ភ្នំពេញ : ជនសង្ស័យ២នាក់ ត្រូវបានប្រជាពលរដ្ឋដេញចាប់បាន ពីបទ ឆក់ទូរស័ព្ទ iPhone5 នេៅចំណុចផ្លូវលេខ៤៣២ កែងផ្លូវលេខ៩៥ សង្កាត់បឹងត្របែក ខណ្ឌចំការមន កាលពីវេលា៦ល្ងាច ថ្ងៃទី២១ ខែកុម្ភ: ឆ្នាំ២០១៣ បន្ទាប់ពីបានធ្វើសកម្មភាព ឆក់ទូរស័ព្ទពីនារីម្នាក់ ដែលកំពុងឈប់ចុចទូរស័ព្ទតាមដងផ្លូវ ។
ជនជាប់សង្ស័យទាំងនាក់នេះឈ្មោះ សេង សភ័ក្រ អាយុ ២២ឆ្នាំ ស្នាក់នេៅភូមិសន្សំកុសល សង្កាត់បឹងទំពុន ខណ្ឌ ចំការមន ជានិស្សិតសាលាច្បាប់ និងម្នាក់ទៀត ឈ្មោះ សំ កុសល ភេទប្រុស អាយុ ១៩ឆ្នាំ ស្នាក់នៅផ្ទះជួល ភូមិសន្សំកុសល សង្កាត់បឹងទំពុន ខណ្ឌមានជ័យ ។ ជនសង្ស័យជិះម៉ូតូ ស្កុបពី ពណ៌ផ្ទៃមេឃ ពាក់ស្លាកលេខ ភ្នំពេញ 1BN-6270 ។ ចំណែកឯនារី ម្ចាស់ទូរស័ព្ទឈ្មោះ អៀ សាលីណា អាយុ២៣ឆ្នាំ មានទីលំនេៅសង្កាត់ទន្លេបាសាក់ ខណ្ឌចំការមន ។
តាមប្រភពព័ត៌មានការចាប់ខ្លួន ខាងលើនេះ បានឲ្យដឹងថា ដំបូងឡើយនារីរងគ្រោះ បានជិះម៉ូតូស្កុបពី តាមបណ្តោយផ្លូវលេខ៦៣ មកដល់ផ្លូវលេខ៤៣២ ត្រង់តូបលក់កាសែត ក៏ឈប់ម៉ូតូដើម្បីទិញកាតទូរស័ព្ទ ខណ:នារីរងគ្រោះ ដកទូរស័ព្វ ម៉ាក iPhone5 ហើយកំពុងចុចបញ្ចូលទឹកប្រាក់នោះ ស្រាប់តែមានជនសង្ស័យ២នាក់ ជិះម៉ូតូស្កុបពីមកអែប ហើយជនសង្ស័យម្នាក់ ឈ្មោះ សំកុសល លោតចុះពីលើម៉ូតូ ស្ទុះទៅឆក់ ទូរស័ព្ទពីនារីរងគ្រោះ ហើយជិះរត់មកដល់ចំណុចកើតហេតុ ជនសង្ស័យក៏ដួលម៉ូតូ ស្របនារីរងគ្រោះស្រែកចោរតាមពីក្រោយផងនោះ ផ្អើលដល់ប្រជាពលរដ្ឋ និងសមត្ថកិច្ចចាប់ជាប់តែម្តង។
ដោយមានវត្ថុតាង និងសាក្សី ជនសង្ស័យត្រូវបញ្ជូនទៅ កាន់អធិការដ្ឋាន នគរបាល ខណ្ឌចំការមន ដើម្បីចាត់ការ តាមនិតិវិធីច្បាប់ ប៉ុន្តែក្រោយការឃាត់ខ្លួនជនទាំង២នាក់គេសង្កេតឃើញមានរថយន្តសេរីទំនើប២ទៅ៣គ្រេឿងមកដល់អធិការដ្ឋាននគរបាលខណ្ឌចំការមនក្នុងនោះក៏លេចលឺថាមានថ្នាក់ឧត្តមសេនីយ៍ចូលរួមរត់ការដើម្បីរំដោះជនសង្ស័យ២នាក់នេះឲ្យនៅក្រៅឃុំ។
ជុំវិញហេតុការណ៍ឃាត់ខ្លួនចោរឆក់កាបូបអ្នកដំណើរខាងលើនេះ ប្រជាពលរដ្ឋបាននាំគ្នារិះគន់សមត្ថកិច្ចនគរបាលប៉ុស្តិ៍បឹងត្របែក ក៏ដូចជានគរបាលផ្នែកព្រហ្មទណ្ឌចំការមនថា មានការយឺតយ៉ាវ ស្ពឹកស្រពន់ ក្នុងការចុះអន្តរាគមន៍ឃាត់ជនសង្ស័យដែលជាចោរឆក់កាបូប ។
ហើយចំពោះករណីឃាត់ខ្ឡួនជនសង្ស័យទាំងពីរនាក់ខាងលើនេះ ប្រសិនបើគ្មានការស្វះស្វែង ស្ម័គ្រចិត្ត សាមគ្គី គ្នាពីសំណាក់ប្រជាពលរដ្ឋ និងអ្នកដំណើរជួយអន្តរាគមន៍ចាប់ឃាត់ខ្ឡួនជនសង្ស័យទេ ម្ល៉េះចោរឆក់ទាំងពីរនាក់ខាងលើនេះ ច្បាស់ជារត់គេចខ្លួនមិនដឹងដល់ទីណាទៅហើយទេ ។ ដូច្នេះប្រជាពលរដ្ឋស្ទើរនឹងអស់សង្ឃឹមចំពោះទង្វើដឹកនាំនិងបង្ក្រាបបទល្មើសរបស់នគរបាលប៉ុស្តិ៍បឹងត្របែក និងនគរបាលផ្នែកព្រហ្មទណ្ឌខណ្ឌចំការមន ។
អ្វីដែលជាទង្វើផ្ទុយជាងនេះទៅទៀតនោះ គឺក្រោយពេលដែលឃាត់ខ្លួនជនសង្ស័យទៅស្នាក់ការនគរបាលប៉ុស្តិ៍ខណ្ឌចំការមនហើយ បែរជាមានការអន្តរាគមន៍ពីថ្នាក់ឧត្តមសេនីយ៍ និងលោក អធិការរងនគរបាលខណ្ឌចំការមនទទួលបន្ទុកផ្នែកព្រហ្មទណ្ឌ ហាមឃាត់បណ្តាញផ្សព្វផ្សាយមិនឲ្យធ្វើការចាក់ផ្សាយរូបភាពជនសង្ស័យទាំងពីររូប ដោយសារជាប់ខ្សែរស្រលាយជាមួយអ្នកធំ ។
សូមបញ្ជាក់ថា កន្លងមកជនសង្ស័យជាចោរឆក់កាបូប និងសម្ភារៈប្រជាពលរដ្ឋតាមដងផ្លូវ ហើយត្រូវបានប្រជាពលរដ្ឋចាប់ប្រគល់ខ្លួនឲ្យនគរបាលខណ្ឌចំការមន តែងធ្វើការអន្តរាគមន៍ដោះលែងជាញឹកញាប់ ដូច្នេះហើយទើបបានជាមុខសញ្ញាប្រព្រឹត្តិពទល្មើសសកម្មភាពឆក់នៅក្នុងភូមិសាស្ត្រខណ្ឌចំការមន កើតឡើងខ្លាំងក្លាជាបណ្តាខណ្ឌនានា ទាំងអស់នៅក្នុងរាជធានីភ្នំពេញ ។
ជាមួយបាតុភាពនេះដែរ ប្រជាពលរដ្ឋបានសំណូមពរ ទៅលោកនាយឧត្តមសេនីយ៍ អគ្គស្នងការនគរបាលជាតិ និងលោកស្នងការនគរបាលរាជធានីភ្នំពេញ គួរពិនិត្យមើលសកម្មភាពបង្ក្រាបបទល្មើសនិងកិច្ចការការពារសន្តិសុខ ក្នុងភូមិសាស្ត្រខណ្ឌចំការមនពីសំណាក់ថ្នាក់អធិការនគរបាលខណ្ឌចំការមន ឬ ក៏អធិការរងទទួលជំនាញខណ្ឌចំការមនឡើងវិញ ដើម្បីទប់ស្កាត់បទល្មើសកុំឲ្យចេះតែកើតមានតទៀតនៅក្នុងភូមិសាស្ត្រមួយនេះ ៕ 
