កំពង់ធំៈ ខេត្តកំពង់ធំ មានគឺជាខេត្តមួយដែលស្ថិតនៅចំកណ្តាល ព្រះរាជាណាចក្រកម្ពុជា និងមានរមណីយដ្ឋានប្រវត្តិសាស្ត្រ និងរមណីយដ្ឋានធម្មជាតិ ព្រមទាំងរមណីយដ្ឋានកែច្នៃ ក្នុងនោះមាន ភ្នំសន្ទុក ប្រាសាទសម្បូណ៌ព្រៃគុក បឹងសំរិទ្ធ ព្រៃប្រស់ សំពៅមាសសំពៅប្រាក់គ្រប់រមណីយដ្ឋានសុទ្ធតែមានភាពទាក់ទាញ និងមានសម្រស់ស្រស់ស្អាត តាមចំណងចំណូលចិត្តរបស់ភ្ញៀវជាតិ និងអន្តរជាតិ ។ 
ជាក់ស្តែងរមណីយដ្ឋានបឹងសំរិទ្ធ ស្ថិតនៅក្នុងស្រុកបារាយណ៍ ខេត្តកំពង់ធំមានព្រំព្រទល់ជាប់នឹង ខេត្តសៀមរាប នៅទិសពាយ័ព្យ ខេត្តព្រះវិហារ នៅទិសឧត្តរ ខេត្តក្រចេះ នៅទិសបូព៌ ខេត្តកំពង់ចាម និងទិសទក្សិណ ជាប់និងទន្លេសាប ខេត្តកំពង់ធំ មានផ្ទៃដី ១៣ ៨១៤ គ.ម.ផ្ទៃក្រឡា ដែលជាផ្ទៃក្រឡាធំទី២ បន្ទាប់ពីខេត្តមណ្ឌលគិរី ខេត្តមួយនេះមានចម្ងាយ ១៦៨ គីឡូម៉ែត្រពីរាជធានីភ្នំពេញ ។ 
ដោយឡែករមណីយដ្ឋាន បឹងសំរិទ្ធស្ថិតនៅក្នុងភូមិ ចុងដូង ឃុំចុងដូង ស្រុកបារាយណ៍ ខេត្តកំពង់ធំ មានផ្លូវ ចូលទៅរមណីយដ្ឋាន ពីថ្នល់ជាតិលេខ៦ ប្រមាណ៣គ.ម នៅក្នុងរមណីយដ្ឋានមានម្ហូបអាហារគ្រប់មុខ ព្រមទាំងសេវាកម្មបំរើភ្ញៀវទេសចរណ៍ល្អប្រណិត ជាពិសេសបឹងសំរិទ្ធគឺជារមណីយដ្ឋាន ដែលបានកសាងឡើង នូវរូបប្រាសាទ និងសារមន្ទីរ នៅកន្លែងល្បីៗជាច្រើន បានប្រមូលផ្តុំកសាងជា រូបសបនិមិន្ត នៅក្នុងរមណីយដ្ឋានបឹងសំរិទ្ធនេះ ដើម្បីឲ្យភ្ញៀវជាតិ និងអន្តរជាតិ ដែលបានអញ្ជើញមកទស្សនានៅទីនេះ មានអារម្មណ៍ថា ដូចបានទៅទស្សនាប្រាសាទល្បីនៅក្នុងព្រះរាជាណាចក្រកម្ពុជាផងដែរ ។
ភាពទាក់ទាញរបស់រមណីយដ្ឋានបឹងសំរិទ្ធ ក្រោយការច្នៃប្រឌិតរបស់ កូនខ្មែរសុទ្ធសាធ បានបង្កើតឲ្យមាន បឹងមួយនៅចំកណ្តាលរមណីយដ្ឋាន ដែលមានទឹកថ្លាត្រជាក់ មិនតែប៉ុណ្ណោះមានភ្នំចំឡង មានម៉ូតូទឹក ទូក កូនទា និងឧបករណ៍ជាច្រើនទៀតសម្រាប់ បំរើសេវាកម្មជូនភ្ញៀវទេសចរណ៍ ជាពិសេសមនុស្សជាច្រើន បានពិសោធន៍សមត្ថភាព និងការជិះទោទឹកចេញពីកំពូលភ្នំ ទម្លាក់ចូលបឹង និងការជិះខ្សែរ៉តទម្លាក់ខ្លួនពីកំពូលភ្នំ យ៉ាងសម្បាយនិងមានសុវត្តិភាព មួយរយភាគរយ ។ 
លោក សេង អាន ប្រធានមន្ទីរទេសចរណ៍ ខេត្តកំពង់ធំ បានមានប្រសាសន៍ថា រមណីយដ្ឋាន នៅក្នុងខេត្តកំពង់ធំសុទ្ធតែជារមណីយដ្ឋាន ដែលភាពភាពទាក់ទាញ គ្រប់វ័យ គ្រប់ភេទ តាមចំណូលចិត្ត សម្រាប់អ្នក ចូលចិត្តរមណីយដ្ឋាន បែបប្រវត្តិសាស្ត្រដែលមានការ ពាក់ព័ន្ឋទៅនឹងព្រះពុទ្ធសាសនា ក៏មានច្រើនកន្លែង ចំណែករមណីយដ្ឋានដែល បានកែច្នៃ និងកសាងឡើងក៏មាន ជាក់ស្តែងរមណីយដ្ឋាន បឹងសំរិទ្ធនេះ មាន ភ្ញៀវជាតិនិងអន្តជាតិជាច្រើន មកកំសាន្តទីនេះ ។
ដោយមានការគាំទ្រពីសំណាក់ លោក អភិបាលខេត្ត និងមន្ទីរទេសចរណ៍ បានជម្រុញឲ្យ មានការថែរក្សាសុវត្តិភាពជាចម្បងដល់ភ្ញៀវទេសចរណ៍ និងសូមឲ្យថែរក្សា អនាម័យ និងបរិស្ថាននៅទីនេះឲ្យបានល្អ សូមចោលសម្រាប់ក្នុងធុង ។ ដោយ ប៊ុន រដ្ឋា
