កំពង់ធំៈ កិច្ចប្រតិបត្តិការហ្វឹកហាត់ ត្រៀមសម សម្រាប់ការចុះជួយសង្គ្រោះដល់ប្រជាពលរដ្ឋ ដែលរងគ្រោះ ដោយសារទឹកជំនន់ ក្រោមការចង្អុលបង្ហាញនិងដឹកនាំផ្ទាល់ដោយលោក ឧត្តមសេនីយ៍ត្រី ហង្ស ថុល មេបញ្ជាការកងរាជ អាវុធហត្ថខេត្តកំពង់ធំ និងលោកវរៈសេនីយ៍ត្រី ឃុន ប៊ុនហូ មេបញ្ជាការកងរាជអាវុធហត្ថ ស្រុកស្ទោង ចុះអនុវត្តន៍ហ្វឹកហាត់ជាក់ស្តែង នៅចំនុច( ស្ទឹងនាងសល្ងាច )ស្ថិតនៅភូមិ នាងសល្ងាច ឃុំ កំពង់ចិនជើង ស្រុកស្ទោង ខេត្តកំពង់ធំ ដោយមានការចូលរួម ពីកំលាំងកងរាជអាវុធហត្ថ គ្រប់ស្រុកក្រុង ចូលរួមសរុប៧៥នាក់ កាលពីព្រឹកថ្ងៃទី ២៥ ខែ សីហា ឆ្នាំ ២០១៤។ 
សកម្មភាពដឹកនាំកម្លាំងរបស់ លោកឧត្តមសេនីយ៍ត្រី ហង្ស ថុល ត្រូវបានធ្វើកិច្ចប្រតិបត្តិការណ៍ ដោយសកម្មភាពជាក់ដូចពិតៗ ដើម្បីឲ្យមន្ត្រីដែលស្ថិតនៅក្នុងការហ្វឹកហាត់ មានការយល់ដឹងកាន់តែច្បាស់ នូវបទពិសោធន៍ ក្នុងការជួយសង្គ្រោះដល់ជនរងគ្រោះ ដែលកំពុងតែត្រូវការជួយសង្គ្រោះ មិនតែប៉ុណ្ណោះការហ្វឹកហាត់នេះ ត្រូវបានរៀបចំនូវទីទួលសុវត្តិភាព បោះតង់កៅស៊ូសម្រាប់ជាជម្រកស្នាក់នៅបណ្តោះអាសន្ន ជាច្រើនតង់ មានការធ្វើម្ហូបអាហារ និងមានសកម្មភាពគ្រូពេទ្យជំនាញ បង្គន់អានាម័យ និងការព្យាបាល តង់សង្គ្រោះរួម ទិដ្ឋភាពទាំងនេះ បានសម្តែងចេញដូចសកម្មភាពពិតៗ នៅនិងគោលដៅ ។ 
ការហ្វឹកហាត់នេះ ត្រូវបានចូលរួម សហការពីសំណាក់ប្រជាពលរដ្ឋ ក្នុងការសម្តែងធ្វើជាជនរងគ្រោះដែល កំពុងតែប្រឈមនិងគ្រោះមហន្តរាយ ដោយសារទឹកជំនន់ សកម្មភាពដ៍រហ័សរហួន របស់កម្លាំងកងរាជអាវុធ ហត្ថខេត្តកំពង់ធំ បានបញ្ជាក់ពីការស្ទាត់ជំនាញ ក្នុងការជួយសង្គ្រោះអាយុជីវិត មនុស្សចាស់ ស្ត្រី កុមារពីចំនុចគ្រោះថ្នាក់ ជាពិសេសការជួយសង្គ្រោះជនរងគ្រោះ ដែលកំពុងតែលង់ទឹក និងការជួយអាយុជីវិតបឋម នៅនឹងទឹកនិងការដឹកជញ្ជូនមកកាន់ទីទួលសុវត្តិភាព សកម្មភាពទាំងនេះបានបង្ហាញឲ្យឃើញពីការសាមគ្គីគ្នា រួមសុខរួមទុក្ខរបស់ប្រជាពលរដ្ឋ ។ 
លោក ឧត្តមសេនីយ៍ត្រី ហង្ស ថុល មេបញ្ជាការកងរាជអាវុធហត្ថខេត្តកំពង់ធំ បានឲ្យដឹងថា ដោយមានការណែនាំនិងចង្អុលបង្ហាញពីឯកឧត្តម នាយឧត្តមសេនីយ៍ ផ្កាយមាសបួន សៅ សុខា មេបញ្ជាការងកងយោធពលខេមរៈភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានឲ្យកងរាជអាវុធហត្ថខេត្តក្រុង មាន ការយកចិត្តទុកដាក់ រួមសុខរួមទុក្ខផ្សារជាមួយប្រជាពលរដ្ឋ និងជួយសង្គ្រោះអាយុជីវិត នៅពេលដែលទទួល រងគ្រោះដោយសារទឹកជំនន់ ឬគ្រោះមហន្តរាយផ្សេៗពីធម្មជាតិ ។ 
ក្នុងនោះដែរលោក ឧត្តមសេនីយ៍ត្រី ហង្ស ថុល បានអំពាវនាវឲ្យប្រជាពលរដ្ឋ មានការប្រយ័ត្នប្រយែង កូន ចៅ និងសត្វពាហនៈ ដែលអាចនិងប្រឈមនិងគ្រោះមហន្តរាយដោយសារទឹកជំនន់ និងសូមឲ្យជួយផ្តល់ ពត៌មានពីប្រជាពលរដ្ឋណារងគ្រោះ ដោយសារទឹកជំនន់ មកកងរាជអាវុធហត្ថគ្រប់ស្រុកក្រុង ឬអាជ្ញាធរដែលនៅជិតបំផុត ដើម្បីចាត់វិធានការជួយសង្គ្រោះអាយុជីវិត ។ 
