ខេត្តកំពង់ឆ្នាំង៖ បុរសម្នាក់ជាជនសង្ស័យចែកចាយថ្នាំញៀន ត្រូវបានសមត្ថកិច្ចចាប់បាន ពេលធ្វើសកម្មភាពចែកចាយដល់អ្នកប្រើប្រាស់ថ្នាំញៀន នៅមុខវត្តទេពធីតារ៉ាម ក្នុងសង្កាត់ផ្សារឆ្នាំង ក្រុងកំពង់ឆ្នាំង ពីបទចែកចាយគ្រឿងញៀន កាលពីវេលាម៉ោង៨និង ៤០នាទីព្រឹក ថ្ងៃទី៣ ខែកញ្ញា ឆ្នាំ២០១៤ ។ ជនសង្ស័យដែលត្រូវសមត្ថកិច្ចចាប់ខ្លួននេះឈ្មោះ គិន ណារិទ្ធ ភេទប្រុស អាយុ៥៣ឆ្នាំ មានទីលំនៅក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
ក្នុងពេលឃាត់ខ្លួនសមត្ថកិច្ចឆែកឆេររកឃើញថ្នាំញៀនប្រម៉ាទឹកក១កញ្ចប់ លុយចំនួន១១.០០០រៀល និងទូរស័ព្ទដៃចំនួន២គ្រឿង ។ សមត្ថកិច្ចបានអោយដឹងថា មុនពេលចាប់ខ្លួន សមត្ថកិច្ចបានតាមដានអំពីសកម្មភាព មុខសញ្ញានេះជាយូរណាស់មកហើយ បន្ទាប់ពីកម្លាំងសម្ងាត់បានផ្តល់ព័ត៌មានថា ជនសង្ស័យនេះបានយកថ្នាំញៀនពីភ្នំពេញមកលក់នៅខេត្តកំពង់ឆ្នាំង
ដែលមានរយៈពេលជិតមួយសប្តាហ៍មកហើយៗនៅព្រឹកថ្ងៃទី៣ ខែកញ្ញានេះ ជនសង្ស័យបានណាត់អ្នកប្រើប្រាស់ម្នាក់មកជួបដើម្បីលក់ថ្នាំញៀន ក្នុងពេលធ្វើសកម្មភាពសមត្ថឃាត់ខ្លួនជាប់តែម្តង ។ បច្ចុប្បន្ន ជនសង្ស័យកំពុងសាកសួរយកចម្លើយនៅស្នងការដ្ឋាននគរបាលខេត្តកំពង់ឆ្នាំងដើម្បីកសាងសំណុំរឿងបញ្ជូនទៅកាន់តុលាការចាត់ការបន្តតាមនីតិវិធីច្បាប់៕
