សៀមរាប : ជនសង្ស័យភេទប្រុសទាំង៤នាក់នេះត្រូវបានលោកវរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបសហការណ៍ជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្លក្រាម និង សង្កាត់គោកចកក្រុងសៀមរាប ធ្វើការតាមដានស្រាវជ្រាវនិងឈានដល់ការចាប់ឃាត់ខ្លួនបានជាបន្តបន្ទាប់រួចយកមកកាន់ការិយាល័យនគរបាលជំនាញដើម្បីធ្វើការសួរនាំជាប់ពាក់ព័ន្ធក្នុងករណីប្រើប្រាស់ ចាត់ចែង អោយប្រើប្រាស់និងជួញដូរគ្រឿងញៀនខុសច្បាប់ ។ 
លោកវរសេនីយ៍ទោ អ៊ុំ សាអាត បានឲ្យដឹងថាដោយអនុវត្តជាប្រចាំតាមការយកចិត្តទុកដាក់ខ្ពស់ពីសំណាក់លោក ឩត្តមសេនីយ៍ទោ សត ណាឌីស្នងការនគរបាលខេត្តសៀមរាបក៏ដូចជាដើម្បីធ្វើឲ្យការអនុវត្តនូវគោលនយោបាយភូមិឃុំមានសុវត្ថិភាពឲ្យកាន់តែមានប្រសិទ្ធភាពខ្ពស់ ។ជាក់ស្តែងនៅថ្ងៃទី២៧ ខែសីហាឆ្នាំ២០១៤ កន្លងទៅកម្លាំងការិយាល័យជំនាញរបស់លោកបានធ្វើការតាមដានស្រាវជ្រាវនិងឈានដល់ការបង្ក្រាបចាប់ឃាត់ខ្លួនជនសង្ស័យភេទប្រុសទាំង៤នាក់នេះបានជាបន្តបន្ទាប់ព្រមទាំងវត្ថុតាងម៉ាទឹកកក ៤ កញ្ចប់ មានទម្ងន់ ០,៣ក្រាម ម៉ូតូ ១គ្រឿង ទូរស័ព្ទដៃ៣គ្រឿង និង ឩបករណ៍ច្នៃជក់គ្រឿងញៀនខុសច្បាប់មួយចំនួនទៀត ។ 
បន្ទាប់ពីសមត្ថកិច្ចជំនាញបានធ្វើការចាប់ឃាត់ខ្លួនជនសង្ស័យនិងធ្វើការដកហូតបាននូវវត្ថុតាងទាំងអស់នេះហើយនោះនៅមុខសមត្ថកិច្ចជនសង្ស័យបានឆ្លើយសារភាពថាពួកគេពិតជាបានប្រព្រត្តឹនៅករណីទាំងអស់ខាងលើពិតប្រាកដមែន។សមត្ថកិច្ចបានបញ្ជាក់ថានៅថ្ងៃខែកើតហេតុខាងពួកគេបាននាំគ្នាទៅទិញថ្នាំញៀនទាំងអស់ពីបក្សរបស់ពួកគេនៅលើស្ពាននាគផ្លូវ៦០ម៉ែត ស្ថិតក្នុងសង្កាត់ស្លក្រាម រួចពួកគេក៏បាននាំគ្នាមកធ្វើសកម្មភាពជក់គ្រឿងញៀនទាំងអស់នេះនៅក្នុងវត្តគោកចក ស្ថិតនៅក្នុងសង្កាត់គោកចកក្រុងសៀមរាប ក៏ត្រូវបានសមត្ថកិច្ចធ្វើការចាប់ឃាត់បានតែម្តង ។
បច្ចុប្បន្នជនសង្ស័យនិងវត្ថុតាងត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបហើយនៅព្រឹកថ្ងៃទី២៩ខែសីហាឆ្នាំ២០១៤នេះដើម្បីចំណាត់ការទៅតាមផ្លូវច្បាប់ ៕ ដោយ លោកខេង ខេមរា
