ភ្នំពេញ ៖ គ្រោះថ្នាក់ចរាចរណ៍មួយបានកើតឡើងរវាងម៉ូតូហុងដាឌ្រីមសេ១២៥ ពាក់ស្លាកលេខភ្នំពេញ1R-7714 បុកគ្នាជាមួយនិងម៉ូតូអ៊ែប្លែក ពាក់ស្លាកលេខ 1AC-8797 ពេញទំហឹង ខណៈបើកបរតាមផ្លូវលេខ២៧១ ក្នុងទិសដៅបញ្ច្រាសទិសគ្នា ។ ហេតុការណ៍នេះកើតឡើងកាលពីវេលាម៉ោង
១០ យប់ ថ្ងៃទី ៥ កញ្ញា ២០១៤ នៅលើកំណាត់ផ្លូវលេខ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន ដែលបង្កឱ្យអ្នកបើកបរទាំងពីរនាក់រងរបួសធ្ងន់ធ្ងរ ។
ប្រភពព័ត៌មានបានឱ្យដឹងថា បន្ទាប់ពីគ្រោះថ្នាក់ចរាចរណ៍ម៉ូតូពីរគ្រឿងខាងលើបុកគ្នារបួសធ្ងន់ទាំងសងខាងនោះភ្លាមៗគេឃើញប្រជាពលរដ្ឋជាច្រើនបានមកចោមរោមមើលហេតុការណ៍គ្រោះថ្នាក់ចរាចរណ៍នេះ ដែលធ្វើឱ្យស្ទះចរាចរណ៍ពេញផ្លូវ ខណៈសមត្ថកិច្ចមិនទាន់បានធ្វើការវាស់វែង ។ ស្របពេលនោះដែរក៏មានរថយន្តហាយឡិនឌ័រ ពណ៌ទឹកប្រាក់មួយគ្រឿងបើកដោយបុរសម្នាក់និងរួមដំណើរដោយបុរសម្នាក់ទៀត តាមផ្លូវលេខ២៧១ យ៉ាងលឿនក្នុងស្ថានភាពស្រវឹងបានបើកមកបុករះប្រជាពលរដ្ឋដែលកំពុងតែចោមមើលហេតុការណ៍គ្រោះថ្នាក់ចរាចរណ៍នោះ បណ្តាលឱ្យរងរបួសធ្ងន់-ស្រាល ជាច្រើនអ្នកទៀត ហើយតៃកុងរថយន្តបានបន្ថែមល្បឿនបើកគេចខ្លួន មកដល់ចំណុចមុខផ្ទះលេខ១៧៧៥ ស្ថិតក្នុងសង្កាត់ចាក់អង្រែ ក៍បានបើករថយន្តទៅបុកម៉ូតហុងដាឌ្រីម សេ១២៥ មួយគ្រឿងទៀត ពាក់ស្លាកលេខភ្នំពេញ 2Y-3925 បណ្តាលឱ្យរងរបួសស្រាល ហើយ អ្នកជិះក្នុងរថយន្តទាំងពីរនាក់ បានបើកទ្វាររថយន្តចុះរត់គេចខ្លួនដោយម្នាក់ រត់ចូលផ្ទះប្រជាពលរដ្ឋ ហើយត្រូវម្ចាស់ផ្ទះចាប់វាយឡើងផុងលលាដ៍ក្បាលរបួសធ្ងន់ព្រោះស្មានតែជាចោរ ចំណែកម្នាក់ទៀត រត់គេចតាមច្រកឌឿងហែម ក៏ត្រូវប្រជាពលរដ្ឋចាប់បានវាយឡើងទ្រមខ្លួនដូចគ្នាផងដែរ ។
បុរសជិះរថយន្តហាយឡិនឌ័រ បង្កគ្រោះថ្នាក់បន្តកន្ទុយគ្នាខាងលើមានទី១.ឈ្មោះ អ៊ុក រ៉ាវុធ មានអាយុ២៧ឆ្នាំ ធ្វើប៉េអឹម នៅក្រសួងមហាផ្ទៃ ឋានន្តរសក្តិអនុសេនីយ៍ទោសក្តិ២ ចំណែកទី២.ឈ្មោះ ធុន ពន្លឺ ៣២ឆ្នាំជាប៉េអឹមនៅខេត្តព្រៃវែង ។
ក្រោយពេលកើតហេតុបុរសរបួសធ្ងន់ផុងលលាដ៍ក្បាលត្រូវបានគេបញ្ជូនទៅមន្ទីរពេទ្យ ចំណែកបុរសជិះរថយន្តហាយឡិនឌ័រម្នាក់ទៀត ត្រូវសមត្ថកិច្ចបញ្ជូនខ្លួនទៅកាន់ប៉ុស្តិ៍នគរបាលរដ្ឋបាលចាក់អង្រែលើ ដើម្បីត្រៀមបញ្ជូនបន្តទៅកាន់ការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញ ដោះស្រាយតាមនិតិវិធីច្បាប់ ។
