ខេត្តកំពង់ស្ពឺ៖រឿងអាស្រូវពុករលួយដ៍ធ្ងន់ធ្ងរមួយកំពុងតែបានផ្ទុះឡើងនៅមន្ទីរអភិវឌ្ឍន៍ជនបទខេត្តកំពង់ស្ពឺដែលមានលោកអៀង ដាំ ជាប្រធានដែលបន្តតំណែងពីលោកប៊ុន ច័ន្ទវណ្ណៈ ដែលបច្ចុប្បន្នជាអគ្គាធិការនៃ ក្រសួងអភិវឌ្ឍន៍ជនបទ។
តាមមន្ត្រីនៅក្នុងមន្ទីរមួយនេះបានទំលាយឲ្យដឹងថា ចាប់តាំងពីលោកអៀង ដាំ ត្រូវបាន តែងតាំងធ្វើជាប្រធានមន្ទីរអភិវឌ្ឍន៍ជនបទខេត្តកំពង់ស្ពឺរយៈពេលប្រមាណប្រាំពីរឆ្នាំមកនេះរឿងអាស្រូវពុករលួយស្ទើរគ្រប់រូបភាពបានកើតឡើងជាបន្តបន្ទាប់ដោយក្នុងនោះមានការកឹបកេងស៊ីប្រាក់មន្ត្រីខ្មោចដែលមានតែឈ្មោះដែលមិនធ្វើការកឹបកេងថវិកាលើគ្រប់ជំពូក។ ហើយប្រភេទថវិកាដែល ពួកគេកឹបកេងបានច្រើននោះគឺនៅក្នុងជំពួក៦១ ជំពូក៦២ ជំពូក៦០ និងមួយផ្នែកតូចនៅក្នុងជំពូក៦៤។ 
តាមសេចក្តីរាយការណ៍បានឲ្យដឹងថាជាក់ស្តែងនៅរយៈពេលពីរបីឆ្នាំកន្លងមកនេះគឺមានមន្ត្រីជាច្រើននៅក្នុងមន្ទីរបានបោះបង់ចោលការងារមិនចូលធ្វើការតួយ៉ាងដូចជាលោកអ៊ឹម សម្បត្តិ ជាប្រធានការិយាល័យរដ្ឋបាលនិងកិច្ចការទូទៅរបស់មន្ទីរនិងលោកតឹក ហ៊ុន អនុប្រធានក្តាំរួមការិយាល័យអភិវឌ្ឍន៍ជនបទស្រុកបសេដ្ឋ រួមនិងមន្ត្រីមួយចំនួនទៀត ប៉ុន្តែមន្ត្រីឈ្មោះខ្មោចទាំងនោះនៅតែត្រូវបានលោកប្រធានមន្ទីរអៀង ដាំ និងលោកប្រធានការិយាល័យគណនេយ្យនិងហិរញ្ញវត្ថុ រួមនិងអនុប្រធានការិយាល័យម្នាក់ឈ្មោះនិល មិថុនា ដែលកាន់តួនាទីជាភ្នាក់ងារបើកផ្តល់បានរក្សាទុកឈ្មោះនិងបើកយកប្រាក់ខែ ចែកគ្នាស៊ីចាយយ៉ាងសប្បាយធ្វើឲ្យរដ្ឋខាតបង់ថវិកានេះដ៍ច្រើន និងជាការផ្គើនទៅនិងសេចក្តីប្រកាសរបស់អង្គភាពប្រឆាំងអំពើពុករលួយស្តីពីការទបស្កាត់មិនឲ្យមានឈ្មោះមន្ត្រីខ្មោចនៅតាមស្ថាប័នរដ្ឋ។
សូមបញ្ជាក់ថានៅមន្ទីរអភិវឌ្ឍន៍ជនបទខេត្តកំពង់ស្ពឺបច្ចុប្បន្នគឺមានមន្ត្រីក្របខ័ណ្ឌចំនួន៨២នាក់មន្ត្រីអណ្តែតចំនួន៦នាក់ និងមន្ត្រីជាប់កិច្ចសន្យាចំនួន៨នាក់។ តួលេខនេះគឺគ្រាន់តែជាតួលេខដែល ពួកគេឃុបឃិតគ្នាធ្វើខ្លែងបន្លុំដើម្បីយកប្រាក់មន្ត្រីខ្មោចដែលមានតែឈ្មោះមិនធ្វើការបើកយកប្រាក់ខែចែកគ្នាស៊ីចាយ ដោយក្នុងនោះមានមន្ត្រីខ្មោចជាច្រើន។
សូមរំលឹកថានៅឆ្នាំ២០១៣កន្លងទៅនេះមន្ទីរអភិវឌ្ឍន៍ជនបទខេត្តកំពង់ស្ពឺបានចំណាយថវិកាជាតិសរុបអស់ចំនួន១,៤១៥,៩ លានរៀល ដោយក្នុងនោះចំណាយលើជំពូក៦០អស់ចំនួន១៤៣,៨ លានរៀល ជំពូក៦១ចំណាយអស់៦៨៦,០ លានរៀល ជំពូក៦២អស់ទឹកប្រាក់១៤៥,៤ លានរៀល និងជំពូក៦៤អស់ចំនួន៤៤០,៦ លានរៀល។ ដោយតួលេខនេះមិនទានរាប់បញ្ចូលពីការចំណាយថវិកាកម្មវិធីផ្សេងៗទៀតផង។
ចំពោះស្ថានភាពជាក់ស្តែងនៃការចំណាយថវិកាជាតិនិងថវិការកម្មវិធីនោះត្រូវបានគេកឹបកេងមិនតិចជាង១/៣នៃការចំណាយសរុប។លើកលែងតែការចំណាយលើបន្ទុកបុគ្គលិកដែលគេមិនសូវកឹបកេងច្រើន ប៉ុន្តែគេស៊ីប្រាក់ខែមន្ត្រីខ្មោច ដោយអស់ពេលសូមតាមដានព័ត៌មានលំអិតនៅវគ្គក្រោយ៕
