្ឋានបានចុះមកត្រួតពិនិត្យ និងបានទំនាក់ទំនងទៅសមត្ថកិច្ចជំនាញចុះមកវាស់វែងនិងស្ទូចរថយន្តទៅរក្សាទុកនៅការិយាល័យចរាចរជើងគោកនៃស្នងការដ្ឋានគរបាលរាជធានីភ្នំពេញដើម្បីធ្វើការដោះស្រាយតាមផ្លូវច្បាប់។
គួរបញ្ជាក់ថាកាលពីយប់ម្សិលម៉ិញក៏មានរថយន្តបាឡែនមួយគ្រឿងបើកក្នុងល្បឿនលឿនហើយបែកកង់ខាងមុខក៏ជ្រុលទៅបុករបាំងថ្មពុះចែកទ្រូងផ្លូវបាក់អស់ចំនួន៩កង់នៅកន្លែងដដែលនេះ ហើយរថយន្តរងការខូចខាតយ៉ាងដំណំ ហេតុការណ៍នេះបានកើតឡើងកាលពីវេលាម៉ោង១២និង៥០នាទីរំលងអាធ្រាត្រឈានចូលថ្ងៃទី២៤ ខែសីហា ឆ្នាំ២០១៤។ បើតាមសម្ដីរបស់សន្តិសុខដែលអង្គុយយាមក្បែរកន្លែងកើតហេតុបានឃើញហេតុការណ៍រៀបរាប់ប្រាប់ថា មុនពេលកើតហេតុគេបានឃើញរថយន្តមួយគ្រឿងម៉ាកតូយ៉ូតាកាមរីបាឡែនពណ៌សពាក់ស្លាកលេខភ្នំពេញ 2P-8902 ជិះធ្វើដំណើរដោយបុរស៤នាក់ តាមបណ្ដោយផ្លូវម៉ៅសេទុងក្នុងល្បឿនយ៉ាងលឿន ស្រាប់តែមកដល់ចំណុចកើតហេតុ រថយន្តក៏បានបែកកង់ខាងមុខផ្នែកខាងឆ្វេងបណ្ដាលអោយរេចង្កូតបុករបាំងថ្មពុះចែកទ្រូងផ្លូវបាក់អស់ចំនួន៩កង់ ធ្វើរថយន្តរងការខូចខាតយ៉ាងដំណំចំណែកអ្នកជិះក្នុងរថយន្តគ្រាន់តែរងរបួសស្រាល៕
