លទ្ធផលប្រទ្បងសញ្ញាបត្រមធ្យមសិក្សាទុតិយភូមិបានបិទប្រកាសជាផ្លូវការនៅវេលាម៉ោង៣និង៣០នាទីថ្ងៃទី៣០សីហា២០១៤ស្ថិតក្នុងបរិវេណវិទ្យាល័យជាស៊ីមត្បែងមានជ័យក្នុងក្រុងព្រះវិហារ។ លោកហនឆនប្រធានមន្ទីរអប់រំយុវជននិងកីទ្បាបានអោយអ្នកសារព័ត៌មានដឹងថាលទ្ធផលប្រទ្បងសញ្ញាបត្រមធ្យមសិក្សាទុតិយភូមិឆ្នាំ២០១៤នេះមានបេក្ខជនចំនួន៤៥៤នាក់ក្នុងចំណោមបេក្ខជនចំនួន១១៥៦នាក់បានប្រទ្បងជាប់ដោយសមត្ថភាព។លទ្ធផលប្រទ្បងនេះស្មើនឹង៣៩.២៧ភាគរយក្នុងនោះសិស្សស្រីមានចំនួន២៥០នាក់។
លោកប្រធានមន្ទីរបានបន្តទៀតថាសំរាប់ខេត្តព្រះវិហារបេក្ខជនដែលប្រទ្បងជាប់ពុំមាននិទ្ទេសA,Bនោះទេគឺមានតែនិទ្ទេសCចំនួន២នាក់និទ្ទេសDចំនួន១៦នាក់និងនិទ្ទេសEចំនួន៤៣៦នាក់។លោកនិយាយថាឆ្នាំ២០១៤នេះការប្រទ្បងប្រព្រឹត្តទៅបានល្អតាមការគ្រោងទុករបស់ក្រសួងអប់រំយុវជននិងកីទ្បា។ លោកគ្រូបង្រៀននៅវិទ្យាល័យជាស៊ីមត្បែងមានជ័យបានប្រកាសអោយដឹងនៅរសៀលថ្ងៃទី៣០សីហាថាមុខវិជ្ជាដែលបេក្ខជនធ្វើវិញ្ញាសារធ្លាក់ច្រើនជាងគេគឺផ្នែកវិទ្យាសាស្ដ្រហើយផ្នែកសង្គមជាប់ច្រើននាក់។
សិស្សភាគច្រើនរៀនខ្សោយផ្នែកគណិតវិទ្យា,គីមីវិទ្យានិងរូបវិទ្យា។ លោកគ្រូដដែលបានធ្វើការប្រកូកប្រកាសដល់បេក្ខជនដែលប្រទ្បងធ្លាក់ជាង៦០ភាគរយត្រូវខិតខំប្រឹងប្រែងរៀនសូត្រទ្បើងវិញលើមុខវិជ្ជាគណិតវិទ្យាគីមីវិទ្យារូបវិទ្យានិងជីវវិទ្យាដើម្បីត្រៀមប្រទ្បងជាលើកទី២នៅថ្ងៃទី១៣និង១៤ខែតុលាឆ្នាំ២០១៤ដ៍ខ្លីខាងមុខនេះ។
បេក្ខជនម្នាក់ឈ្មោះហ្គូវតុលាភេទប្រុសអាយុ២០ឆ្នាំរៀននៅវិទ្យាល័យជាស៊ីមត្បែងមានជ័យបានប្រាប់អ្នកសារព័ត៌មានថាបន្ទប់ប្រទ្បងរបស់គាត់ជាប់តែ៦នាក់ប៉ុណ្ណោះក្នុងចំណោមបេក្ខជនប្រទ្បង២៥នាក់ហើយតាមដឹងបន្ទប់ខ្លះទៀតជាប់តែម្នាក់ប៉ុណ្ណោះ។បេក្ខជនម្នាក់នេះបាននិយាយថាគាត់ជាកូនកសិកររស់នៅភូមិហ្មសែតសង្កាត់ប៉ាលហាលក្រុងព្រះវិហារការប្រទ្បងជាប់បាក់ឌុបនេះដោយសារតែគាត់ខិតខំរៀនសូត្ររយះពេលពេញ១ឆ្នាំ។
តាមការសាកសួរមជ្ឈដ្ឋានអាណាព្យាបាលសិស្សបានអោយដឹងថាបេក្ខជនដែលប្រទ្បងធ្លាក់បាក់ឌុបជាង៦០ភាគរយនៅខេត្តព្រះវិហារភាគច្រើនជាសិស្សមិនខិតខំរៀនសូត្រចូលចិត្តដើរលេងច្រើនគេចសាលារៀនហើយអាងបើកចាក់អ៊ុតព្រុយយ៉ុងនៅពេលប្រទ្បង៕
