លោក Neil Warnock បានវិលត្រឡប់មកដឹកនាំក្លិបឥន្ទ្រីខៀវ Crystal Palace សាជាថ្មី បន្ទាប់ពីក្លិបនេះបានតែងតាំងរូបលោកឲ្យធ្វើជាគ្រូបង្វឹកថ្មីជាមួយនឹងកិច្ចសន្យារយៈពេល២ឆ្នាំ ។ លោក Warnock ដែលធ្លាប់ដឹកនាំនៅទឹកដី Selhurst Park កាលពីចន្លោះឆ្នាំ ២០០៧ ដល់២០១០ នឹងត្រូវទទួលភារកិច្ចជំនួសលោក Tony Pulis ដែលបានលាឈប់ពីតំណែងកាលពី ២ថ្ងៃមុនពេលបើករដូវកាលថ្មី ។
ជាមួយគ្នានោះ អតីតអ្នកចាត់ការក្លិបនាគភ្លើង Cardiff City លោក Malky Mackay ក៏ធ្លាប់ត្រូវបានទាក់ទងឲ្យមកដឹកនាំក្រុម Crystal Palace ផងដែរប៉ុន្តែលោកបានច្រានចោលឱកាសនេះ កាលពីសប្តាហ៍មុនបន្ទាប់ពីមានបញ្ហាផ្ទាល់ខ្លួន ។
គួរបញ្ជាក់ថា បច្ចុប្បន្នក្លិប Crystal Palace មិនទាន់មាន១ពិន្ទុឡើយនៅក្នុងដៃក្នុងក្របខណ្ឌ Premier League នៅរដូវកាលថ្មីនេះដោយពីរប្រកួតកន្លងមកពួកគេបានប្រកួតចាញ់ Arsenal និង West Ham United ៕
