ខេត្តកណ្តាល; រថយន្តដឹកត្រីឆ្តោចេញពីស្រុកលើកដែក ជារៀងរាល់ថ្ងៃ ដែលឈ្មួញប្រមូលទិញពីអ្នក ចិញ្ចឹមយកទៅលក់នៅរាជធានីភ្នំពេញ កើតមានយ៉ាងគគ្រិកគគ្រេងគួរអោយកត់សំគាល់ ។ ការអនុញ្ញាតចូលប្រមូលទិញត្រីឆ្តោខុសច្បាប់ចេញពីស្រុកលើកដែកសព្វថ្ងៃនេះ ត្រូវបានបង់ប្រាក់ឲ្យមន្ត្រីជំនាញជលផលសង្កាត់លើកដែក និងខ័ណ្ឌរដ្ឋបាលជលផលកណ្តាលអស់ហើយ ទើបអ្វីៗដំណើរការទៅបានយ៉ាងរលូន.
ត្រីឆ្តោដឹកចេញពីស្រុកលើកដែករាប់សិបតោនរៀងរាល់ថ្ងៃ ដឹកតាមរថយន្តកូរ៉េ ចូលមកស្តុបទុកនៅយឿងច្បារអំពៅ រួចចែកចាយក្នុងរាជធានីភ្នំពេញ ។ ក្រុមឈ្មួញរកស៊ីដឹកត្រីឆ្តោរាប់រយតោនចេញពីស្រុកលើកដែក យ៉ាងដុះស្លែត្រូវបានស្គាល់ឈ្មោះ តាគីម ជាចៅកែ យឿ នៅផ្សារច្បារអំពៅ។ ដោយឡែកមន្ត្រីជំនាញជលផលសង្កាត់លើកដែកសើមមាត់សើមក ទទួលប្រាក់យ៉ាងសន្ធឹកសន្ធាប់ពី រថយន្តដឹកត្រីឆ្តោ និងពីអ្នកចិញ្ចឹមត្រីឆ្តោ ព្រមទាំងពីបទល្មើសនេសាទពេញផ្ទៃបឹងផង ។ 
លោក វឿន មន្ត្រីកងរាជអាវុធហត្ថស្រុកលើកដែកបានប្រាប់កម្ពុជាថ្មីថា រថយន្តដឹកត្រីឆ្តោរាល់ថ្ងៃនេះ គឺ បានប្រមូលទិញពីអ្នកចិញ្ចឹមនៅក្នុងស្រុកលើកដែក ហើយទិញមួយឆ្នាំៗទិញមិនអស់ទេ ព្រោះអ្នកចិញ្ចឹមត្រីឆ្តោ មានរាប់រយស្រះ ។
ចំនែករូបលោកក៏មានស្រះចិញ្ចឹមត្រីឆ្តោផងដែរ ហើយត្រីដែលដឹកចេញនៅថ្ងៃនេះ គឺជាត្រីរបស់លោក ដែលលក់ទៅអោយឈ្មួញ ហើយរូបលោកដែលជាអ្នកលក់ត្រី និងរថយន្តដឹកត្រីឆ្តោបានបង់ប្រាក់ ជូនលោកមន្ត្រីជំនាញជលផលសង្កាត់លើកដែកគ្រប់ចំនួនរួចរាល់អស់ហើយ ។
តាមពិតទៅ នៅក្នុងស្រុកលើកដែកឲ្យតែបង់ប្រាក់ឲ្យមន្ត្រីជំនាញរួចរាល់ហើយ នោះការដឹកជញ្ជូនត្រីឆ្តោ ត្រូវបានអនុញ្ញាតដឹកតាមចិត្ត កុំថាដឹកតាមរថយន្តកូរ៉េ ទោះបីដឹកតាមរថយន្តកុងទឺន័រក៏បានផេងដែរ ពាក់ព័ន្ធករណីខាងលើកម្ពុជាថ្មីបានព្យាយាមសុំការបំភ្លឺពីលោកនាយរដ្ឋបាលជលផលកណ្តាលផងដែរ តែមិនអាចទាក់ទំនងបាន ។
