ប្រទេស៣ នៅអាហ្វ្រិកខាងលិចរងការប៉ះពាល់ខ្លាំងដោយវីរុសអេបូឡា កាលពីថ្ងៃទី២៧ សីហា កាន់តែស្ថិតនៅឯកោពីពិភពលោក ព្រោះតែការឆ្លងរាលដាលនៃវីរុសនោះ ខណៈបណ្តាក្រុមហ៊ុនអាកាសចរណ៍ចុងក្រោយទាំងឡាយប្រកាសផ្អាកការហោះហើរ ទៅកាន់ប្រទេសទាំងនេះ ។ ខណៈដែលវីរុសអេបូឡាសម្លាប់មនុស្សជាង១.៤០០ នាក់ក្នុងចំណោមអ្នកឆ្លង២.៦១៥នាក់ក្នុងតំបន់នោះ ប្រទេសលីបេរីយ៉ាដែលរងការប៉ះពាល់ខ្លាំងជាងគេ នាយកមជ្ឈមណ្ឌលសហព័ន្ធអាមេរិកត្រួតពិនិត្យ និងបង្ការជំងឺ CDC លោក TOM FRIEDEN បានព្រមានថា តុល្យការប្រហែលជាមានខ្ពស់ជាងនេះទៀត ។
នៅទីក្រុងម៉ុនរ៉ូវីយ៉ា លោកថ្លែងថា ពិភពលោកពុំធ្លាប់ដែលជួបការឆ្លងរាលដាលយ៉ាងសាហាវនៃវីរុសអេបូឡា ដូចនេះឡើយ ។ ទោះជាតុល្យការពេលនេះមានខ្ពស់ ប៉ុន្តែយើងដឹងថា នៅមានអ្នកឆ្លងវីរុសនោះច្រើនជាងចំនួនដែលយើងធ្វើតេស្តឃើញ ។ លោកវេជ្ជបណ្ឌិត FRIEDEN ដែលទៅបំពេញបេសកកម្មក្នុងប្រទេសនេះចាប់តាំងពីច្រើនថ្ងៃមកហើយបន្ត ថា ចំនួនអ្នកឆ្លងមានការកើនឡើង ។
វីរុសអេបូឡាត្រូវបានប្រកាសពី ការឆ្លងរាលដាលកាលពីដើមឆ្នាំនេះនៅប្រទេសហ្គីណេ មុនពេលឆ្លងរាលដាលដល់ប្រទេសលីបេរីយ៉ា និងសេរ៉ាឡេអូន បន្ទាប់មកដល់នីហ្សេរីយ៉ា ។ ជំងឺអេបូឡាត្រូវបានកំណត់ឃើញកាលពីឆ្នាំ១៩៧៦ នៅសាធារណរដ្ឋប្រជាធិបតេយ្យកុងហ្គោ ដែលវាលេចជាថ្មីនៅទីនោះនាខែសីហានេះជាលើកទី៧ ។ យោងតាម តុល្យការចុងក្រោយរបស់អង្គការសុខភាពពិភពលោក WHO ថា វីរុសអេបូឡាមកទល់ពេលនេះសម្លាប់មនុស្ស១.៤២៧នាក់ ក្នុងនោះ៦២៤នាក់នៅលីបេរីយ៉ា ៤០៦នាក់នៅហ្គីណេ ៣៩២នាក់នៅសេរ៉ាឡេអូន និង៥នាក់នៅនីហ្សេរីយ៉ា ។
ប្រឈមមុខនឹងការឆ្លងរាលដាលកាន់តែខ្លាំងនៃជំងឺ នោះ ហើយដោយសារការបារម្ភកាន់តែខ្លាំងលើពិភពលោក ក្រុមហ៊ុន AIR FRANCE ប្រកាសផ្អាកបណ្តោះអាសន្នចាប់ពីថ្ងៃទី២៨ សីហាទៅ នូវការហោះហើរទៅកាន់ទីក្រុងហ្វ្រីថោន ប៉ុន្តែបន្តការហោះហើរទៅហ្គីណេ និងនីហ្សេរីយ៉ា យោងតាមអនុសាសន៍របស់រដ្ឋាភិបាលបារាំង ។ មកទល់ពេលនេះ នៅសល់ក្រុមហ៊ុនអាកាសចរណ៍តែ២ប៉ុណ្ណោះបន្តការហោះហើរទៅសេរ៉ាឡេ អូន និងលីបេរីយ៉ា គឺក្រុមហ៊ុន ROYAL AIR MAROC និងក្រុមហ៊ុន BRUSSELS AIRLINES ៕
