គ្រូបង្វឹកហង្សក្រហម Liverpool Brendan Rodgers កំពុងតែបង្ហាញពីមហិច្ចតាចង់ទិញយកខ្សែប្រយុទ្ធ ខារីម ប៊ែនហ្សេម៉ា (Karim Benzema) របស់អធិរាជស Real Madrid មកកាន់ទឹកដី អ៊ែនហ្វៀល (Anfield) បើសិនជាក្លិបរបស់ខ្លួនមានកៅអីមួយក្នុងវគ្គជម្រុះ Champions League នៅរដូវកាលក្រោយ ។
លោក Rodgers បានប្រាប់អ្នកសារព័ត៌មានថា លោកមានបំណងចង់បាន ប៊ែនហ្សេម៉ា (Benzema) នៅរដូវក្តៅនេះស្របពេលដែលគេហទំព័រកីឡាមួយបានចុះផ្សាយថា ប៊ែនហ្សេម៉ា (Benzema) នឹងសម្រេចពីអនាគតរបស់ខ្លួននៅទឹកដី ប៊ឺណាប៊ូ (Bernebeu) ក្នុងពេលឆាប់ៗនេះ ។ ទោះបីជាយ៉ាងណាក៏ដោយ Liverpool ត្រូវប្រឈមមុខជាមួយ Manchester City និង Arsenal លើការតាមទិញកីឡាករអន្តរជាតិបារាំងរូបនេះ ។
ជាមួយគ្នានោះ ប្រភពព័ត៌មានដដែលបានលើកឡើងថា ហង្សក្រហមកំពុងត្រៀមប្រាក់ ២៥ លានផោនដើម្បីទិញ ប៊ែនហ្សេម៉ា (Benzema) ។ គួរម្លឹកផងដែរថា ប៊ែនហ្សេម៉ា (Benzema) គឺជាផ្នែកមួយដែលជួយឲ្យ Real Madrid យកឈ្នះលើក្រុម អ៊ែលឆេ (Elche) ៣-០ កាលពីយប់ថ្ងៃសៅរ៍ ៕
