ខេត្តព្រះសីហនុៈ កំលាំងសមត្ថកិច្ចជំនាញនៃស្នងការដ្ឋាននគរបាលខេត្តព្រះសីហនុ ធ្វើការឃាត់ខ្លួនជនសង្ស័យប្រុស០៣នាក់ និងស្ត្រី០១នាក់ ពីករណីប្រើប្រាស់ និងចែកចាយគ្រឿងញៀនកាលពីវេលាម៉ោង៦ និង ១៥នាទី ថ្ងៃទី០១ ខែកញ្ញា ឆ្នាំ២០១៤ នៅក្បែតំបន់សេដ្ឋកិច្ចពិសេស ស្ថិតនៅក្រុមទី៨ ភួមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ។
លោកវរសេនីយឯក សាន់ ប៊ុនថន ស្នងការរង និងជាប្រធានការិយាល័យកណ្តាលប្រឆាំងបទល្មើសនៃស្នងការដ្ឋាននគរបាលខេត្តព្រះសីហនុ មានប្រសាសន៌អោយដឹងថា កម្លាំងសមត្ថកិច្ចជំនាញបានធ្វើការស្រាវជ្រាវនូវមុខសញ្ញាក្រុមប្រើប្រាស់ និងចែកចាយគ្រឿងញៀនរយះពេលជិត៦ខែកន្លងមកហើយ នឹងកំណត់មុខសញ្ញាឈានទៅធ្វើការបង្ក្រាបឃាត់ខ្លួនបានជនសង្ស័យប្រើប្រាស់ និងចែកចាយគ្រឿងញៀនចំនួន០៤នាក់ នៅតំបន់សេដ្ឋកិច្ចពិសេសក្នុងឃុំបិតត្រាំង ស្រុកព្រៃនប់ ហើយមុខសញ្ញានេះ គឺពួកគេតែងតែយកគ្រឿងញៀនទៅលក់ចែកចាយនៅពេលដែលកម្មកររោងចក្របើកប្រាក់ខែ ។
លោក សាន់ ប៊ុនថន បានឲ្យដឹងថា ជនសង្ស័យទី១ មានឈ្មោះ អេល រ៉ ភេទប្រុស អាយុ២៩ឆ្នាំ សញ្ជាតិខ្មែរ មុខរបរជាទាហាន ស្រុកកំណើតភូមិដូនឡយ ឃុំបឹងតាព្រហ្ម ស្រុកព្រៃនប់ ទី២ ឈ្មោះ ម៉ាន រែ ភេទប្រុស អាយុ ២៩ឆ្នាំ សញ្ជាតិខ្មែរ មានទីលំនៅភូមិបឹងតាស្រី ឃុំបឹងតាព្រហ្ម ស្រុកព្រៃនប់ ទី៣ ឈ្មោះ លី វីដាំ ភេទប្រុស អាយុ ២២ឆ្នាំ សញ្ជាតិខ្មែរ មុខរបរនេសាទ ស្រុកកំណើតភូមិបឹងតាស្រី ឃុំបិតត្រាំង ស្រុកព្រៃនប់ និងទី៤ ឈ្មោះ ស្រី ស្រស់ ភេទស្រី អាយុ ២២ឆ្នាំ សញ្ជាតិខ្មែរ ស្រុកកំណើត ឃុំព្រៃខ្នង ស្រុកទឹកឈូ ខេត្តកំពត ។ ក្នុងប្រតិបត្តិការបង្ក្រាបកម្លាំងមន្ត្រីជំនាញដកហូតបានវត្ថុតាងមួយចំនួនមានដូចជា
ថ្នាំញៀនប្រភេទមេតំហ្វេតាមិន(ICE)ទឹកកក ចំនួន ០៤កញ្ចប់តូច និង ០១កញ្ចប់ធំ ស្មើនឹង ៥.៥ក្រាម ទូរសព្ទ័ដៃចំនួន ០៤គ្រឿង ម៉ូតូ០១គ្រឿង បំពង់សម្រាប់ជក់ថ្នាំញៀនចំនួន០១ ថង់សម្រាប់ច្រកថ្នាំគ្រឿងញៀនមួយចំនួនទៀត ។ លោកវរសេនីយឯក សាន់ ប៊ុនថន បានអោយដឹងទៀតថា បច្ចុប្បន្នជនសង្ស័យត្រូវបានធ្វើការសាកសួរបំពេញសំណុំរឿងបញ្ជូនទៅសាលាដំបូងខេត្តព្រះសីហនុ ដើម្បីចាត់វិធានការណ៌ទៅតាមផ្លូវច្បាប់ ៕
