ខេត្តបាត់ដំបង: ភ្ញៀវទេសចរណ៍ជាតិ ចាប់ផ្តើមកក់តង់ ដើម្បីសម្រាកលំហែរកាយ ក្នុងឱកាសឆ្លងឆ្នាំសកល ២០២១ ចូល ២០២២ តាមគោលដៅទេសចរណ៍សំខាន់ៗ ក្នុងខេត្តបាត់ដំបង។
លោក អ៊ុច អ៊ុំភីនីស្សារ៉ា ប្រធានមន្ទីរទេសចរណ៍ ខេត្តបាត់ដំបង បានបញ្ជាក់ថា នៅថ្ងៃទី ៣១ ខែធ្នូ ឆ្នាំ ២០២១នេះ ក្នុងឱកាសរាត្រីឆ្លងឆ្នាំសកល ឆ្នាំ ២០២១ – ២០២២ ឈានចូលថ្ងៃទី១ ខែមករា ឆ្នាំ២០២២ នេះ នៅតាមបណ្តារមណីយដ្ឋាន ទេសចរណ៍ ធំៗ មួយចំនួន ក្នុងខេត្ត ត្រូវបានភ្ញៀវ ក្នុងស្រុក កក់តង់ ដើម្បីសម្រាកពេលរាត្រី ជាច្រើនហូរហែរ ចាប់តាំងពី ពីរសប្តាហ៍ មុនមក។
រមណីយដ្ឋានទេសចរណ៍ នៅក្នុងខេត្តបាត់ដំបង មានចំនួន ២៣ រួមមានៈ រមណីយដ្ឋាន ប្រាសាទបាណន់ រមណីយដ្ឋាន ភ្នំសំពៅ ប្រាសាទឯកភ្នំ អាងទឹកកំពីងពួយ ទឹកធ្លាក់ ៥៣ ភ្នំព្រឹក រមណីយដ្ឋាន នគរជុំ ភ្នំព្រឹក រមណីយដ្ឋាន ភ្នំកំពូល រមណីយដ្ឋាន វាលចម្បាំង ខេមសាយ សហគមន៍អេកូទេសចរណ៍ ទឹកធ្លាក់អូរជាំ សហគមន៍អេកូទេសចរណ៍ ព្រែកទាល់ ជាដើម។
លោកប្រធានមន្ទីរទេសចរណ៍ បានបន្ថែមថា ក្នុងចំណោម រមណីយដ្ឋាន ទេសចរណ៍ ទាំង ២៣ កន្លែងខាងលើ មានរមណីយដ្ឋាន ចំនួន ៦ កន្លែង ទទួលភ្ញៀវសម្រាកកម្សាន្ត បោះតង់ឆ្លងរាត្រី មានដូចជា រមណីយដ្ឋាន ចំការស្វាយ រមណីយដ្ឋាន ស្ទឹងថ្មដាចំការធុរេន រមណីយដ្ឋាន ចំការធុរេនអូរតង រមណីយដ្ឋាន ខេមសាយ សហគមន៍អេកូទេសចរណ៍ ទឹកធ្លាក់អូរជាំ និងសហគមន៍ អេកូទេសចរណ៍ ព្រែកទាល់។
លោក អ៊ុច អ៊ុំភីនីស្សារ៉ា បានបញ្ជាក់ដែរថា ភ្ញៀវទេសចរណ៍ ចាប់ផ្តើមជ្រើសរើស ចូលលេងកម្សាន្ត នៅតាមគោលដៅទេសចរណ៍នេះ ដោយសារជំងឺកូវីដ- ១៩ មានសភាពស្ងប់ស្ងាត់ និងម្យ៉ាងទៀត បានជាឱកាសផ្លាស់ប្តូរបរិយាកាស ជាមួយតំបន់ជួរព្រៃភ្នំ ជ្រោះជ្រងជ្រលងដងអូរ គយគយគនទេសភាព ប៉ុន្តែទោះទោះបីជា៉ាងនេះក្តី ក៏លោកទទួចសំណូមពរ ដល់គ្រប់អ្នកទេសចរណ៍ទាំងអស់ ត្រូវប្រកាន់ខ្ជាប់នូវវិធានការ ការពារ ៣កុំ ៣ការពារ ឲ្យបានល្អ ដើម្បីសុវត្ថិភាព និងក្តីសុខសាន្ត៕ អត្ថបទ : ព្រាប.ស
