ខេត្តព្រះវិហារ ខណ្ឌរដ្ឋបាលព្រៃឈើព្រះវិហារបើកយុទ្ធនាការចុះបង្ក្រាបបទល្មើសព្រៃឈើក្បែរតំបន់ព្រំដែនប្រាសាទព្រះវិហារស្តុកទុកក្នុងបរិវេណសិប្បកម្មដ៍ធំ១កន្លែងស្ថិតនៅភូមិតេជោសែនជ័យឃុំស្រអែមស្រុកជាំក្សាន្ដដោយប្រមូលរឹបអូសបានឈើតាប់ប្រណីតបេងធ្នង់នាងនួនសរុបជាង១០០០កំណាត់កាលពីចុងខែសីហាឆ្នាំ២០១៤កន្លងមក។ 
ការចុះបង្ក្រាបនេះមន្ដ្រីរដ្ឋបាលព្រៃឈើបានសុំឆ្លងយោបល់ផ្ទាល់ពីលោកអភិបាលខេត្តព្រះវិហារមុននឹងដឹកនាំកំលាំងមេព្រៃសហការជាមួយអាជ្ញាធរមូលដ្ឋានចុះទៅបង្ក្រាបព្រោះតំបន់នោះគ្រប់គ្រងដោយកងទ័ព។បន្ទាប់មកបានបន្តចុះទៅបង្ក្រាបដល់ស្រុកឆែបដោយរឹបអូសបានឈើប្រណីតនិងឈើគគីរសន្លឹកខ្នាតមុខធំៗប្រវែង៣ម៉ែត្រកប់ដីក្នុងស្រះទឹកធំ១កន្លែងសរុបជាង២០ម៉ែត្រគូបថែមទៀត។
លទ្ធផលរាប់នឹងវាស់វែងបរិមាណឈើមិនទាន់ដឹងចំនួនតួលេខពិតប្រាកដនៅទ្បើយទេរហូតមកដល់ថ្ងៃទី០៤ខែកញ្ញានេះគ្រាន់តែបានដឹងតួលេខត្រួសៗតែប៉ុណ្ណោះគឺឈើប្រណីតបង្ក្រាបបាននៅភូមិតេជោសែនជ័យបូករួមឈើរឹបអូសបាននៅស្រុកឆែបសរុចចំនួនជាង១០០០កំណាត់និងជាង២០ម៉ែត្រគូប។ លោកអ៊ិតភូម្រានាយខណ្ឌរដ្ឋបាលព្រៃឈើព្រះវិហារបានអោយដឹងថាឈើប្រណីតដែលចាប់បង្ក្រាបបាននៅក្បែរតំបន់ព្រំដែនកាលពីថ្ងៃទី១៩ដល់២២សីហា២០១៤សរុបចំនួន០៦រថយន្ដយីឌុប។ការចុះបង្ក្រាបនេះមានការសុំឆ្លងយោបល់ផ្ទាល់ពីលោកអ៊ុំម៉ារ៉ាអភិបាលខេត្តព្រះវិហារផងដែរ។
លោកនាយខណ្ឌរដ្ឋបាលព្រៃឈើបានបន្តទៀតថាបន្ទាប់ពីចុះបង្ក្រាបនៅតំបន់ព្រំដែនប្រាសាទព្រះវិហាររួចមកគាត់បានដឹកនាំកំលាំងរដ្ឋបាលព្រៃបន្តចុះទៅបង្ក្រាបក្នុងរោងសិប្បកម្មកែច្នៃឈើប្រណីតរបស់ឈ្មួញដុះស្លែឈ្មោះហួរនៅទីរួមស្រុកឆែបដោយរឹបអូសបានឈើខុសច្បាប់រាប់រយកំណាត់ថែមទៀត។លោកនិយាយថាលទ្ធផលការងារចុះបង្ក្រាបបទល្មើសព្រៃឈើទាំង២ស្រុកខាងលើត្រូវបានលោកអភិបាលខេត្តចុះត្រួតពិនិត្យមើលវត្ថុតាងបរិមាណឈើល្មើសច្បាប់ដល់ខណ្ឌរដ្ឋបាលព្រៃឈើផ្ទាល់។
ប្រភពព័ត៌មានពីសមត្ថកិច្ចដែលស្និទ្ធជាមួយអ្នកសារព័ត៌មានបានបង្ហើបអោយដឹងថាឈើប្រណីតបេងធ្នង់នាងនួនខ្នាតល្អៗជាង១០០០កំណាត់នៅភូមិតេជោសែនជ័យដែលលោកនាយខណ្ឌដឹកនាំចុះបង្ក្រាបបានជោគជ័យនិងមិនជួបគ្រោះថ្នាក់លើទីលានបង្ក្រាបបទល្មើសព្រៃឈើនោះដោយសារតែមានការជួយអន្តរាគមន៍ខ្លាំងពីលោកអភិបាលខេត្ត
។នេះមកពីលោកនាយខណ្ឌរដ្ឋបាលព្រៃឈើព្រះវិហារមានកិច្ចសហការល្អជាមួយថ្នាក់ដឹកនាំខេត្តនិងមានការប្រុងប្រយ័ត្នខ្ពស់បំផុតមុននឹងដឹកនាំកំលាំងរបស់ខ្លួនចុះទៅបង្ក្រាបបទល្មើសព្រៃឈើស្ថិតក្នុងរូងខ្លា។ ប្រភពព័ត៌មានដដែលបានអោយដឹងថាទីតាំងសិប្បកម្មកែច្នៃឈើប្រណីតខុសច្បាប់ធ្វើសាទ្បុងនិងគ្រែម្ចាស់ក្សត្រីយ៍នៅភូមិតេជោសែនជ័យដែលស្តុកឈើតាប់ប្រណីតជាង១០០០ពាន់កំណាត់ស្ថិតនៅក្នុងភូមិសាស្ដ្រអាថ៌កំបាំងមួយកន្លែងក្នុងចំការដំទ្បូងមីដ៍ធំ។
ឈ្មួញធំបើកសិប្បកម្មនេះជាជនជាតិវៀតណាមនិងមានកម្មករវៀតណាមជាជាងឈើរាប់សិបនាក់ផ្សេងទៀតបាននាំគ្នារត់គេចខ្លួនអស់មុនពេលកំលាំងមេព្រៃចុះដល់ទីតាំងបង្ក្រាប៕
