សៀមរាប : លោកវរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានឲ្យដឹងថាជនសង្ស័យភេទប្រុសទាំង៤នាក់នេះម្នាក់មានស្រុកកំណើតនៅក្នុងខេត្តសៀមរាប ម្នាក់មានស្រុកកំណើតនៅខេត្តកំពង់ចាម ម្នាក់នៅខេត្តកណ្តាលនិងម្នាក់ទៀតនៅខេត្តកំពង់ឆ្នាំង បច្ចុប្បន្នមករស់នៅក្នុងក្រុងសៀមរាបត្រូវបានកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបសហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្លក្រាមក្រុងសៀមរាប ធ្វើការចាប់ឃាត់ខ្លួនក្នុងក្រុងសៀមរាបបានជាបន្តបន្ទាប់រួចយកមកកាន់ការិយាល័យនគរបាលជំនាញដើម្បីធ្វើការសួរនាំជាប់ពាក់ព័ន្ធក្នុងករណីប្រើប្រាស់និងជួញដូរគ្រឿងញៀនខុសច្បាប់ ។
លោកវរសេនីយ៍ទោ អ៊ុំ សាអាត បានបន្តឲ្យដឹងទៀតថាដោយអនុវត្តជាប្រចាំតាមការយកចិត្តទុកដាក់ខ្ពស់ពីសំណាក់លោក ឩត្តមសេនីយ៍ទោ សត ណាឌីស្នងការនគរបាលខេត្តសៀមរាបក៏ដូចជាដើម្បីធ្វើឲ្យការអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ ។ជាក់ស្តែងនៅថ្ងៃទី២៣ ដល់២៤ ខែសីហាឆ្នាំ២០១៤ កន្លងទៅកម្លាំងការិយាល័យជំនាញរបស់លោកបានធ្វើការតាមដានស្រាវជ្រាវនិងឈានដល់ការបង្ក្រាបចាប់ឃាត់ខ្លួនជនសង្ស័យភេទប្រុសទាំង៤នាក់នេះបានជាបន្តបន្ទាប់ព្រមទាំងវត្ថុតាងម៉ាទឹកកក ១ កញ្ចប់ ទម្ងន់ ០,១ក្រាម ម៉ូតូ ពីរគ្រឿង ទូរស័ព្ទដៃ៣គ្រឿង និង ឩបករណ៍ច្នៃជក់គ្រឿងញៀនខុសច្បាប់មួយចំនួនទៀត ។ 
បន្ទាប់ពីសមត្ថកិច្ចជំនាញបានធ្វើការចាប់ឃាត់ខ្លួនជនសង្ស័យនិងធ្វើការដកហូតបាននូវវត្ថុតាងទាំងអស់នេះហើយនោះនៅមុខសមត្ថកិច្ចជនសង្ស័យបានឆ្លើយសារភាពថាពួកគេពិតជាបានប្រព្រត្តឹនៅករណីទាំងអស់ខាងលើពិតប្រាកដមែន។បច្ចុប្បន្នជនសង្ស័យនិងវត្ថុតាងត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបហើយកាលពីរសៀលថ្ងៃទី២៦ខែសីហាឆ្នាំ២០១៤នេះដើម្បីចំណាត់ការទៅតាមផ្លូវច្បាប់ ៕ ដោយ លោក ខេង ខេមរា
