រដ្ឋមន្ត្រីការបរទេសរុស្ស៊ីលោក សឺហ្គេ ឡារ៉ូវ នៅថ្ងៃចន្ទនេះ បាននិយាយថា រដ្ឋាភិបាលទីក្រុង មូស្គូ នឹងមិនធ្វើអន្តរាគមន៍យោធានៅក្នុងវិបត្តិអ៊ុយក្រែននោះទេ ហើយក៏សូមជំរុញឲ្យសហរដ្ឋអាម៉េរិក និងអឺរ៉ុប ជួយបញ្ឈប់រដ្ឋាភិបាលទីក្រុង គៀវ ពីការប្រើប្រាស់អាវុធធុនធ្ងន់ផងដែរ។ ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃចន្ទ ទី០១ ខែកញ្ញា ឆ្នាំ២០១៤ ដោយផ្អែកតាមការលើកឡើងរបស់លោក ឡារ៉ូវ នៅវិទ្យាស្ថានទំនាក់ទំនងអន្តរជាតិរបស់រដ្ឋ នៅមូស្គូថា «គ្មានការធ្វើអន្តរាគមន៍យោធាណាមួយនោះទេ។ យើងគាំទ្រសម្រាប់តែការបង្កើតឲ្យមានសន្តិភាព
ពេញលេញ ក្នុងវិបត្តិដ៏ធ្ងន់ធ្ងរនេះតែប៉ុណ្ណោះ»។ ជាមួយគ្នានោះដែរ រដ្ឋមន្ត្រីការបរទេសរុស្ស៊ីរូបនេះ ក៏បានចោទប្រកាន់ទៅក្រុម អ្នកជំនាញរបស់អឺរ៉ុប ចំពោះការគម្រាមដាក់ ទណ្ឌកម្មថ្មីទៀតលើរុស្ស៊ី កាលពីថ្ងៃអាទិត្យ ដោយទុករយៈពេលមួយអាទិត្យ ដើម្បីបន្ថយស្ថានការណ៍ តានតឹងពីវិបត្តិនៅអ៊ុយក្រែនផងដែរ។ លោកថា ទាំងរដ្ឋាភិបាលទីក្រុង វ៉ាស៊ីនតោន និងព្រុចសែល គួរតែបោះបង់ចោលគោល នយោបាយដាក់ឱសានវាទនេះ និងគម្រាមដាក់ទណ្ឌកម្មផ្សេងទៀត ប្រសិនណាបើពួកគេចង់បន្ត កិច្ចសហប្រតិបត្តិការ ដោយសំអាងលើហេតុផល ជាមួយនឹងរុស្ស៊ីទៀត៕
