ខេត្តព្រះវិហារ បញ្ហាអសន្ដិសុខរួមមានការប្រើកាំភ្លើងAKបាញ់បោះអនាធិបតេយ្យកក្រើកភូមិចំនួន២៧គ្រាប់នៅហាងជំនោរដងស្ទឹងអំពើចោរកម្មលួចម៉ូតូរបស់ប្រជាពលរដ្ឋសរុបប្រមាណ៤៤គ្រឿងក្រុមចោរធ្វើសកម្មភាពប្លន់ប្រើកាំភ្លើងAKនៅតំបន់រមណីយ៍ដ្ឋានធម្មជាតិទំនប់៩៥កាលពីឆ្នាំ២០១៣មកដល់ពេលនេះអាជ្ញាធរមានសមត្ថកិច្ចទាំងអស់មិនទាន់ប្រឹងប្រែងចាប់ខ្លួនជនល្មើសបាននៅទ្បើយទេ។
តាមការពិនិត្យជាក់ស្តែងឃើញថាក្បាលម៉ាស៊ីនអាជ្ញាធរមានសមត្ថកិច្ចនៅខេត្តព្រះវិហារសព្វថ្ងៃនេះផ្តោតការយកចិត្តទុកដាក់ខ្លាំងទៅលើផលប្រយោជន៍ផ្ទាល់ខ្លួននិងអង្គភាពរៀងៗខ្លួនប៉ុណ្ណោះដូចជាការប្រមូលលុយពីការដឹកជញ្ជូនបទល្មើសព្រៃឈើគ្រប់ច្រកល្ហកនិងបណ្តោយអោយសមត្ថកិច្ចក្រោមឱវាទស៊ីឈ្នួលកាងផ្លូវជាតិលេខ៦២អោយថៅកែគ្រញូងទុច្ចរិតថែមទៀត។
ប្រជាពលរដ្ឋមួយចំនួនបានសម្តែងមតិប្រាប់អ្នកសារព័ត៌មានថាដោយសារអស់លោកសមត្ថកិច្ចមានអំណាចបុណ្យសក្តិមួយក្ដាប់តូចសប្បាយតែខាងកើបលុយពីសកម្មភាពដឹកជញ្ជូនឈើប្រណីតគ្រញូងបេងធ្នង់នាងនួនគ្រប់ទិសទីកន្លែងដោយខុសច្បាប់នោះគឺធ្វើអោយមានការធ្លាក់ចុះខ្សោយខ្លាំងក្នុងកាតព្វកិច្ចបំរើការពារសន្ដិសុខ២៤ម៉ោងលើ២៤ម៉ោងជូនប្រជាជននៅទូទាំងខេត្តព្រះវិហារ។ ប្រជាពលរដ្ឋនិយាយថាបញ្ហាអាក្រក់អស់ទាំងនេះមិនចាំបាច់ពួកគាត់ធ្វើប្រជាមតិរិះគន់នោះទេគឺលោកអភិបាលខេត្តព្រះវិហារនិងគណះបញ្ជាការឯកភាពខេត្តទាំងអស់ពិតជាបានដឹងច្បាស់ថាពួកខ្លួនកំពុងធ្វើអ្វីសព្វថ្ងៃនេះ។ 
ប្រជាពលរដ្ឋខ្លះថ្លែងអោយដឹងថាអស់លោកមានអំណាចបុណ្យសក្ដិខ្លាំងក្នុងខេត្តព្រះវិហារទាំងអស់គួរភ្ញាក់រលឹកនាំគ្នាគិតថ្លឹងថ្លែងដោយមនសិការបំរើប្រយោជន៍ជូនប្រជាជនទៅមើលរវាងកាតព្វកិច្ចបំរើផលប្រយោជន៍ជូនប្រជាជននិងការកេងប្រវ័ញ្ជលាភសក្ការះខុសច្បាប់មកធ្វើជាផលប្រយោជន៍បុគ្គលខ្លួនឯងនិងអង្គភាពវាកំពុងលំអៀងទៅខាងផលប្រយោជ៍ណាមួយពិតប្រាកដ។ជារៀងរាល់ថ្ងៃសមត្ថកិច្ចជាច្រើនស្ថាប័នមួយចំនួនខំប្រឹងយកចិត្តទុកដាក់តែខាងត្រួតពិនិត្យរថយន្ដដឹកបទល្មើសព្រៃឈើនៅតាមផ្លូវជាតិលេខ៦២និងច្រករបៀងផ្សេងទៀតតែប៉ុណ្ណោះប៉ុន្តែបើក្រទ្បេកទៅមើលតាមគោលដៅការពារសន្ដិសុខជូនប្រជាជននៅតាមមូលដ្ឋានគឺមានសភាពស្ងាត់ជ្រងំ។
ប្រជាពលរដ្ឋមួយចំនួនក្នុងក្រុងព្រះវិហារបានបញ្ចេញទស្សនះរិះគន់ថាអស់រយះពេលច្រើនឆ្នាំមកនេះសមត្ថកិច្ចកងរាជអាវុធហត្ថខេត្តព្រះវិហារល្បីល្បាញខាងស៊ីឈ្នួលកាងផ្លូវជាតិលេខ៦២អោយថៅកែគ្រញូងទុច្ចរិត,រកស៊ីដឹកឈើប្រណីតខុសច្បាប់ដោយខ្លួនឯងតាំងពីសម័យលោកយន់គាអតីតមេប៉េអឹមខេត្តហើយមកដល់សម័យលោកកងសៅគុណរូបនេះបន្តវេនដឹកនាំបន្ទាយខ្លាំងលើសដើម។
ជាពិសេសសម័យលោកកងសៅគុណនេះកូនចៅក្រោមឱវាទរបស់ខ្លួនដោយអាងអំណាចបុណ្យសក្តិមេកាងពីក្រោយខ្នងយ៉ាងរឹងមាំនោះគឺកូនចៅខ្លះមានចរិតព្រហើនកោងកាចហ៊ានប្រើអំពើហិង្សាវាយដំធ្ងន់ធ្ងរទៅអ្នកកាសែតប្រចាំថ្ងៃថែមទៀតដែលអ្នកប្រព្រឹត្តមានឈ្មោះទ្បាយសុភាពនិងឈ្មោះគង់ធារិទ្ធហៅឆ្លាម។ ថ្មីៗនេះប្រជាពលរដ្ឋមានការព្រួយបារម្ភខ្លាំងពីសន្ដិសុខក្នុងមូលដ្ឋានបានរាយការណ៍ប្រាប់អ្នកសារព័ត៌មានថាល្បែងចាក់ឆ្នោតកន្ទុយលេខបានរីករាលដាលខ្លាំងនៅទូទាំងខេត្តព្រះវិហារពីមួយថ្ងៃទៅមួយថ្ងៃ។
អ្នកចាក់ភ្នាល់ឆ្នោតកន្ទុយលេខនេះនាំគ្នាចាក់ភ្នាល់លុយច្រើនៗអាចនឹងធ្វើអោយចាញ់ល្បែងហើយធ្លាក់ខ្លួនក្នុងភាពក្រីក្រក្នុងគ្រួសារជាមិនខាន។ប្រជាពលរដ្ឋរស់នៅតាមមូលដ្ឋានព្រួយបារម្ភខ្លាំងអំពីការកើតមានអំពើចោរកម្មលួចឆក់ប្លន់ព្រោះតែកើតមានល្បែងស៊ីសងខុសច្បាប់កាន់តែច្រើនទ្បើងៗដោយគ្មានការបង្ក្រាបទប់ស្កាត់ពីលោកអ៊ុំម៉ារ៉ាអភិបាលខេត្តព្រះវិហារ។
ប្រភពព័ត៌មានពីប្រជាពលរដ្ឋបានបង្ហើបអោយដឹងច្បាស់ថាមេកន្ទុយលេខធំជាងគេនៅក្នុងទីរួមខេត្តព្រះវិហារមានទី១ស្ដ្រីឈ្មោះផារីនិងទី២បុរសឈ្មោះលីគឺបើកអោយចាក់ភ្នាល់លុយតាមចិត្តរីឯសមត្ថកិច្ចគ្រប់ស្ថាប័ននាំគ្នាបិទមាត់សម្ងំឈឹង។បញ្ហាអាក្រក់ទាំងអស់ខាងលើនេះសុទ្ធតែជាក្ដីកង្វល់ទុក្ខព្រួយរបស់ប្រជាពលរដ្ឋនិងសុទ្ធតែជាទស្សនះរិះគន់ដល់ក្បាលម៉ាស៊ីនអាជ្ញាធរមានសមត្ថកិច្ចទាំងអស់អោយធ្វើការកែលម្អសំរាប់បុគ្គលនិងអង្គភាពផ្ទាល់បើអាចធ្វើទៅបានកាន់តែឆាប់កាន់តែល្អ៕
