ខេត្តស្ទឹងត្រែង៖ ផ្លូវនិងស្ពាន គឺជាសរសៃឈាម នៃសេដ្ឋកិច្ចជាតិ និងគ្រួសារ បើមានផ្លូវប្រាកដជាមានក្តីសង្ឃឹម នេះជាការលើកឡើងរបស់ អភិបាលខេត្តស្ទឹងត្រែង លោក ស្វាយ សំអ៊ាង ក្នុងពេលដែលលោក និងលោក ឈាង ឡាក់ ប្រធានក្រុមប្រឹក្សាខេត្ត ដឹកនាំមន្ត្រីជំនាញ និងអាជ្ញាធរមូលដ្ឋាន ចុះពិនិត្យការដ្ឋានស្ថាបនាផ្លូវលំជនបទ ១ខ្សែ មានប្រវែង ១៥ គីឡូម៉ែត្រ ដែលក្រុមមន្ត្រីជំនាញមន្ទីរអភិវឌ្ឍន៍ជនបទខេត្ត ទើបនឹងបញ្ចប់ក្នុងការស្ថាបនា នៅក្នុងរយៈពេលកន្លងមកនេះ។ ការចុះពិនិត្យផ្លូវលំ ១ខ្សែនេះ បានធ្វើឡើងកាលពីថ្ងៃទី១១ធ្នូឆ្នាំ២០២១ នៅក្នុងស្រុកសៀមបូក ខេត្តស្ទឹងត្រែង។
ប្រធានមន្ទីរអភិវឌ្ឍន៍ជនបទខេត្តស្ទឹងត្រែង លោក ព្រំ ចន្ថា បានបញ្ជាក់ថា ផ្លូវលំ ១ខ្សែនេះ គឺជាអំណោយដ៏ថ្លៃថ្លារបស់ រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ និងក្រសួងអភិវឌ្ឍន៍ជនបទ លើគម្រោងសាច់ប្រាក់ពលកម្ម សម្រាប់អភិវឌ្ឍន៍ហេដ្ឋារចនាសម្ព័ន្ធជនបទ និងការគាំទ្រកសិករ ។ ហើយផ្លូវ ១ខ្សែនេះ មានប្រវែង ១៥គីឡូម៉ែត្រ និងទំហំទទឹង ៦ម៉ែត្រ សង់តភ្ជាប់ពីឃុំអូរម្រះ ដល់ឃុំសៀមបូក ស្រុកសៀមបូក ខេត្តស្ទឹងត្រែង នៅជិតព្រំប្រទល់ខេត្តក្រចេះ និងផ្លូវនេះ ទើបត្រូវបានបញ្ចប់ក្នុងការស្ថាបនា នាពេលកន្លងទៅថ្មីៗនេះ។
អភិវាលខេត្តស្ទឹងត្រែង លោក ស្វាយ សំអ៊ាង បានថ្លែងថា នេះជាសមិទ្ធិផលដ៏សំខាន់មួយទៀត ដែលស្រុកសៀមបូក ទទួលបានជាអំណោយដ៏ថ្លៃថ្លារបស់ រាជរដ្ឋាភិបាល ក្រោមការដឹកនាំរបស់ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ដែលបានផ្តល់ជូនប្រជាពលរដ្ឋ តាមរយៈមន្ទីរអភិវឌ្ឍន៍ជនបទខេត្ត ដើម្បីបង្កលក្ខណៈងាយស្រួលកាន់តែច្រើនសម្រាប់ប្រជាពលរដ្ឋក្នុងមូលដ្ឋាន បានធ្វើដំណើរ និងដឹកជញ្ជូនដំណាំកសិកម្ម និងកសិផលនានា ពីទីជនបទដាច់ស្រយាល មកកាន់ទីផ្សារបានយ៉ាងឆាប់រហ័ស។
លោក ស្វាយ សំអ៊ាង បានថ្លែង ចាត់ទុកផ្លូវនិងស្ពាន គឺជាសរសៃឈាម នៃសេដ្ឋកិច្ចជាតិ និងគ្រួសារ បើមានផ្លូវ គឺមានក្តីសង្ឃឹម ហើយការធ្វើផ្លូវទាំងនេះ គឺពិតជាបានបំពេញនូវសេចក្តីត្រូវការ របស់បងប្អូនប្រជាពលរដ្ឋ ងាយស្រួលក្នុងការធ្វើចរាចរណ៍ ក៏ដូចការចេញប្រកបរបរ ដើម្បីទ្រទ្រង់ក្នុងជីវភាពរស់នៅប្រចាំថ្ងៃ ជាពិសេស បានផ្តល់នូវភាពងាយស្រួលដល់សិស្សាសិស្ស បានធ្វើដំណើរងាយស្រួល ទៅមកសាលារៀន ស្ត្រីមានផ្ទៃពោះទៅកាន់មណ្ឌលសុខភាព បានយ៉ាងទាន់ពេលវេលា ផងដែរ៕
