កំពង់ឆ្នាំង៖ កម្មការនីរោងចក្រកាត់ដេរអឹមវ៉េ៧នាក់ បានដួលសន្លប់បន្តបន្ទាប់គ្នា នៅពេលមានទុស្សេអគ្គីសនីក្នុងពេលពួកគេកំពុងធ្វើការនៅក្នុងរោងចក្រ ហើយត្រូវបានសមត្ថកិច្ចនគរបាលក្រុងកំពង់ឆ្នាំង និងកម្មករកម្មការនីដែលធ្វើការជាមួយគ្នាដឹកបញ្ជូនមកកាន់មន្ទីពេទ្យខេត្តដើម្បីសង្គ្រោះព្យាបាល។ហេតុការណ៍នេះបានកើតឡើងនៅវេលាម៉ោង១១និង១៥នាទីថ្ងៃទី០៥ ខែកញ្ញា ឆ្នាំ២០១៤ ស្ថិតក្នុងរោងចក្រអឹមវ៉េ នៅក្នុងភូមិត្រពាំងចិកសា សង្កាត់កំពង់ឆ្នាំង ក្រុងកំពង់ឆ្នាំង។
លោក សំ សិទ្ធី អធិការនគរបាលក្រុងកំពង់ឆ្នាំងបានថ្លែងអោយដឹងថា៖កម្មការនីដែលដួលសន្លប់ទាំងអស់មានចំនួន៧នាក់ ដោយសារតែធំក្លិនផ្សែងដែលទុសស្សេខ្សែ ភ្លើងនៅក្នុងអាគារទី៥នៃរោងចក្រ។ក្រោយពីទទួលព័ត៌មាននេះភ្លាម លោកបានដឹកនាំកំលាំងនគរបាលក្រុង សហការជាមួយប៉ុស្តិ៍រដ្ឋបាលក្រុងកំពង់ឆ្នាំង ចុះជួយយកកម្មការនីទាំងនោះយកមកសង្គ្រោះនៅក្នុងមន្ទីរពេទ្យខេត្តភ្លាមៗដែរ។
កម្មការនីម្នាក់ក្នុងចំណោម៧នាក់ដែលបានរងគ្រោះនោះបានរៀបរាប់ប្រាប់ថា៖មុន ពេលកើតហេតុ ពួកគាត់បានឭសំឡេងផ្ទុះយ៉ាងខ្លាំង ខណៈនោះភ្លើងបំភ្លឺទាំងអស់នៅក្នុងអាគារត្រូវបានដាច់ងងឹត ហើយមេការបានបញ្ជារអោយចេញមកក្រៅទាំងអស់គ្នា។ក្រោយមកមួយសន្ទុះមេការក៍បានអោយចូលធ្វើការវិញ ពេលកំពុងធ្វើការបានបន្តិចនោះក៍ ឭសំឡេងផ្ទុះម្តងទៀត បូករួមនឹងក្លិនឆួលចេញពីការទុសសេខ្សែភ្លើងផងនោះ បណ្តាលអោយកម្មការនីមួយចំនួនបានដួលសន្លប់ភ្លាមតែម្តង។
ប្រភពពីកម្មការនីមួយចំនួនទៀតដែលគាត់ជឿទៅលើអបិយជំនឿបានបង្ហើបអោយអ្នកយកព័ត៌មានយើងដឹងថា៖នៅរោងចក្រអឹមវ៉េនេះ ជារៀងរាល់ឆ្នាំអោយតែដល់ខែ៨ និងខែ៩នេះគឺមានហេតុការណ៍កម្មការនីដួលសន្លប់រហូត នេះក៍ដោយសារតែថៅកែមិនបានសែនព្រេនជ្រូកខ្វៃ និងសំណែនផ្សេងៗទៀតអោយម្ចាស់ទឹកដីនៅកន្លែងនោះ។
ដោយឡែកនៅក្នុងមន្ទីរពេទ្យខេត្តកំពង់ឆ្នាំងគេឃើញ ក្រុមគ្រូពេទ្យខេត្តបាននឹងកំពុងជួយសង្គ្រោះកម្មការនីដែលសន្លប់យ៉ាងយកចិត្តទុដាក់ នៅពេលដែលកម្មការនីមួយចំនួននៅសន្លប់នៅឡើយ ហើយមួយចំនួនទៀតបានដឹងខ្លួននិងធូរស្រាលខ្លះហើយនោះ៕
