ខេត្តក្រចេះ : បើទោះបីជា លោកបួយ រតនា នាយផ្នែករដ្ឋបាលព្រៃឈើក្រចេះ បានចាត់វិធានការ ចុះបង្ក្រាបទីតាំង ស្តុកឈើធ្នង់ខុសច្បាប់របស់ក្រុមឈ្មួញមួយចំនួនស្ថិតនៅក្នុង ឃុំសំបុក ស្រុកចិត្របុរី ខេត្តក្រចេះ ជាបន្តបន្ទាប់យ៉ាងណាក៏ដោយក្ដី ក៏ប៉ុន្តែនៅតែមានក្រុមឈ្មួញមួយចំនួន នៅតែបន្តសកម្មភាពដឹកជញ្ជូនឈើធ្នង់ ចេញពីឃុំ កន្តួត ស្រុកចិត្របុរី ស្ថិតនៅក្នុងដែនសមត្ថកិច្ចផ្នែករដ្ឋបាលព្រៃឈើក្រចេះ ទាំងថ្ងៃ ទាំងយប់ ឆ្ពោះទៅកាន់ ស្រុកមេមត់ ខេត្តត្បូងឃ្មុំ ដូចភ្លៀងរលឹមតែដដែល ។
ដោយយោងទៅតាមប្រភពព័ត៌មាន ដ៏ច្បាស់ការណ៍ ដែលភ្នាក់ងារកាសែតកម្ពុជាថ្មី ប្រចាំខេត្តក្រចេះ ទទួលបានពីប្រជាពលរដ្ឋរស់នៅ ឃុំកន្តួត បានបង្ហើបឲ្យដឹងថា ឈ្មួញដែលកំពុងតែធ្វើចរាចរដឹកជញ្ជូនឈើធ្នង់យ៉ាងសកម្មចេញពីតំបន់នោះទាំងថ្ងៃទាំងយប់ មានឈ្មោះថា លោកប៉ាង និង លោកចិន ។
ចំណេកឯ លោកចិនវិញនោះ លោកងិន ពេជ្រ ព្រះរាជអាជ្ញារង អមសាលាដំបូងខេត្តក្រចេះ បានដឹកនាំកម្លាំងសមត្ថកិច្ចចម្រុះ ចុះទៅ បង្ក្រាប ទីតាំងស្តុកឈើរបស់គាត់ នៅចំណុចឃុំកន្តួត កាលពីដើមខែ សីហា ឆ្នាំ២០១៤នេះម្ដងរួចទៅហើយ ក៏ប៉ុន្តែ ថៅកែឈើម្នាក់នេះ នៅតែមិនរៀងចាលនោះឡើយ ហើយថែមទាំងដើរនិយាយ ប្រាប់គេ ប្រាប់ឯងមួយចំនួនទៀតថាបើទោះបីជា សមត្ថកិច្ចចម្រុះ បានចុះទៅចាប់ និង រឹបអូសឈើធ្នង់របស់គាត់អស់ប៉ុណ្ណឹងក៏ដោយ ក៏គាត់មិនក្ររ នោះដែរ ហើយគាត់ក៏មិនញញើតក្នុងការដឹកជញ្ជូនឈើចេញពីចំណុច ១០៥ឆ្ពោះទៅកាន់ស្រុក មេមត់ ខេត្តត្បូងឃ្មុំ នោះឡើយ ឲ្យតែនិយាយត្រូវគ្នាជាមួយលោកសុខ គោនាយសង្កាត់រដ្ឋបាលព្រៃឈើកន្តួត និង លោកបួយ រតនា នាយផ្នែករដ្ឋបាលព្រៃឈើក្រចេះ ទៅ ជាការស្រេចបាត់ទៅហើយ ។
ប្រភពបានលើកឡើងបន្តទៀតថា ដូច្នេះការធ្វើចរាចរដឹកជញ្ជូនឈើខុសច្បាប់ចេញពីតំបន់នោះ របស់លោកប៉ាង និងលោកចិន ប្រកបទៅដោយសភាពយ៉ាងរលូនដូចជាសព្វថ្ងៃនេះ ក៏វាអាស្រ័យទៅលើ លោកបួយ រតនា នាយផ្នែករដ្ឋបាលព្រៃឈើក្រចេះ និងលោកសុខ គោ នាយសង្កាត់រដ្ឋបាល ព្រៃឈើ កន្តួត ជាអ្នកបើកសញ្ញារភ្លើងខៀវ ឲ្យពួកគេទាំងពីរនាក់នេះដែរ ។
ហើយចំណែក ឯឈើធ្នង់ ដែល លោកប៉ាងនិង លោកចិន ដឹកជញ្ជូនចេញពីចំណុច១០៥ ស្ថិតនៅក្នុងភូមិសាស្ត្រ ស្រុកចិត្របុរី ឆ្ពោះទៅកាន់ ស្រុកមេមត់ ខេត្តត្បូងឃ្មុំ ជារៀងរាល់ថ្ងៃនេះ គឺពួកគេ យកឈើធ្នង់ទាំងនោះ ទៅលក់ឲ្យ ថៅកែឈើម្នាក់ ឈ្មោះលោក ឆុន ដែលកំពុងតែឈរចាំទទួលទិញឈើពីពួកគេ នៅចំណុច ក្ដុល ស្ថិតនៅក្នុងភូមិសាស្ត្រ ស្រុកមេមត់ ខេត្តត្បូងឃ្មុំ នេះតែម្ដង ។ ពាក់ព័ន្ធជុំវិញបញ្ហាខាងលើនេះ ភ្នាក់ងារកាសែតកម្ពុជាថ្មី ប្រចាំខេត្តក្រចេះ ក៏បានទូរស័ព្ទ ទៅសុំការបំភ្លឺពីលោក បួយ រតនាដែរ ក៏ប៉ុន្តែគាត់មិនដែលទទួល ទូរស័ព្ទ ឆ្លើយតបមកវិញ ម្ដងណាសោះឡើយ ៕
