ភ្នំពេញ ៖ យុវជន២នាក់ស្រវឹងស្រាជោកជាំជិះម៉ូតូម៉ាកឌ្រីមC125 ពណ៌ខ្មៅ១គ្រឿង បើកគេចពីកង់មួយគ្រឿងហើយក៏ជ្រុលទៅបុករះម៉ូតូ២គ្រឿងដែលចតនៅមុខចិញ្ចើមផ្លូវ រួចអូសទៅបុកហាងស៊ុប៥១ លក់គ្រឿងក្លែមបណ្តាលឲ្យរងការខូចខាតខ្ទេចអស់កាលពីវេលាម៉ោង១០និង១៥នាទី យប់ថ្ងៃទី២១ ខែកុម្ភៈ ឆ្នាំ២០១៤ តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់ទឹកថ្លាខណ្ឌសែនសុខ។
ប្រភពព៏ត៌មាននៅកន្លែងកើតហេតុបានឲ្យដឹងថា នៅមុនពេលគេបានឃើញយុវជន២នាក់បានជិះម៉ូតូមួយគ្រឿងម៉ាកឌ្រីមសងសេ១២៥ ពណ៌ខ្មៅ ស៊េរីឆ្នាំ២០០៦ ពាក់ស្លាកលេខ កំពត 1A-5462 បានធ្វើដំណើរតាមបណ្តោយមហាវិថីសហព័ន្ធរុស្ស៊ី ពីទិសដៅកើតទៅលិច ក្នុងល្បឿនលឿន ខណៈមកដល់ចំណុចកើតហេតុខាងលើដោយពួកគេជិះក្នុងល្បឿនលឿនពេកក៏វាក់អឺជាមួយនិងកង់មួយគ្រឿងដែលកំពុងធ្វើដំណើរស្របគ្នា
ហើយបានគេចចង្កូតម៉ូតូបណ្ដាលឱ្យទៅបុកនិងម៉ូតូ២គ្រឿងម៉ាកអាយខន ពណ៌ខ្មៅលាយទឹកក្រូច ពាក់ស្លាកលេខ ភ្នំពេញ 1AR-2389 និងមួយគ្រឿងទៀតម៉ាកវេវ ពណ៌ក្រហម ពាក់ស្លាកលេខ ភ្នំពេញ 1L-8429 ដែលលើចិញ្ចើមផ្លូវហើយក៏អូសទៅបុកនិងកន្លែងលក់ស៊ុបនិងគ្រឿងខ្លែមយីហោ ស៊ុប៥១ នៅជាប់និងផ្លូវនោះបណ្ដាលអោយខ្ទេចរងការខូចខាតស្ទើទាំងស្រុង ហើយចំណែកយុវជនជិះម៉ូតូបង្កហេតុនេះបានរងរបួសធ្ងន់និងស្រាលផងដែរ។ បន្ទាប់ពីកើតហេតុសមត្ថកិច្ចបានចុះវាស់វែងនិងនាំយកទៅអធិការដ្ឋាននគរបាលខណ្ឌសែនសុខដើម្បីធ្វើការដោះស្រាយ៕ 
