កំពង់ចាម: លោកជំទាវ ប៉ាង ដានី អនុប្រធានអចិន្ត្រៃយ៍សាខាកាកបាទក្រហមកម្ពុជាខេត្តកំពង់ចាម និងជាប្រធានក្រុមការងារឥស្សរជនឆ្នើមថ្នាក់ជាតិ ថ្នាក់សាខា បានជម្រុញដល់ស្ត្រីមានផ្ទៃពោះ ត្រូវទៅពិនិត្យតាមដានសុខភាពឲ្យបានទៀងទាត់នៅមន្ទីរពេទ្យ ដេីម្បីឲ្យបានដឹងជាមុន និងងាយស្រួលក្នុងការត្រៀមលក្ខណៈទទួលសមាជិកថ្មីថាប្រុស ឬក៏ជាស្រី ។ ការថ្លែងបែបនេះក្នុងឱកាសដែលលោកជំទាវបានដឹកនាំក្រមការងារចុះសួរសុខទុក្ខ ស្ត្រីមានផ្ទៃពោះ នៅមណ្ឌលសុខភាពឃុំអំពិល ស្រុកកំពង់សៀម នាព្រឹកថ្ងៃទី២៣ ខែកុម្ភៈ ឆ្នាំ២០២២ ។
ឆ្លៀតក្នុងឱកាសនោះដែរ លោកជំទាវ ប៉ាង ដានី បានពាំនាំនូវប្រសាសន៍អំពាវនាវរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលបានជម្រុញឲ្យស្រ្តីមានផ្ទៃពោះទាំងអស់ ត្រូវទៅពិនិត្យសុខភាពឲ្យបានទៀងទាត់ចំនួន ៤ដង តាមការណែនាំរបស់គ្រូពេទ្យ ដេីម្បីទទួលយកថ្នាំបង្ការជំងឺតេតាណូស និងថ្នាំបង្ការជំងឺកូវីដ-១៩ ពិសេសការស្ម័គ្រចិត្តធ្វើតេស្តឈាម រកមេរោគអេដស៍ ស្វាយ រលាកថ្លើមប្រភេទB ដើម្បីរួមគ្នាលុបបំបាត់ ការចម្លងមេរោគពីម្ដាយទៅកូន។ ក្រោយពេលសម្រាល ត្រូវយកកូនទៅទទួលវ៉ាក់សាំងបង្ការជំងឺទាំង ១១មុខ តាមពេលកំណត់ ហើយត្រូវបន្តតាមដានសុខភាព និងការលូតលាស់របស់កូន ។ លេីសពីនោះស្ត្រីជាមាតាទាំងអស់ ត្រូវបំបៅកូនដោយទឹកដោះម្តាយតែមួយមុខគត់ ចាប់ពីពេលទារកកើតមកភ្លាម រហូតដល់អាយុ ៦ខែ និងត្រូវផ្ដល់អាហារបន្ថែមគ្រប់មុខ គ្រប់ជីវជាតិ ( បបរខាប់គ្រប់គ្រឿង) រួមជាមួយ ការបន្តបំបៅទឹកដោះម្ដាយ រហូតដល់កុមារ មានអាយុយ៉ាងតិច ២ឆ្នាំ។
ជាមួយគ្នានោះ លោកជំទាវ អនុប្រធានអចិន្ត្រៃយ៍សាខា ក៏បានក្រើនរំលឹកដល់ ស្ត្រីមានផ្ទៃពោះ និងស្ត្រីជាមាតាកំពុងបំបៅកូនដោយទឹកដោះម្តាយ ទាំងអស់ ត្រូវ រស់នៅតាមគន្លងប្រក្រតីភាពថ្មី ក្នុងបរិបទកូវីដ-១៩ ដោយត្រូវថែទាំសុខភាពឲ្យបានរឹងមាំ និងអនុវត្តឲ្យបានខ្ជាប់ខ្ជួនតាមវិធានការសុខាភិបាល ” ៣ការពារ ៣កុំ “ និងទៅចាក់វ៉ាក់សាំងបង្ការជំងឺកូវីដ-១៩ ឲ្យបានគ្រប់ដូសមូលដ្ឋាន ឬដូសជំរុញឲ្យបានគ្រប់ៗគ្នា ។
គួរបញ្ជាក់ថា អំណោយរបស់សម្តេចកិត្តិព្រឹទ្ធបណ្ឌិត ឥស្សរជនឆ្នើមថ្នាក់ជាតិ ដែលបានផ្តល់ជូន ស្រ្តីមានផ្ទៃពោះទាំង ៩នាក់នេះ ក្នុងម្នាក់ៗ ទទួលបាន៖ មី ១កេស, ឃីត ១កញ្ចប់, ស្ករស ១គីឡូក្រាម ទឹកដោះខាប់ ១កំប៉ុង, ជែលលាងដៃ ១ដប, សាប៊ូ protex ៤ដុំ, ម្សៅលាបខ្លួនទារក ១ដប, សាប៊ូដុសខ្លួន ១ដប, ខោទឹកនោម ១យួរ , ម៉ាស់ ១០បន្ទះ និងថវិកា ៥០,០០០ រៀល ។ ព្រមទាំងផ្តល់ Gel លាងដៃ ២កេស ស្មើនឹង ៣២ដប ជូនមណ្ឌលសុខភាពឃុំអំពិល ផងដែរ ៕
