បន្ទាយមានជ័យៈ ករណីគ្រឿងញៀនក្នុងខេត្តបន្ទាយមានជ័យ ពិសេសក្រុងប៉ោយប៉ែតត្រូវបានសមត្ថកិច្ចប៉ូលីស និងបេអឹម បានបណ្តាក់គ្នាចុះបង្ក្រាបជាបន្តបន្ទាប់ទាំងទ្រង់ទ្រាយតូច និងទ្រង់ទ្រាយធំ ។ ជាក់ស្តែងកាលពីថ្ងៃទី ០១ កញ្ញា ២០១៤ ការិយាល័យប្រឆាំងគ្រឿងញៀនបានធ្វើការឃាត់ខ្លួនជនសង្ស័យ៣នាក់ពាក់ព័ន្ធករណីជួញដូរគ្រឿងញៀន នៅចំនុចវត្តត្រាច ភូមិក្បាលស្ពាន ក្រុងប៉ោយប៉ែត ខេត្តបន្ទាយមានជ័យ ។
តាមការអោយដឹងពីលោក ធិន ស៊ីនដេត នាយការិយាល័យប្រឆាំងគ្រឿងញៀនបានអោយដឹងថា ជាដំបូងកំលាំងរបស់លោកបានធ្វើការឃាត់ខ្លួនជនសង្ស័យម្នាក់មានឈ្មោះ ធឿន សាវុធ ហៅ ជាតាក់ ភេទប្រុស អាយុ១៥ឆ្នាំ និងបន្តឃាត់ខ្លួនបានជនសង្ស័យចំនួន២នាក់ផ្សេងទៀតរួមមានឈ្មោះ ជាន សេងឃាន់ ភេទប្រុស អាយុ២៦ឆ្នាំ និងឈ្មោះ ជាន សេងឃាន ភេទប្រុស អាយុ១៥ឆ្នាំ អ្នកទាំង៣មានទីលំនៅ សង្កាត់-ក្រុងប៉ោយប៉ែត ខេត្តបន្ទាយមានជ័យ និងបានដកហូត
បានវត្ថុតាំងមួយចំនួនដូចជា ថ្នាំញៀនប្រភេទម៉ាទឹកកកក្រាមសរថ្លា ចំនួន១០កូនថង់តូចស្មើរនិង ៥,០ក្រាម, ទូរសព្ទចំនួន២គ្រឿង, ជញ្ជីងសម្រាប់ថ្លឹងគ្រឿងញៀន ចំនួន១, ឧបករណ៍កែច្នៃសម្រាប់ចាក់មនុស្សចំនួន១, ឧបករណ៍សម្រាប់ជក់គ្រឿងញៀនមួយចំនួនផ្សេងទៀត ។ បច្ចុប្បន្ន ជនសង្ស័យទាំង៣នាក់ត្រូវបានកំលាំជំនាញកសាងសំនុំរឿងបញ្ជូនខ្លួនបន្តទៅតុលាការ ដើម្បីចាត់ការតាមនីតិវិធីច្បាប់ ។
គួរបញ្ចាក់ផងដែរថា តាំងពីដើមឆ្នាំ២០១៤ រហូតមកដល់ពេលនេះទាំងសម្ថកិច្ចប៉ូលីស និងបេអឹមបានធ្វើការបង្ក្រាបបទល្មើសគ្រឿងញៀនជាបន្តបន្ទាប់ និងបណ្តាក់គ្នាដូចខ្យង ៕
