យោធារុស្ស៊ីចំនួន ១០នាក់ ត្រូវបានចាប់ឃុំខ្លួន នៅទីក្រុងដូណេតក៍ ភាគខាងកើតប្រទេស អ៊ុយក្រែន កាលពីថ្ងៃអង្គារ ស្របពេល ដែលភាពតានតឹងនៅទីនោះ មិនទាន់មាន ភាពស្រាកស្រាន បន្តិចឡើយ ។ សារព័ត៌មាន CNN របស់អាម៉េរិក បានចេញផ្សាយ នៅថ្ងៃពុធ ទី២៧ ខែសីហា នេះ ដោយដកស្រង់សម្តី ពីកងកម្លាំងសន្តិសុខ អ៊ុយក្រែនថា យោធារុស្ស៊ីខាងលើនេះ ត្រូវបានចាប់ខ្លួនដោយ រួមជាមួយនឹងឯក សារផ្សេងៗ ព្រមទាំងអាវុធ នៅក្នុងដៃរបស់ពួកគេថែមទៀត ។
ឆ្លើយតបទៅនឹងបញ្ហានេះ ទីក្រុងមូស្គូ បានធ្វើការច្រានចោលម្តងហើយ ម្តងទៀតថា ខ្លួនមិនបានបញ្ជូន យោធា និងអាវុធឆ្លងកាត់ព្រំដែនចូលទឹកដីអ៊ុយក្រែននោះទេ ហើយនៅភាគខាងកើតអ៊ុយក្រែននោះ គឺ ជាទីតាំងជម្លោះសុទ្ធសាធ រវាងក្រុមឧទ្ទាមផ្តាច់ខ្លួន ដែលគាំទ្ររុស្ស៊ី នឹង រដ្ឋាភិបាលអ៊ុយក្រែន ប៉ុណ្ណោះ។ 
ដោយឡែកការចាប់បាន ទាហានរបស់រុស្ស៊ីនេះ សារព័ត៌មានរដ្ឋរុស្ស៊ី RIA Novosti បានចេញផ្សាយថា ទាហានទាំងនោះ ទំនងជាកងកម្លាំងរុស្ស៊ី ដែលដើរយាមល្បាតតាមព្រំដែន ហើយពួកគេបានធ្លោយ ចូលទឹកដីរបស់អ៊ុយក្រែន ដោយអចេតនាប៉ុណ្ណោះ ព្រោះវាមិនមានខ្សែបន្ទាត់ណាមួយ ដែលបង្ហាញឲ្យ ជាក់ច្បាស់ពីទីដៅព្រំដែននោះឡើយ ។ គួរបញ្ជាក់ថា ឧប្បដិហេតុនេះ បានកើតឡើង ស្របពេលដែលប្រធានាធិបតីប្រទេសទាំងពីរ គឺលោក វ្លាឌីមៀ ពូទីន និង លោក ផេត្រូ ផរ៉ូហ្សេនកូ ជួបពិភាក្សាគ្នា ជាលើកដំបូងនៅប្រទេស បេឡារុស ហើយ ភាគីទាំងពីរបានបង្ហាញភាពវិជ្ជមាន ចំពោះកិច្ចពិភាក្សាគ្នានោះ ៕
