សម័យប្រជុំពិសេសមួយ នៃសភាជាតិរបស់បាគីស្ថាន បានចាប់បើកហើយនៅ ថ្ងៃអង្គារ នេះ ដោយសមាជិកតំណាងរាស្ត្រទាំងអស់បាន យល់ព្រមបង្កើតនូវការតស៊ូមិតផ្នែក នយោបាយមួយ ស្តីអំពីជម្លោះ ប្រឆាំងរដ្ឋាភិបាលរវាងគណបក្សមានអំណាចទាំងពីរក្នុង ប្រទេស ដែលបានប្រយុទ្ធប្រឆាំងគ្នា បណ្តាលឲ្យមាន មនុស្សស្លាប់ជាច្រើននៅរដ្ឋធានី ឥស្លាម៉ាបាដ នៃប្រទេសអាស៊ីខាងត្បូងមួយនេះ។
ទីភ្នាក់ងារព័ត៌មានចិនស៊ិនហួ បានចេញផ្សាយនៅថ្ងៃអង្គារ ទី០២ ខែកញ្ញា នេះថា ក្រុមអ្នក គាំទ្ររបស់លោក អ៊ីមរ៉ាន ខាន នៃគណបក្ស តេហ៍រីក អ៊ី អ៊ីសាហ្វ រាប់ពាន់នាក់ និង រាប់ពាក់ នាក់ផ្សេងទៀតមកពីគណបក្ស តាហ៊ឺ អ៊ុល កាឌ្រី បានប្រមូលផ្តុំ និង ប្រឈមមុខដាក់គ្នានៅ កណ្តាលរដ្ឋធានី អ៊ីស្លាម៉ាបាដ តាំងពីថ្ងៃទី១៤ ខែសីហា មកម្ល៉េះ។
មេដឹកនាំនៃគណបក្សធំៗទាំងពីរនេះ កំពុងតឹងសសៃកដាក់គ្នាស្តីពីការទាមទារឲ្យលោក នាយករដ្ឋមន្ត្រី ណាវ៉ាហ្វ សារីហ្វ លាលែងចេញពីតំណែង។ លោក សារីហ្វ បានបដិសេធ ចំពោះសំណើនេះ ហើយអះអាងថា ក្រុមអ្នក តវ៉ាទាំងអស់ កំពុងតែព្រឹត្តនូវបទល្មើស ដែលនាំ ទៅរកការបំផ្លាញប្រព័ន្ធដឹកនាំរបស់រដ្ឋាភិបាលប៉ាគីស្ថាន។ កន្លងមកក៏មាននូវកិច្ចប្រជុំទាំង ព្រឹទ្ធសភា និង រដ្ឋសភា ដើម្បីស្វែងរក ផ្លូវដោះស្រាយបញ្ហានេះ តែមិនទាន់មាន ដំណោះស្រាយណាមួយជាដុំកំភួននោះទេ។
ការតវ៉ានេះ ត្រូវបានលោក អ៊ីមរ៉ាន ខាន អះអាងទៅក្រុមអ្នកគាំទ្រលោកកាលពីព្រឹកថ្ងៃអង្គារ នេះថា លោកនឹង បន្តយុទ្ធនាការ រហូតដល់សម្រេចបានការទាមទាររបស់ខ្លួន។ លោក ខាន បញ្ជាក់ថា ការបោះឆ្នោត សភាកាល ពីឆ្នាំមុន ដែលលទ្ធផលលោក ណាវ៉ាហ្វ សារីហ្វ ជាអ្នកឈ្នះនោះ គឺជា ការក្លែងបន្លំនោះទេ ហេតុដូច្នេះលោក ត្រូវតែចុះចេញពីអំណាច៕ ដោយផន សុខជាតិ
