កាលពីថ្ងៃពុធ រដ្ឋលេខាធិការផ្នែកសុខាភិបាលរបស់អង្គការសហប្រជាជាតិ បាននិយាយថា ទឹកប្រាក់ប្រមាណជាង ៦០០ លានដុល្លារសហរដ្ឋអាម៉េរិក នឹងត្រូវចំណាយ ដើម្បីទប់ស្កាត់ការរីកសាយភាយនៃជំងឺ Ebola ដ៏កាចសាហាវបំផុតនៅបណ្តាប្រទេសក្នុង តំបន់អាហ្វ្រិចខាងលិច។ ទីភ្នាក់ងារសារព័ត៌មានចិនស៊ិនហួ បានចេញផ្សាយនៅថ្ងៃព្រហស្បតិ៍ ទី០៤ ខែកញ្ញា ឆ្នាំ២០១៤នេះ ប្រធានអង្គការសុខភាពពិភពលោក (WHO) លោកស្រី Margaret Chan បានថ្លែងក្នុងសន្និសីទកាសែតនៅទីក្រុងវ៉ាស៊ីនតោនថា « ជំងឺ Ebola បានរាតត្បាត យ៉ាងឃោរឃៅ កាចសាហាវជាខ្លាំងហើយសម្លាប់មនុស្សលឿនបំផុត ដែលពួកយើងខាន ជួបប្រទះជំងឺបែបនេះជាង ៤០ ឆ្នាំ មកហើយ។» 
លោកបានបន្តទៀតថា អត្រានៃការចម្លងជំងឺនេះ គឺខ្ពស់ជាខ្លាំង ដែលយើងមិនអាចគ្រប់គ្រង បញ្ជៀសវាបាន នៅពេសពេញប្រទេសអាហ្វ្រិកខាងលិច។ ជាមួយគ្នានេះដែរ ក្នុងសប្តាហ៍នេះ របាយការណ៍យូអិនបានឲ្យដឹងថា មានករណីឆ្លងចំនួន ៣.៥០០ នាក់ ហើយចំនួនអ្នកស្លាប់ មានប្រមាណជា ១.៩០០ នាក់ ដោយសារតែជំងឺ Ebola នេះរាតត្បាតតាំងពីខែមីនា មក។ អ្នកសម្របសម្រួលជាន់ខ្ពស់របស់ UN និង ជាអ្នកគ្រប់គ្រងជំងឺ Ebola លោក David Nabarro បានប៉ាន់ស្មានថា យ៉ាងហោចណាស់ ត្រូវយូអិនត្រូវចំណាយ លុយ ជាង ៦០០ លានដុល្លារ ដើម្បីទប់ស្កាត់ពីការរាលដាលនៃជំងឺនេះ។
លោកស្រី Margaret Chan ដែលជាប្រធាន WHO បានសង្កត់ធ្ងន់ថា «វាបានគំរាមកំហែងដល់ពិភពលោកយើងទាំងមូល ហើយ យើងចាំបាច់ត្រូវ តែបង្កាវាឲ្យទាន់ពេលវេលា»។ គួរបញ្ជាក់ផងដែរថា ប្រទេសជាច្រើនដូចជា សហរដ្ឋអាម៉េរិក, ចក្រភពអង់គ្លេស, ចិន, កាណាដា, អាហ្វ្រិកខាងត្បូង, ស្វីស, បារាំង, និង កូវ៉ែត បានផ្តល់ជំនួយនិង ចូលរួមយ៉ាងសកម្មក្នុងការទប់ស្កាត់ជំងឺ Ebola នេះ៕ផន សុខជាតិ
