ភ្នំពេញ ៖ បុរសម្នាក់ស្រវឹងស្រាជោកជាំបានបើករថយន្តឡិចស៊ីស ៤៧០មួយគ្រឿងរេចង្កូតទៅបុករីម៉កម៉ូតូលក់នំបុ័ងសាច់ ដួលកៀបជាប់ពីក្រោមរថយន្តអូសប្រហែល១០ម៉េត្រ បណ្តាលឱ្យរងរបួសធ្ងន់ម្នាក់ ចំណែករថយន្តកល់ជាប់ជាមួយនិងម៉ូតូទៅមុខលែងរួច ។
ហេតុការណ៍នេះបានកើតឡើងកាលពីវេលាម៉ោង ១០ និង៥០នាទីយប់ ថ្ងៃទី ២៥ ខែសីហា ឆ្នាំ២០១៤ នៅចំណុចមុខហាង BNK អូតូផាត លក់គ្រឿងបន្លាស់រថយន្តគ្រប់ប្រភេទ តាមបណ្តោយផ្លូវលេខ៥៩៨ ស្ថិតក្នុងភូមិទួលគោកសង្កាត់ទួលសង្កែ ខណ្ឌឬស្សីកែវ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្តឡិចស៊ីស៤៧០ ពណ៌ខ្មៅមួយគ្រឿងបើកដោយបុរសស្រវឹងស្រាជោកជាំម្នាក់ដោយធ្វើដំណើរយ៉ាងលឿនតាមផ្លូវលេខ៥៩៨ ក្នុងទិសដៅពីត្បូងទៅជើង ខណៈមកដល់ចំណុចកើតហេតុក៏បានបើកវ៉ារថយន្តមួយគ្រឿងទៀតនៅពីមុខ រួចរេចង្កូតទៅបុកចំពីមុខរីម៉កម៉ូតូលក់នំបុ័ងសាច់ពេញទំហឹងបណ្តាលឱ្យដួលម៉ូតូ កៀបជាប់ ក្រោមរថយន្តអូសចម្ងាយប្រហែល១០ម៉ែត្រ រងរបួសធ្ងន់ម្នាក់និងជ្រុះនំបុ័ងធ្លាក់រាយប៉ាយពេញផ្លូវ ចំណែកឯរថយន្តគល់ជាប់និងម៉ូតូបើកទៅមុខមិនរួច ។
ក្រោយពេលកើតហេតុជនរងគ្រោះត្រូវបានរថយន្តសាមុដឹកយកទៅសង្គ្រោះបន្ទាន់នៅឯមន្ទីរពេទ្យ ចំណែកឯរថយន្តនិងរីម៉កម៉ូតូលក់នំបុ័ងត្រូវបានសមត្ថកិច្ចចុះមកធ្វើការវាស់វែងយករថយន្តបង្ក ទៅរក្សាទុកនៅអធិការដ្ឋានខណ្ឌឬស្សីកែវដើម្បីដោះស្រាយគ្នាតាមផ្លូវច្បាប់ ៕
