បន្ទាយមានជ័យ៖ពិធីពុទ្ធាភិសេកនេះជាប្រពៃណី ដែលពុទ្ធបរិស័បានធ្វើអស់កាលយូរអង្វែងមកហើយ នឹងជាប់មានដរាបមកដល់យើងសព្វថ្ងៃនេះ។ជាស្ដែង នាចុងសប្ដាហ៍កន្លងទៅ 
នៅវត្តនិមិត្តសុធីរាម(កូនដំរី) សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានប្រារព្ធពិធីបុណ្យពុទ្ធាភិសេកព្រះពុទ្ធទ្រង់បាត្រ និង អគ្គសាវ័កចំនួន៥៨ព្រះអង្គ ។
ពិធីបុណ្យមួយនេះ ត្រូវបានប្រារព្ធឡើងក្រោមគំនិតផ្ដួចផ្តើម ដោយលោកឧកញ៉ា ឡាច ប៊ុនលីម និងលោកជំទាវ លោកគ្រូចិនសែ អ៊ុង ផាន់ណារឹទ្ធ លោកស្រី សៅ សុទ្អា ព្រមទាំងបុត្រ និងសប្បុ រសជនជាច្រើននាក់ទៀត បានចូលរួមក្នុងពិធីនោះយ៉ាងច្រើនកុះករ ។
ការរៀបចំពិធីបុណ្យពុទ្ធាភិសេកនេះ គឺជាការបញ្ជាក់នូវដំណាក់កាលព្រះប្រសូត្រ និងដំណាក់កាលព្រះវិន័យហើយក៏ស្របទៅនឹងការរីកចម្រើននិងសុខសន្តិភាពពេញផ្ទៃប្រទេសក្រោមការដឹកនាំ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានជំរុញឱ្យមានការអភិវឌ្ឍន៍ទាំងវិស័យពុទ្ធចក្រ និងអាណាចក្រ។
ការចំណាយប្រាក់ផ្ទាល់ខ្លួនយ៉ាងច្រើនកសាងសមិទ្ធផលថ្មីក្នុងវិស័យព្រះពុទ្ធសាសនា គឺជាការបញ្ជាក់ពីការរីកចម្រើនបន្ថែមទៀត ក្នុងវិស័យព្រះពុទ្ធសាសនា ពិសេសជួយឲ្យវត្តកាន់តែមានសោភ័ណភាពស្រស់ស្អាត ស័ក្តិសមជាកន្លែងគោរពបូជារបស់ពុទ្ធបរិស័ទ ព្រមទាំងចូលរួមចំណែកលើកស្ទួយវិស័យព្រះពុទ្ធសាសនានៅខេត្ត ក៏ដូចជាប្រទេសកម្ពុជាឲ្យកាន់តែរីកចម្រើនឡើង៕ដោយ៖ ឃិន គន្ធា
