ខេត្តក្រចេះ៖ កម្លាំងនគរបាលនៃការរិយាល័យប្រឆាំងបទល្មើសសេដ្ឋកិច្ចខេត្ត ដឹកនាំដោយ លោកវរៈសេនីយ៏ឯក គង់ វណ្ណារិទ្ឋ ស្នងការរង ប្រឆាំងបទល្មើសខេត្ត បង្ក្រាបនិងចាប់ឃាត់រថយន្តឈើអារប្រណីតចំនួន៣គ្រឿងនៅកន្លែងផ្សេងគ្នា ដែលកំពង់ធ្វើចរាចរណ៍តាមដងផ្លូវ និងបានប្រគល់ ឲ្យមេព្រៃមន្ត្រីរដ្ឋបាលព្រៃក្រចេះនៅថ្ងៃទី២៤ ខែសីហា ដើម្បីចាត់វិធានការបន្ត។
អ្នកបើកបរ ចំនួន២នាក់ ព្រមទាំងរថយន្តដឹកឈើប្រណិតដែលសុទ្ឋសឹងជាប្រភេទឈើធ្នង់ប្រមាណជាចំនួនជិត៦០កំណាត់តូចធំ ស្មើនិងជាងបីម៉ែត្រគូប គឺត្រូវបានកម្លាំងប៉ូលិស ធ្វើការចាប់បង្ក្រាបបានជា បន្តបន្ទាប់នៅកន្លែងផ្សេងគ្នា នៅលើផ្លូវជាតិលេខ៧ និងផ្លូវជាតិ៧៣ កាលពីយប់ថ្ងៃទី២៣ ខែសីហា ដែលក្រុមឈ្មួញកំពុងតែ ធ្វើចរាចរណ៏ដឹកជញ្ជូន យ៉ាងអណាធិបតេយ្យ ខណះមេព្រៃឆ្លើយថាគ្មានកម្លាំងធ្វើការ ។ 
សេចក្តីរាយការណ៍មួយបានឲ្យដឹងថាអ្នកបើកបររថយន្តទាំងពីរនាក់ ដែលកម្លាំងសមត្ថកិច្ចចាប់បង្ក្រាប មានម្នាក់ជាកូនប្រុសរបស់លោក សន ឈឿង តួនាទីជាយោធានៅក្នុងវរៈការពារព្រំដែន២០៤ ក្នុងស្រុកស្នួល ហើយលោក សន ឈឿង គឺជាឈ្មួញ រកស៊ីដឹកជញ្ជូនឈើប្រណិត ដែលមានឈ្មោះបោះសំលេង ក្នុងការយកអំណាចខ្លួនជាយោធា នៅក្នុងវរៈការពារព្រំដែន២០៤ យកមករកស៊ីដឹកជញ្ជូនឈើខុសច្បាប់ ចេញពីតំបន់នានាក្នុងខេត្តក្រចេះ នាំឆ្ពោះយកទៅស្រុកស្នួល ។
នាយរងសង្កាត់រដ្ឋបាលព្រៃឈើកន្ទួត លោក អ៊ិន តាយម៉េង បានឲ្យដឹងនៅព្រឹកថ្ងៃទី២៥ សីហានេះថា រថយន្តដឹកឈើខុសច្បាប់ទាំងបីគ្រឿងរួមមានរថយន្តកាមេរីឆ្លាម២គ្រឿងនិង រថយន្តកាមេរីគូថហើម១គ្រឿង ដែលមានផ្ទុកឈើអារប្រណិតធ្នង់ចំនួន៥៨កំណាត់តូចធំ ស្មើរជាង៣ម៉ែត្រគូប ត្រូវបានយកទៅរក្សាទុកនៅថ្នាលបណ្តុះកូនឈើខ្សារ រីឯមនុស្សទាំងពីនាក់និងរថយន្តគឺកម្លាំងប៉ូលិស យកទៅអ្នករក្សារទុក និងចាត់ការបន្តរ។ ជាមួយនិងការចុះបង្ក្រាបការដឹកជញ្ជូនឈើខុសច្បាប់ ពីសំណាក់កម្លាំងប៉ូលិស សេដ្ឋកិច្ចបាលខេត្ត បានចាប់ឃាត់ខ្លួនអ្នកបើកបរពីរនាក់ ម្នាក់ឈ្មោះ សន សាវុធ អាយុ២០រស់នៅក្នុងស្រុស្នួល ខេត្តក្រចេះ និងម្នាក់ទៀតឈ្មោះ ហាយ តាក់ អាយុ១៩ ឆ្នាំ រស់នៅឃុំតាលុង ស្រុកមេម៉ត់ ខេត្តត្បូងឃ្មុំ ។
ភាពអនាធិប្បតេយ្យក្នុងការដឹកជញ្ជូនឈើខុស ច្បាប់កំពុងតែកើតមានយ៉ាង កក្រើកទាំងយប់ទាំងថ្ងៃនៅក្នុងស្រុកសំបូរ និង ស្រុកចិត្របូរីខណះដែលសមត្ថកិច្ចជំនាញរដ្ឋបាលព្រៃឈើមួយចំនួនឆ្លើយថាគ្មានកម្លាំងបង្ក្រាបនោះ ដោយឡែកក្នុងអំឡុងរយះពេលជាង២ខែមកនេះ បន្ទាប់ពីលោក ប៊ួយ រតនា ឡើងកាន់តំណែងជានាយផ្នែករដ្ឋបាលព្រៃឈើក្រចេះ គេនៅមិនទាន់ឃើញលោកនាយផ្នែកបញ្ចេញកណ្តាប់ដៃចាត់វិធានការណាមួយបង្ក្រាបទប់ស្កាត់ នូវការដឹកជញ្ជូនឈើអនាធិប្បតេយ្យក្នុងដែនសមត្ថកិច្ចខ្លួននោះឡើយ ។
