ប្រព័ន្ធលូចម្រោះទឹកសំណល់និងស្តារស្ទឹងសៀមរាប ខេត្តសៀមរាប ស្ថានីយ៏ប្រព័ន្ឋលូចម្រោះទឹកសំណល់ និងស្តារស្ទឹងសៀមរាប ខេត្តសៀមរាប ក្រោមឥណទានកម្ចីពីធនាគារអាហរណ៏ នីហរណ៏ នៃសាធារណរដ្ឋកូរ៉េ រួមនឹងថវិការរបស់រាជរដ្ឋាភិបាលកម្ពុជា ត្រូវបានសម្ភោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី២៨ ខែសីហា ឆ្នាំ២០១៤ ក្រោមអធិបតីភាពឯកឧត្តមឧបនាយករដ្ឋមន្ត្រីយឹម ឆៃលី ប្រធានក្រុមប្រឹក្សាស្តារអភិវឌ្ឍន៏វិស័យកសិកម្ម និងជនបទ ដោយមានការអញ្ជើញចូលរួមពី ឯ.ឧ ត្រាំ អ៊ីវតឹក រដ្ឋមន្ត្រីក្រសួងសាធារណៈ និងដឹកជញ្ជូន, ឯ.ឧ គីម ហានស៊ូ ឯកអគ្គរដ្ឋទូតសាធារណៈរដ្ឋកូរ៉េប្រចាំកម្ពុជា រួមនឹងតំណាងអង្គការគ័រកា, ឯកឧត្តមអភិបាលខេត្តសៀមរាប មន្ត្រីរាជការជុំវិញខេត្ត និងប្រជាពលរដ្ឋជាច្រើនរូបទៀត។
ឯ.ឧ ត្រាំ អ៊ីវតឹក បានមានប្រសាសន៏ថា ប្រព័ន្ឋរចនាសម្ព័នបង្ហូរទឹក និងចម្រោះទឹកនេះ ជាហេដ្ឋារចនាសម្ព័នមួយថ្មី មានសារៈប្រយោជន៏បំផុតសំរាប់ខេត្តសៀមរាប។ ប្រព័ន្ឋនេះ អាចគ្របដណ្តប់ និងបំរើឲ្យផ្នែកមួយយ៉ាងធំរបស់ខេត្តសៀមរាប គឺផ្នែកខាងកើតស្ទឹង និងផ្នែកខាងលិចស្ទឹងដែលស្របតាមតម្រូវការនៃការរស់នៅរបស់ប្រជាពលរដ្ឋ និងរួមចំណែកយ៉ាងធំធេងបំរើដល់វិស័យទេសចរណ៏ និងការអភិវឌ្ឍន៏ក្រុងសៀមរាប-អង្គរ ដែលជាបេះដូង និងជាព្រលឹងរបស់កម្ពុជា និងប្រជាពលរដ្ឋខ្មែរគ្រប់រូប។ ជាមួយគ្នានេះ ឯ.ឧ គីម ហានស៊ូ ឯកអគ្គរដ្ឋទូតសាធារណៈរដ្ឋកូរ៉េប្រចាំកម្ពុជា បានបញ្ជាក់ថា
កម្ពុជា និងសាធារណៈរដ្ឋកូរ៉េធ្លាប់មានទំនាក់ទំនងល្អនឹងគ្នាជាយូរមកហើយ ។ ជាងនេះទៅទៀត ឯកឧត្តម បានកត់់សម្គាល់ឃើញថា ប្រទេសកម្ពុជាសព្វថ្ងៃមានការវិវត្តន៏រីកចំរើនលើគ្រប់វិស័យយ៉ាងឆាប់រហ័ស ពិសេសខេត្តសៀមរាប់បានទទួលភ្ញៀវទេសចរណ៏កាន់តែច្រើនឡើងពីមួយឆ្នាំទៅមួយឆ្នាំ ។ ឯកឧត្តមសង្កត់ធ្ងន់ថា សាធារណៈរដ្ឋកូរ៉េ នឹងបន្តកិច្ចសហប្រតិបត្តិការល្អជាមួយកម្ពុជា និងផ្តល់ជំនួយបន្ថែមដល់កម្ពុជាជាបន្តទៀត។ ក្នុងឱកាសនោះ, ឯកឧត្តមឧបនាយករដ្ឋមន្ត្រី យឹម ឆៃលី បានមានប្រសាសន៏ថា ក្នុងនាមសម្តេច តេជោ ហ៊ុន សែន នាយករដ្ឋមន្ត្រី និងរាជរដ្ឋាភិបាល ព្រមទាំងប្រជាពលរដ្ឋកម្ពុជា សូមសំដែងនូវអំណរគុណដ៏ជ្រាលជ្រៅដល់រដ្ឋាភិបាល និងប្រជាជនកូរ៉េ ដែលតែងតែជួយផ្តល់នូវជំនួយជាថវិកាកម្ចី និងជាជំនួយឥតសំណងជាបន្តបន្ទាប់សំរាប់ការស្តារនិងអភិវឌ្ឍន៏ប្រទេសកម្ពុជា ការចលនាវិនិយោគិនកូរ៉េជាច្រើនមកបណ្តាក់ទុននៅកម្ពុជា រួមនឹងឥណទានកម្ចីសម្រាប់ការសាងសង់ស្ថានីយ៍ប្រព័ន្ធលូបង្ហូរទឹក
សំណល់ ដែលនឹងជួយបន្ថែមសមត្ថភាពទទួលសំអាតទឹកនៅភាគខាងកើត និងខាងលិចក្រុងសៀមរាបក្នុងរង្វង់រហូតដល់ ១០,៨៣ គ.ម រួមនឹងការស្តារស្ទឹងសៀមរាប ដែលបានបញ្ចប់ជាស្ថាពរ និងសម្ភោធដាក់ឲ្យប្រើប្រាស់ជាផ្លូវការនៅថ្ងៃនេះ។ ឯកឧត្តមឧបនាយករដ្ឋមន្ត្រី បន្តថា ប្រព័ន្ធលូចម្រោះទឹកសំណល់ពីការប្រើប្រាស់ គឺជាហេដ្ឋារចនាសម្ព័ន្ធដែលមានតួនាទីសំខាន់បំផុត ក្នុងបរិបទដែលប្រទេសកម្ពុជាកំពុងតែមានការអភិវឌ្ឍលើគ្រប់វិស័យ ហើយគម្រោងនេះបានរួមចំណែកលើកកំពស់ជីវភាពរស់នៅរបស់ប្រជាជនកម្ពុជា ធ្វើឲ្យការកាត់បន្ថយភាពក្រីក្រត្រូវបានធ្លាក់ចុះលើសពី១% ក្នុងមួយឆ្នាំៗ ស្របតាមចក្ខុវិស័យរបស់រាជរដ្ឋាភិបាលក្នុងយុទ្ធសាស្ត្រចតុកោណដំណាក់កាលទី២ និងទី៣ ពិសេសបានធ្វើឲ្យទីក្រុងនៃ
សម្បត្តិវប្បធម៌អង្គរដ៏យូរលង់របស់យើង និងជាបេតិកភណ្ឌពិភពលោកដ៏ល្បីល្បាញ បានកែប្រែមុខមាត់ថ្មីពីមួយថ្ងៃទៅមួយថ្ងៃ សក្តិសមជាទីក្រុងដ៏រុងរឿង របស់កម្ពុជា ដែលមានសក្តានុពលជំរុញកំណើនសេដ្ឋកិច្ចជាតិ និងសេដ្ឋកិច្ចគ្រួសារ តាមរយៈការបំរើវិស័យទេសចរណ៍ដែលមានភ្ញៀវជាតិ អន្តរជាតិចូលមកទស្សនាប្រាសាទអង្គរវត្ត និងប្រាសាទនានាជាច្រើនក្នុងមួយថ្ងៃៗ។ ស្ថានភាពនេះបានតម្រូវឲ្យមានការប្រើប្រាស់ទឹកយ៉ាងច្រើនជារៀងរាល់ថ្ងៃ ដែលបានបន្សល់នូវ
កាកសំណល់ទឹក ចាំបាច់ត្រូវតែបង្ហូររំដោះចេញឲ្យទាន់ពេល និងធានាឲ្យបាននូវការរក្សាសុខុមាលភាពជូនប្រជាជន ក៏ដូចជាការថែរក្សានូវបរិស្ថាន ដែលគិតទាំងការថែរក្សាអាយុជីវិតមនុស្ស សត្វ និងរុក្ខជាតិ ពីព្រោះកាកសំណល់ទឹកវាមានក្លិនអាក្រក់ និងជាទីដែលមេរោគគ្រប់ប្រភេទកកើត ធ្វើឲ្យប៉ះពាល់ដល់សុខភាពមនុស្ស សត្វ និងអាចធ្វើឲ្យរុក្ខជាតិងាប់បានផងដែរ។ ដូចនេះ ប្រព័ន្ធលូចម្រោះទឹកសំណល់នេះ នឹងជួយសំអាតទឹកកខ្វក់ទាំងនោះឲ្យស្អាតជាមុនសិន ទើបបង្ហូរចូលទៅក្នុងទន្លេ ឬ អាចយកទៅស្រោចស្រពដំណាំ បន្លែផ្សេងៗបាន។ តួនាទីចម្រុះរបស់ហេដ្ឋារចនាសម្ព័ន្ធប្រព័ន្ធលូចម្រោះទឹកសំណល់ ដែលយើងបានបើកឲ្យប្រើប្រាស់ជាផ្លូវការនាថ្ងៃនេះ បានរួមចំណែកជំរុញកំណើនសេដ្ឋកិច្ច ការអភិវឌ្ឍសង្គម និងជួយលើកស្ទួយកិត្តិយសប្រទេសយើងជាពិសេសខេត្តសៀមរាប ដោយជួយធ្វើឲ្យខេត្តនេះទទួលបាននូវ
កិច្ចការពារបរិស្ថាន កាន់តែប្រសើរឡើង និងមានសោភ័ណភាព ដែលជាកត្តាទាក់ទាញភ្ញៀវទេស-ចរណ៍ជាតិ អន្តរជាតិ និងការវិនិយោគលើគ្រប់វិស័យ ដែលនាំឆ្ពោះទៅរកការជួយលើកកំពស់សុខុមាល–ភាពប្រជាពលរដ្ឋ ជីវិតមនុស្ស សត្វ និង រុក្ខជាតិ។ បើពុំមានប្រព័ន្ធលូបង្ហូរ និងអាងចំរោះទឹកកខ្វក់ទេ កាក សំណល់ទឹកទាំងប៉ុន្មានដែលផ្ទុកដោយជាតិពុល នឹងត្រូវហូរចូលទៅក្នុងដី ឬចូលទៅបឹងទន្លេសាប ប៉ះពាល់ដល់មច្ឆជាតិ និងប៉ះពាល់ដល់សុខភាពប្រជាជន និងភ្ញៀវទេសចរណ៍
ផងដែរ។ នៅពេលនេះ ប្រព័ន្ធលូចម្រោះទឹកសំណល់ត្រូវបានសាងសង់រួចជាស្ថាពរ រួមនឹងការកែលម្អស្ទឹងសៀមរាប បានបង្កើនសោភ័ណភាពបន្ថែមទៀតដល់ក្រុងសៀមរាប ហើយក៏បានជួយរំដោះការលិចលង់ទឹកក្នុងទីក្រុងសៀមរាប ដែលនាំខូចខាតហេដ្ឋារចនាសម្ព័ន្ធផ្សេងៗទៀត ។ បន្ទាប់មក, ឯកឧត្តមឧបនាយករដ្ឋមន្ត្រី ក៏បានអញ្ជើញបំពាក់គ្រឿងឥស្សរយសជូនដល់បុគ្គលដែលមានស្នាដៃឆ្នើមចំពោះមាតុភូមិកម្ពុជា និងបានអញ្ជើញចែកអំណោយដល់យាយជី តាជី និងប្រជាពលរដ្ឋដែលមកចូលរួមក្នុងកម្មវិធីនេះផងដែរ ៕
