កំពង់ឆ្នាំង៖ ស្ត្រីចំណាស់ម្នាក់បានតភ្លើងដោយខ្លួនឯងនៅក្នុងបន្ទប់ទឹក ហើយត្រូវបានខ្សែភ្លើងឆក់ដួលដេកស្លាប់នៅក្នុងបន្ទប់ទឹកគ្មានកូនចៅណាដឹងឭ។ហេតុការណ៍នេះបានកើតឡើងនៅវេលាម៉ោង៧និង៣០នាទីយប់ថ្ងៃទី០១ ខែកញ្ញា ឆ្នាំ២០១៤ នៅក្នុងភូមិអណ្តូងស្នាយ ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង។
លោក ម៉ូត យូ នាយប៉ុស្តិ៍រដ្ឋបាលអណ្តូងស្នាយបានអោយដឹងថា៖ស្ត្រីរងគ្រោះឈ្មោះ សួន សាម៉ន អាយុ៦០ឆ្នាំ ជាស្ត្រីម៉េម៉ាយ មានកូនស្ត្រីម្នាក់ធ្វើការនៅរោងចក្រស្បែកជើងស្រុកកំពង់ត្រឡាច។តាមការស្រាវជ្រាវរបស់សមត្ថកិច្ចបានអោយដឹងថា៖មុនពេលកើតហេតុស្ត្រីរងគ្រោះបានចូលក្នុងបន្ទប់ទឹកតបំបែកអំពូលភ្លើងមួយនៅក្នុងបន្ទប់ទឹក នៅពេលតរួចហើយ គាត់បានយកបង់ស្អិតរុំមុខតំណរមួយចំហៀង ពេលកំពុងរុំនោះក៍ត្រូវបានមុខតំណរខ្សែភ្លើងម្ខាងទៀតឆក់ដួលស្លាប់ភ្លាមៗនៅក្នុងបន្ទប់ទឹកតែម្តង ហើយនៅពេលសមត្ថកិច្ចទៅពិនិត្យសពនៅកន្លែងកើតហេតុ ឃើញតំណរខ្សែភ្លើងធ្លាក់នៅលើទ្រូងរបស់ស្ត្រីរងគ្រោះ។
ក្រោយពេលកើតហេតុកូនស្រីរបស់គាត់ឈ្មោះ ភេ ស្រីណេត អាយុ២០ឆ្នាំជាកម្មករនៅរោងចក្រស្បែកជើងបានមកពីធ្វើការវិញ ពេលមកដល់ផ្ទះនាងក៍បានស្រែកហៅរកម្តាយ តែមិនឭម្តាយឆ្លើយ ហើយនាងក៍បានដើររកម្តាយនៅក្នុងផ្ទះតែមិនឃើញ បន្ទាប់មកនាងបានដើរទៅមើលក្នុងបន្ទប់ទឹក ហើយក៍បានប្រទះឃើញម្តាយនាងដួលដេកស្លាប់នៅក្នុងបន្ទប់ទឹកបាត់ទៅហើយ។ នៅក្នុងករណីខាងលើនេះសមត្ថកិច្ចនិងអាជ្ញាធរមូលដ្ឋានបាននាំគ្នាចុះទៅពិនិត្យស្រាវជ្រាវនៅកន្លែងកើតហេតុ ហើយបានរកឃើញស្នាមឆេះខ្លោចដោយសារខ្សែភ្លើងឆក់នៅលើមេដៃខាងស្តាំ ដែលសមត្ថកិច្ចបានសន្និដ្ឋានថា ស្ត្រីរងគ្រោះពិតជាត្រូវខ្សែភ្លើងឆក់ស្លាប់ពិតប្រាកដមែន។
សពស្ត្រីរងគ្រោះត្រូវបានសមត្ថកិច្ចមូលដ្ឋានប្រគល់អោយកូនស្រី និងសាច់ញាតិ ក្នុងភូមិ ដើម្បីធ្វើបុណ្យទានតាមប្រពៃណី។ករណីរងគ្រោះនេះត្រូវបានសមត្ថកិច្ចសន្និដ្ឋាន ថាបណ្តាលមកពីស្ត្រីរងគ្រោះពុំមានបច្ចេកទេសតភ្លើង គឺចេះតែតភ្លើងទាំងប្រថុយប្រថាន ទើបបណ្តាលអោយមានគ្រោះថ្នាក់ដល់ជីវិតបែបនេះ៕
