កំពង់ធំៈ លោក វរៈសេនីយ៍ទោ ញ៉ែម ឈុនលី អធិការក្រុងស្ទឹងសែន សហការជាមួយប៉ុស្តិ៍រដ្ឋបាលកំពង់ធំ ស្ទាក់ចាប់ចោរស្រីម្នាក់ដែលជាមុខសញ្ញាលួចម៉ូតូ ពីជនរងគ្រោះម្នាក់មានមុខរបររត់ម៉ូតូឌុប សកម្មភាពការ ស៊ើបអង្កេតតាមរកមុខសញ្ញាចោតស្រីដៃឆៅ បានឈានដល់ថ្ងៃបង្ក្រាបនៅវេលាម៉ោង ៩.២៧នាទី យប់ថ្ងៃទី ៥ ខែកញ្ញា ឆ្នាំ ២០១៤ នៅចំណុចគល់ស្ពានកំពង់ធំ ត្រើយខាងកើត ។ 
ហេតុការណ៍នេះ បានធ្វើឲ្យប្រជាពលរដ្ឋជាច្រើនរយនាក់ ផ្អើលឈូឆរ ដោយសារតែជនសង្ស័យសម្រេច ទំលាក់ម៉ូតូចោល ខណៈពេលដែលទាល់ច្រករត់ពុំរួច ក៏សម្រេចលោតចូលទឹកស្ទឹងដើម្បីហែលឆ្លងគេចពី សមត្ថកិច្ច តែដល់ពេលដែលទឹកហូរខ្លាំងពេក ក៏ហែលត្រឡប់មកច្រាំងវិញ ក៏ត្រូវបានសមត្ថកិច្ចក្របួច បាន ទទឹកញ័រដូចកូនសត្វ។ 
តាមការឲ្យដឹងពីលោក ផេង ពីន អាយុ ៣៥ឆ្នាំ រស់នៅភូមិ ព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ មានមុខរបរជាអ្នករត់ម៉ូតូឌុប បានឲ្យដឹងថា នៅថ្ងៃកើតហេតុ លោកបានដឹកនារីម្នាក់ មកពីក្បាលថ្នល់ លុះមកដល់ពាក់កណ្តាលផ្លូវ ជនសង្ស័យបានឲ្យគាត់ឈប់ម៉ូតូ ហើយទូរស័ព្ទរកមិត្តភ័ក្ក នៅរវាងដែល រងចាំជនរងគ្រោះបាន ទៅបទជើងតូច ដោយមិនបានដកសោរម៉ូតូ ដែលជាឳកាសចោរស្រីដៃឆៅម្នាក់នេះ បានឡើងម៉ូតូហើយគេចខ្លួន កាលពីថ្ងៃអង្គារ ទី២ ខែ កញ្ញា ឆ្នាំ២០១៤ ហើយបានដាក់ពាក្យបណ្តឹងទៅអធិការក្រុងស្ទឹងសែន ។ 
លោក ញ៉ែម ឈុនលី អធិការក្រុងស្ទឹងសែន បានឲ្យដឹងថា ក្រោយពីទទួលបានពាក្យបណ្តឹងជនរងគ្រោះ លោកបានចាត់កំលាំងស៊ើបអង្កេត លុះទទួលពត៌មានថា មានម៉ូតូពាក់ស្លាកលេខ បន្ទាយមានជ័យ 1D-8350 សេរីសេ១២៥ ឆ្នាំ ២០១០ ឡើងតែម ២០១៣ ពណ៌ខ្មៅ ដែលជនសង្ស័យកំពុងតែឈប់នៅតាមមាត់ស្ទឹង ត្រង់ចំនុចសួនច្បាហាត់ប្រាណ ទើបបានសុំយោបល់ លោក អ៊ិត សុធា ព្រះរាជអាជ្ញាខេត្តកំពង់ធំ ដើម្បីឲ្យកំលាំងចុះទៅពិនិត្យ ក្រោយមកជនសង្ស័យ ដឹងខ្លួនក៏ជិះម៉ូតូរត់តែម្តង តែត្រូវបានប៉ូលិសឡោមព័ទ្ធទើបសម្រេចលោតចូលទឹកស្ទឹង ។ 
ជនសង្ស័យត្រូវបានស្គាល់ឈ្មោះ គាំង ស៊ីនាថ ភេទ ស្រី អាយុ ២១ឆ្នាំ រស់នៅភូមិ ក្រសាំង ឃុំ ត្រពាំងឬស្សី ស្រុកកំពង់ស្វាយ ខេត្តកំពង់ធំ ជនសង្ស័យត្រូវបានបញ្ជូនមកកាន់អធិការ ដើម្បីកសាងសំណុំរឿង បញ្ជូន ទៅតុលាការ ចំនែកនារីម្នាក់ទៀត ពុំមានការពាក់ព័ន្ឋជាមួយនឹងជនសង្ស័យទេ តែបានជិះម៉ូតូជាមួយគ្នា នៅ ពេលដែលគេចាប់ អត់ដឹងរឿងនឹងគេ ក៏បានរត់ដួចដោយការភ័យស្លន់ស្លោរ ក្រោយមក ត្រូវបានឳពុកម្តាយ មកធានា ទើបសមត្ថកិច្ចដោះលែងឲ្យមានសេរីភាពវិញ ។ ដោយ ផន សុជាតិ 
